នៅព្រឹកថ្ងៃទី០៩ ខែកក្កដា ឆ្នាំ២០១៩ អភិបាលរងខេត្តសៀមរាប អគ្គនាយករងអាជ្ញាធរជាតិអប្សរា អ្នកជំនាញការ អភិវឌ្ឍន៍វិស័យទេសចរណ៍ ជនជាតិបារាំង ២រូប រួមនឹងមន្ទីរអង្គភាពពាក់ព័ន្ធនានាក្នុងខេត្តសៀមរាប បានជួបពិភាក្សាលើការរៀបចំផែនការមេ ដើម្បីអភិវឌ្ឍន៍វិស័យទេសចរណ៍នៅក្នុងខេត្តសៀមរាប។
លោកសាស្ត្រាចារ្យ ហ្សាក់កេ រូហ្វេ (Jacques Ruffé) អ្នកជំនាញការអន្តរជាតិ ជំនាញអភិវឌ្ឍន៍ទេសចរណ៍ បានបង្ហាញថា ខេត្តសៀមរាប ជាខេត្តគោលដៅទេសចរណ៍មួយរបស់កម្ពុជា ក៏ដូចជានៅក្នុងតំបន់អាស៊ីអាគ្នេយ៍ផងដែរ។ ដើម្បីធ្វើឲ្យវិស័យទេសចរណ៍ក្នុងខេត្តនេះមានភាពល្អប្រសើរឡើងបន្ថែមទៀត យើងចាំបាច់ត្រូវរៀបចំផែនការមេមួយច្បាស់លាស់ ទើបលោកនិងក្រុមការងារ ចាំបាច់ត្រូវសិក្សាស្វែងយល់ពីស្ថានភាពនៃការអភិវឌ្ឍវិស័យទេសចរណ៍ក្នុងខេត្ត និងតំបន់ជុំវិញ សិក្សាស្វែងយល់អំពីគម្រោងអភិវឌ្ឍន៍ក្រុង និងខេត្ត គម្រោងរៀបចំ និងអភិវឌ្ឍតំបន់ជនបទ ការអភិវឌ្ឍប្រព័ន្ធហេដ្ឋារចនាសម្ព័ន្ធ និងដឹកជញ្ជូន និងផ្លូវថ្នល់ការគ្រប់គ្រងសំណងរីងរាវក្នុងក្រុង និងធ្វើការវិភាគចំណុចខ្លាំងចំណុចខ្សោយ បញ្ហាប្រឈមនៅក្នុងក្រុង ព្រមទាំងការវិភាគអំពីស្ថានភាពនៃការមកដល់របស់ភ្ញៀវទេសចរ ទៅតាមតំបន់គោលដៅទេសចរណ៍នីមួយៗ។
ជាការឆ្លើយតប លោកពៅ ពិសិដ្ឋ អភិបាលរងខេត្តសៀមរាប បានបញ្ជាក់ជូនអ្នកជំនាញការបារាំង និងសមាជិកក្នុងកិច្ចប្រជុំក្នុងឱកាសនេះថា ខេត្តសៀមរាបពឹងផ្អែកស្ទើរទាំងស្រុងលើវិស័យទេរចរណ៍ ដូច្នេះប្រព័ន្ធហេដ្ឋារចនាសម្ព័ន្ធគឺជា ការយកចិត្តទុកដាក់ខ្ពស់របស់ រាជរដ្ឋាភិបាលកម្ពុជា អាជ្ញាធរខេត្ត និងស្ថាប័នពាក់ព័ន្ធ ជាក់ស្តែងអាជ្ញាធរខេត្តសៀមរាប បានបង្កើតគណៈកម្មការគ្រប់គ្រង និងអភិវឌ្ឍន៍វិស័យទេសចរណ៍ក្នុងខេត្តសៀមរាប ដែលមានឯកឧត្តមអភិបាលខេត្តជាប្រធាន។
មានមតិចូលរួមក្នុងឱកាសនោះ ឯកឧត្តម សុខ សង្វារ អគ្គនាយករងអាជ្ញាធរជាតិអប្សរា និងជាអនុប្រធានគណៈកម្មការគ្រប់គ្រង និងអភិវឌ្ឍន៍វិស័យទេចរណ៍ក្នុងខេត្តសៀមរាប ក៏បានលើកឡើងដែរថា តំបន់ទេសចរណ៍នៅក្នុងខេត្តសៀមរាប គេមិនអាចកំណត់ថា តំបន់ណាជាតំបន់ទី១បាននោះទេ គឺទាំងនៅតំបន់ប្រាសាទ តំបន់ក្នងក្រុងសៀមរាប និងតំបន់បឹងទន្លេសាប គឺជាត្រូវចាតទុកជាតំបន់ទី១ទាំងអស់។ ឯកឧត្តមបន្តថា ដូច្នេះអ្នកពាក់ព័ន្ធទាំងអស់បានគិតគូរយ៉ាងច្បាស់លាស់ ដើម្បីធ្វើយ៉ាងណាឲ្យអ្នកទេសចរបានត្រៀមខ្លួន ក្នុងការទទួលយកកញ្ចប់សេវាទេសចរណ៍ដ៏ល្អរបស់ខេត្តសៀមរាប៕
អត្ថបទ និងរូបភាព៖ លោក ជា ស្រស់
កែសម្រួលអត្ថបទ៖ លោក សេង ផល្លី
