នៅរសៀលថ្ងៃទី០៨ខែកក្កដា ឆ្នាំ២០១៩នេះ លោក ព្រំ វិច ប្រធានការិយាល័យផលិតកម្ម និងបសុព្យាបាល នៃមន្ទីរកសិកម្ម រុក្ខាប្រមាញ់ និងនេសាទ ខេត្តសៀមរាប បានអះអាងថា ខេត្តសៀមរាប មិនមានការឆ្លងជំងឺប៉េស្តជ្រូកអាហ្វ្រិក ហើយក៏មិនមានជ្រូននាំចូលពីប្រទេសវៀតណាមឡើយ។
មន្ត្រីជំនាញរូបនេះ បានអះអាងយ៉ាងដូច្នេះ ខណៈមានការផ្ទុះឡើងនូវជំងឺប៉េស្តជ្រូកអាហ្វ្រិក នៅខេត្តរតនគិរី និងខេត្តត្បូងឃ្មុំ និងខេត្តស្វាយរៀងផងដែរ។
ជាមួយនឹងការព្រួយបារម្ភរបស់ប្រជាពលរដ្ឋទូទៅ រដ្ឋមន្ដ្រីក្រសួងកសិកម្ម ឯកឧត្តម វេង សាខុន ធ្លាប់បានប្រកាសថា ជំងឺប៉េស្តជ្រូកអាហ្វ្រិក ជាជំងឺកាចសាហាវអាចធ្វើឲ្យជ្រូកស្លាប់ដល់១០០ភាគរយ ប៉ុន្តែជំងឺនេះមិនឆ្លង ឬប៉ះពាល់ដល់ជីវិតមនុស្ស។
លោក ព្រំ វិច បានបញ្ជាក់ថា ទោះមិនមានសញ្ញានៃការឆ្លងជំងឺប៉េស្តជ្រូកអាហ្វ្រិក ក្នុងខេត្តទេសចរណ៍ដ៏ធំមួយនេះក្ដី ក៏ក្រុមមន្ត្រីជំនាញ នៅតែបន្តតាមដាន ស្រាវជ្រាវយ៉ាងហ្មងចត់ និងជាប្រចាំទៅលើសុខភាពសត្វជ្រូកនៅទូទាំងខេត្ត និងបានណែនាំឱ្យអ្នកចិញ្ចឹមជ្រូក កន្លែងប្រមូលជ្រូក និងទីផ្សារជ្រូកឱ្យធ្វើអនាម័យឱ្យបានជាប្រចាំ ជាមួយគ្នានោះ មន្ត្រីផលិតកម្ម និងបសុព្យាបាលខេត្តសៀមរាប បានកំពុងតែបង្កើនការត្រួតពិនិត្យលើសុខភាពសត្វជ្រូកដែលត្រូវយកមកផ្គត់ផ្គង់នៅលើទីផ្សារក្នុងខេត្តសៀមរាប ដូចជាការពិនិត្យសត្វជ្រូកដឹកតាមរថយន្ត តាមម៉ូតូ តាមកសិដ្ឋាន និងកន្លែងចិញ្ចឹមជាលក្ខណៈគ្រួសារដោយមានការបាញ់ថ្នាំសម្លាប់មេរោគជាមុនផងដែរ។ ចំពោះសាច់ជ្រូកទាំងអស់ ដែលបានដាក់លក់នៅលើទីផ្សារនៅក្នុងខេត្តសៀមរាប គឺត្រូវតែមានត្រួតពិនិត្យពីមន្ត្រីជំនាញ និងមានបោះត្រានៅលើសាច់ជ្រូកតែម្តង។
សូមរំលឹកថា កាលខែមីនា ឆ្នាំ២០១៩នេះ ជំងឺប៉េស្តជ្រូកអាហ្វ្រិក បានផ្ទុះម្ដងរួចមកហើយ នៅខេត្តរតនគិរី បណ្ដាលឲ្យជ្រូកចំនួនប្រហែល ៤០០ក្បាលបានងាប់ ខណៈសមាគមអ្នកចិញ្ចឹមសត្វកម្ពុជា សង្ស័យថាមានការលួចនាំជ្រូកចូលពីវៀតណាម។ រីឯប្រទេសវៀតណាម ក៏បានរងគ្រោះ ពីការឆ្លងជំងឺនេះ ពីប្រទេសចិន កាលពីខែកុម្ភៈ ឆ្នាំ២០១៩ផងដែរ៕
អត្ថបទ និងរូបភាព៖ លោក ឃុត សៅ
កែសម្រួលអត្ថបទ៖ លោក សេង ផល្លី
