ប្រាសាទទន្លេស្ងួត ជាមន្ទីរពេទ្យមួយ ក្នុងចំណោមមន្ទីរពេទ្យទាំង១០២ របស់ព្រះបាទជ័យវរ្ម័នទី៧ ដែលគ្រោងនឹងប្រើពេលជួសជុលឡើងវិញ ក្នុងរយៈពេលប្រមាណពីរឆ្នាំ ដោយអាជ្ញាធរជាតិអប្សរា។
តាមការបញ្ជាក់របស់លោក ជា សារិទ្ធិ បុរាណវិទូនៃនាយកដ្ឋានអភិរក្សប្រាសាទក្នុងឧទ្យានអង្គរនិងបុរាណវិទ្យាបង្ការ ដែលជាប្រធានគម្រោងជួសជុលប្រាសាទនេះបានឱ្យដឹងថា ប្រាសាទទន្លេស្ងួតរងនូវការខូចខាតខ្លាំងដោយកត្តាពីរសំខាន់ គឺទឹកភ្លៀង ព្រោះប្រាសាទគ្មានដំបូលនាំឱ្យទឹកហូរចូលដល់ក្នុងគ្រឹះ ធ្វើឱ្យគ្រឹះប្រាសាទចុះខ្សោយខ្លាំង និងស្រុត។ ទីពីរ គឺដើមឈើដែលជាបង្អែកដល់ប្រាសាទផង ហើយក៏ជាអ្នកបំផ្លាញប្រាសាទផង ព្រោះវាដុះលើប្រាសាទ ហើយចាក់ឫសចូលគ្រឹះធ្វើឱ្យថ្មនៃរចនាសម្ពន្ធប្រាសាទរំកិលចេញពីស្ថានភាពដើម ទើបមានថ្មខ្លះរអិលធ្លាក់ ហើយខ្លះទៀតឫសឈើទាញចេញពីគ្នា។
បុរាណវិទូរូបនេះ បានរំលឹកថាកាលពីឆ្នាំ២០០៥ អាជ្ញាធរជាតិអប្សរា បានធ្វើការទល់ទ្រ ផ្នែកជុំវិញប្រាសាទ ដើម្បីទប់ទល់នឹងការបាក់រលំ ហើយនៅឆ្នាំ២០១៩នេះ យើងឃើញថា គ្រឹះប្រាសាទធ្វើពីថ្មបាយក្រៀមបានខូចខាតទាំងស្រុង ដែលវាមិនអាចទ្រលំនឹងតួប្រាសាទធ្វើពីថ្មភក់បានឡើយ ហើយវាបានបង្កផលលំបាក និងស្មុគស្មាញខ្លាំង ចំពោះគម្រោងមួយនេះ។
លោក ជា សារិទ្ធិ បានបង្ហាញពីការជួសជុលប្រាសាទត្រួសៗថា ក្នុងការជួសជុលចែកជាពីរដំណាក់កាល៖
ទី១ រុះរើតួប្រាសាទទាំងអស់ពីដំបូលដល់គ្រឹះ ហើយប្រមូលថ្ម ចុះបញ្ជីថ្ម ចុះលេខថ្ម សម្រង់ប្លង់ប្រាសាទ និងធ្វើកំណាយស្រាវជ្រាវ៤កន្លែង ដើម្បីសិក្សាពីស្ថានភាពគ្រឹះមុននឹងធ្វើការជួសជុល។
ទី២ គឺការរៀបសារឡើងវិញទៅតាមបទដ្ឋានបច្ចេកទេសដើម ទម្រង់ដើម ដោយមានការសិក្សាយ៉ាងល្អិតល្អន់ទាំងគ្រឹះ ជញ្ជាំង និងដំបូល ព្រមទាំងធ្វើការសិក្សារកថ្មរ៉ាយប៉ាយ ប្រមូលរៀបផ្គុំសាកល្បង ហើយយកដាក់បំពេញទីតាំងដើមវិញក្នុងពេលជួសជុល។
សូមបញ្ជាក់ដែរថា ប្រាសាទឬមន្ទីរពេទន្យទន្លេស្ងួត កាលពីឆ្នាំ២០១៧ ធ្លាប់បានកំណាយស្រាវជ្រាវដោយអ្នកជំនាញបុរាណវិទ្យាអាជ្ញាធរជាតិអប្សរា បានរកឃើញទ្វារបាលកម្ពស់ជិត២ម៉ែត្រ ព្រះពុទ្ធស្តេចថ្នាំ បដិមាជាច្រើនអង្គ បំណែកជើងទ្វារបាល និងស្លាកស្នាមរស់នៅរបស់ប្រជាជននាអតីតកាលជាច្រើន។ ប្រាសាទនេះ មិនធ្លាប់មានការជួសជុលឡើយពីមុន គឺមានតែអ្នកជំនាញបារាំងបានចូលមកថែទាំសម្អាតនិងកាប់ដើមឈើដុះលើប្រាសាទនាឆ្នាំ១៩៣០ និងធ្វើកំណាយស្រាវជ្រាវផ្នែកតួប៉មជ្រុងអាគ្នេយ៍ និងជុំវិញប្រាសាទ ដើម្បីបកយកកំណកដីលើខឿនប្រាសាទ ហើយប្រមូលថ្មដែលធ្លាក់ពីលើមកទុកមួយកន្លែង និងចងក្រងឯកសារខ្លះៗតែប៉ុណ្ណោះ៕
អត្ថបទ និងរូបភាព៖ លោក ម៉ាត់ អារីហ្វីន
កែសម្រួលអត្ថបទ៖ លោក សេង ផល្លី
