នៅព្រឹកថ្ងៃទី០៤ ខែកក្កដា ឆ្នាំ២០១៩នេះ អគ្គនាយកដ្ឋានពន្ឋដារនៃក្រសួងសេដ្ឋកិច្ចហិរញ្ញវត្ថុ បានរៀបចំសិក្ខាសាលាផ្សព្វផ្សាយច្បាប់បទបញ្ញតិនានានិងសេចក្តីណែនាំផ្សេងៗជាពិសេសលើកទឹកចិត្តផ្នែកពន្ឋដារសម្រាប់អ្នកជាប់ពន្ឋតូចនិងមធ្យមក្នុងវិស័យអាទិភាព នៅសណ្ឋាគារអង្គរប៉ារ៉ាឌីខេត្តសៀមរាប ក្រោមអធិបតីភាពលោកបណ្ឌិត កែន សម្បត្តិ អគ្គនាយករងនៃអគ្គនាយកដ្ឋានពន្ធដារ , ឯកឧត្តម អ៊ាន ឃុន ប្រធានក្រុមប្រឹក្សាខេត្តស្ដីទី និង លោកស្រី យូ សុភា អភិបាលរងខេត្ត និងជាតំណាងដ៍ខ្ពង់ខ្ពស់ឯកឧត្តម ទៀ សីហា អភិបាលខេត្តសៀមរាប ដោយមានការចូលរួមពីសំណាក់លោក លោកស្រី ជាមន្ត្រីរាជការមកពីអង្គភាពមន្ទីរ ស្ថាប័ននានាជុំវិញខេត្ត អភិបាល បណ្ណាធិការ និងជាតំណាងសណ្ឋាគារ ភោជនីយដ្ឋាន សហគ្រាស សរុបចំនួនប្រមាណជាង៤០០នាក់។
លោកស្រី យូ សុភា អភិបាលរងខេត្ត បានបញ្ជាក់ថា ក្នុងក្របខ័ណ្ឌគោលនយោបាយរាជរដ្ឋាភិបាល ក៏ដូចជាអគ្គនាយកដ្ឋានពន្ធដារ មិនមានគោលការណ៍បង្កើតប្រភេទពន្ធថ្មី ឬដំឡើងអត្រាពន្ធបន្ថែម ដែលជាបន្ទុកដល់ប្រជាពលរដ្ឋ និងធុរជនក្នុងគោលដៅបង្កើនចំណូលថវិកាជាតិនោះទេ ប៉ុន្តែអគ្គនាយកដ្ឋានពន្ធដារ នឹងខិតខំផ្តោតការយកចិត្តទុកដាក់ខ្ពស់លើការពង្រឹងការអនុវត្តច្បាប់ និងបទប្បញ្ញត្តិជាធរមាន តាមរយៈការអនុវត្តវិធានការយ៉ាងម៉ឺងម៉ាត់ ទាំងវិធានការច្បាប់ និងវិធានការរដ្ឋបាល ចំពោះការគេចវេះពន្ធ ការលួចបន្លំពន្ធតាមគ្រប់រូបភាព ដើម្បីធានាបាននូវបរិកាស ធុរកិច្ច និងការប្រកួតប្រជែងដោយស្មើភាពគ្នាចំពោះគ្រប់ធុរជន ក្នុងគោលដៅប្រមូលចំណូលប្រកបដោយតម្លាភាព ប្រសិទ្ធភាព ស័ក្តិសិទ្ធិភាព និងសមធម៌ ព្រមទាំងបង្កឱ្យមានសង្គតិភាពក្នុងការអនុវត្តច្បាប់ ស្របតាមគោលនយោបាយកែទម្រង់ស៊ីជម្រៅដ៏មុតស្រួចរបស់រាជរដ្ឋាភិបាលនីតិកាលទីប្រាំ នៃរដ្ឋសភា ក្រោមការដឹកនាំដ៏ខ្ពង់ខ្ពស់ប្រកបដោយគតិបណ្ឌិតរបស់សម្តេចតេជោ ហ៊ុន សែន នាយករដ្ឋមន្ត្រីនៃកម្ពុជា ។
