កូនឈើ គគីរ និងក្រញូង ចំនួន៥០០០ដើម ត្រូវបាន ដាំនៅលើផ្ទៃដី ៣ហិចតា ស្ថិតនៅខាងកើតប្រាសាទប្រិយ៍ ក្នុង ឃុំលាងដៃ ស្រុកអង្គរធំ ខេត្តសៀមរាប ដើម្បីរក្សាទុកជាគម្របការពារកំដៅរបស់ភពផែនដី និងមួយផ្នែកទៀតជារបាំងការពារប្រាសាទបុរាណ ពីគ្រោះធម្មជាតិនានា។
ព្រះវិជ័យរង្សី សាសនធរោ ឡាច លាង អនុគណក្រុងសៀមរាបមានថេរដិការថា ការដាំកូនឈើគឺផ្តល់អត្ថប្រយោជន៍ធំធេងណាស់ដល់បរិស្ថាន និងជីវិតមនុស្សសត្វ និងទទួលបានអានិសង្ឃទាំងយប់ទាំងថ្ងៃដូចការកសាងផ្លូវ ជីកអណ្តូង កសាងកុដិសាលាជាដើម ដែរ។ ព្រះអង្គរំលឹកពីពុទ្ឋប្រវត្តិនៃព្រះសម្មាសម្ពុទ្ឋបរមគ្រូនៃយើង ថា ព្រះអង្គបានប្រសូត្រក៏នៅក្នុងព្រៃ សាងព្រះភ្នួសក៏នៅក្នុងព្រៃ និងបរិនិពា្វនក៏ក្នុងព្រៃ។ តាមជាក់ស្តែង ធម្មជាតិនិងព្រៃឈើទាំងឡាយអាចរស់នៅលើភពផែនដីយើងនេះបានដោយ មិនចាំបាច់មានមនុស្ស តែមនុស្ស សត្វទាំងឡាយ មិនអាចរស់នៅដោយខ្វះព្រៃឈើនិងធម្មជាតិបានទេ។
មានវត្តមានក្នុងឱកាសននោះ លោកជំទាវ ម៉ែន នារីវុឌ្ឍី ហូសិទ្ឋី ស្នងការទំនាក់ទំនងសាធារណៈនៃសមាគមកាយរិទ្ឋនារីកម្ពុជា និងជាអនុប្រធានសមាគមកម្ពុជារដ្ឋកម្ពុជា បានផ្តើមគំនិតនិងស្នើដល់អាជ្ញាធរជាតិអប្សរា នៅពេលខាងមុខៗ សូមឱ្យជួយដាំដើមសាលព្រឹក្សនៅទីនេះផង ដើម្បីអភិវឌ្ឍន៍ទីនេះឱ្យក្លាយទៅជាពុទ្ឋមណ្ឌល ជាតំបន់ទេសចរណ៍តាមបែបព្រះពុទ្ឋសាសនា និងវប្បធម៌ ទុកសម្រាប់តកូនតចៅជំនាន់ក្រោយរបស់យើងនៅថ្ងៃខាងមុខ។
មន្ត្រីនាំពាក្យអាជ្ញាធរជាតិអប្សរា លោក ឡុង កុសល បានបញ្ជាក់ថា ព្រៃឈើវាមានទំនាក់ទំនងយ៉ាងស្អិតរមួតជាមួយភាពគង់វង្សរបស់ប្រាសាទ ព្រៃឈើបានផ្តល់នូវរបាំងមួយយ៉ាងធំទប់កម្លាំងខ្យល់កុំឱ្យបោកបក់មកលើប្រាសាទនិងជួយរក្សាសំណើមសម្រាប់ចិញ្ចឹមថ្មប្រាសាទឱ្យមានលំនឹងនិងស្រូបទាញជាតិទឹកពីដើមឈើទៅវិញទៅមកផងដែរព្រមទាំងទប់នូវការហូរច្រោះដីទៀតផង។បើគ្មានដើមឈើទេ ប្រាសាទទាំងឡាយរបស់យើងមិនស្ថិតនៅគង់វង្សរាប់ពាន់ឆ្នាំមកដល់ពេលនេះនោះទេ ក្នុងលក្ខខណ្ឌអាកាសធាតុក្តៅ គ្មានសំណើម ថ្មប្រាសាទនឹងប្រេះជាបន្តបន្ទាប់ផងដែរ ។ ជាក់ស្ដែង ព្រៃឈើជួយការពារលំនឹងបរិស្ថាន ការពារខ្យល់ និងការពារបំណាក់ដី ជាពិសេសព្រៃឈើក្នុងតំបន់រមណីយដ្ឋានអង្គរជួយការពារនិងទប់លំនឹងប្រាសាទមិនឱ្យស្រុតឬដួលរលំ ព្រោះថាគ្រឹះរបស់ប្រាសាទ គឺធ្វើពីដីខ្សាច់ ហើយវាមានទំនាក់ទំនងទៅនឹងប្រភពទឹក ប្រសិនបើអស់ព្រៃឈើ នោះប្រភពទឹកក្រោមដីក៍នឹងបាត់បង់ ហើយវាបន្តប៉ះពាល់ដល់គ្រឹះប្រាសាទ ដែលគេដឹងថាគ្រឹះប្រាសាទរឹងមាំដោយមានខ្សាច់និងទឹកនៅពីក្រោម។
សូមជម្រាបថា ឆ្លើយតបនឹងការអំពាវនាវរបស់អាជ្ញាធរជាតិអប្សរា ចាប់ពីខែមិថុនាឆ្នាំ២០១៩មក មានប្រជាពលរដ្ឋគ្រប់មជ្ឈដ្ឋានបានចូលរួមដាំកូនឈើជាង១ម៉ឹនដើមហើយ ជាមួយគ្នានេះ អាជ្ញាធរជាតិអប្សរាបានត្រៀមបំរុងដីសម្រាប់ដាំកូនឈើរួមគ្នា ចំនួន៣៥ហិកតាទៀត ដែលមានទីតាំងចំនួន៦ កន្លែងខុសៗគ្នា និងបានបំរុងកូនឈើសម្រាប់មហាជនដាំបន្ថែមទៀត ចំនួន៤ម៉ឺនដើម មិនតែប៉ុណ្ណោះអាជ្ញាធរជាតិអប្សរា ក៏បានត្រៀមចាំផ្តល់កូនឈើប្រគេន និងជូនទៅតាមសំណូមពរដល់ព្រះសង្ឃគ្រប់ទីអារាម និងអង្គភាពមន្ទីរស្ថាប័ន នានា រួមទាំងប្រជាពលរដ្ឋគ្រប់មជ្ឈដ្ឋានផងដែរ ដែលត្រូវការយកកូនឈើទៅដាំ។
អត្ថបទ និងរូបភាព៖ លោក យូ វង្ស
កែសម្រួលអត្ថបទ៖ លោក សេង ផល្លី