លោកបណ្ឌិត កែន សម្បត្តិ មានប្រសាសន៍ថា សិក្ខាសាលានាពេលនេះធ្វើឡើង ដើម្បីឆ្លើយតបទៅនឹងមាត្រាទី៩០នៃច្បាប់ស្តីពីសារ ពើពន្ឋដែលបានចែងថា អ្នកជាប់ពន្ឋមានសិទ្ឋិទទួលបានព័ត៌មាន ពាក់ព័ន្ឋទៅនឹងកិច្ចដំណើរការនៃប្រព័ន្ឋពន្ឋដារនិងការកំណត់ពន្ឋ ខណៈកន្លងមកជារឿយៗ នៅពេលមានបទបញ្ញត្តិថ្មីៗ អគ្គនាយកដ្ឋានពន្ឋដារ តែងតែធ្វើការផ្សព្វផ្សាយទូលំទូលាយទាំងតាមរយៈសិក្ខាសាលា ទាំងតាមរយៈប្រព័ន្ឋផ្សព្វផ្សាយនានា ក៍ដូចជាផ្សព្វផ្សាយក្នុងគេហទំព័រអគ្គនាយកដ្ឋានពន្ឋផងដែរ ដើម្បីឱ្យមានតម្លាភាព និងបានជ្រួតជ្រាបដល់អ្នកជាប់ពន្ឋបានដឹងអំពីបទ បញ្ញត្តិផ្សេងៗ ចៀសវាងការអនុវត្តមិនបានត្រឹមត្រូវ ហើយត្រូវរងនូវការពិន័យ ជាដើម។
លោកបណ្ឌិត កែន សម្បត្តិ បន្តថា ប្រធានបទពាក់ព័ន្ឋទៅនឹងបទបញ្ញត្តិនៃការលើកទឹកចិត្តផ្នែកពន្ឋដារសម្រាប់អ្នកជាប់ពន្ឋតូចនិងមធ្យម ជាប្រធានបទសំខាន់ចង់ឱ្យអ្នកជាប់ពន្ឋបានជ្រួតជ្រាប និងជំរុញឱ្យដាក់ពាក្យស្នើសុំការលើកទឹកចិត្ត ដើម្បីទទួលបានការលើកទឹកចិត្តស្របតាមបទបញ្ញត្តិនិងគោលនយោបាយរបស់រាជរដ្ឋាភិបាល ហើយក្នុងក្របខ័ណ្ឌនៃកម្មវិធីកំណែទម្រង់ហិរញ្ញវត្ថុសាធារណៈ រាជរដ្ឋាភិបាលកម្ពុជា បានដាក់ចេញនូវយុទ្ឋសាស្ត្រកៀងគរចំណូលរយៈពេលមធ្យម២០១៤-២០១៨ តាមរយៈស្នូល នៃអភិបាលកិច្ចល្អ ដែលជាស្នូលរបស់យុទ្ឋសាស្ត្រចតុកោណ ហេតុនេះហើយអគ្គនាយកដ្ឋានពន្ឋដារ ខិតខំពង្រឹងអភិបាលកិច្ចល្អស្របតាមយុទ្ឋសាស្ត្រចតុកោណរបស់រាជរដ្ឋាភិបាល ហើយខិតខំអនុវត្តផែនការសកម្មភាពទាំងឡាយណាដែលមាននៅក្នុងយុទ្ឋសាស្ត្រកៀគរចំណូល ដោយផ្តោតសំខាន់ទៅលើកំណែទម្រង់ស៊ីជំរៅទៅលើមុខងារស្នូលសំខាន់ៗមួយចំនួន៥ដូចជា ការធ្វើឱ្យប្រសើរឡើងការចុះបញ្ជីពន្ឋដារ ការធ្វើឱ្យប្រសើរឡើងនូវការដាក់លិខិតប្រកាស ការធ្វើឱ្យប្រសើរឡើងនៃការផ្តល់សេវា ពង្រឹងនូវការប្រមូលចំណូលបំណុលពន្ឋនិងការដោះស្រាយវីវាទ ៕
អត្ថបទ និង រូបថត ៖ លោក យូ វង្ស
កែសម្រួលអត្ថបទ ៖ លោក លីវ សាន្ត
