មជ្ឈមណ្ឌលអភិវឌ្ឍន៍ យោធិនពិការសម្តេចតេជោ ហ៊ុន សែន គូលេន៣១៧ ខេត្តសៀមរាប គឺជាអង្គភាពមួយចំណុះឲ្យក្រសួងការពារជាតិ។ អង្គភាពនេះបង្កើតឡើង ក្នុងគោលបំណង ប្រមូលផ្ដុំអតីតយោធិន ដែលបាត់បង់កាយសម្បទាដោយសារសង្គ្រាម ឲ្យជីវភាពសមរម្យដូចប្រជាពលរដ្ឋទូទៅ តាមរយៈការដាំដុះ និងចិញ្ចឹមសត្វ និងដោយមានការយកចិត្តទុកដាក់ពី សម្តេចអគ្គមហាសេនាបតីតេជោ ហ៊ុន សែន និងសម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុន សែន និងក្រសួងការពារជាតិ។
មជ្ឈមណ្ឌលអភិវឌ្ឍន៍ យោធិនពិការសម្តេចតេជោ ហ៊ុន សែន គូលេន៣១៧ មានទីតាំងនៅ ភូមិស្នារតេជោ ឃុំបល្ល័ងស្រុកប្រាសាទបាគង ខេត្តសៀមរាប។ មជ្ឈមណ្ឌលនេះ បានបង្កើតនៅអំឡុងឆ្នាំ២០០៨ ក្រោមគំនិតផ្តួចផ្តើមរបស់ សម្តេចអគ្គមហាសេនាបតី តេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា និងបានកាត់ខ្សែបូរសម្ពោធជាផ្លូវការក្រោមអធិបតីភាពដ៍ខ្ពង់ខ្ពស់ សម្តេចអគ្គមហាសេនាបតី តេជោ ហ៊ុន សែន និងសម្តេចគតិព្រឹទ្ធបណ្ឌិត ប៊ុន រ៉ានី ហ៊ុន សែន កាលពីថ្ងៃទី៣១ខែកក្កដាឆ្នាំ២០១១ ។។
គ្រួសារយោធិនពិការភាគច្រើន នៅក្នុងមជ្ឈមណ្ឌលនេះ មកពីយុទ្ធភូមិភាគទី៤ កងពលអន្តរាគមន៍លេខមួយ និងមួយចំនួនទៀត មកពីអង្គភាពយោធានៅទូទាំងប្រទេស ដែលបានបូជាសាច់ស្រស់ឈាមស្រស់ដើម្បីមាតុភូមិ។
បច្ចុប្បន្ន មជ្ឈមណ្ឌលអភិវឌ្ឍន៍ យោធិនពិការសម្តេចតេជោ ហ៊ុន សែន មានគ្រួសារយោធិនសរុប ចំនួន២៧០គ្រួសារ ក្នុងនោះ ២៤៥គ្រួសារ ជាយោធិនពិការ និងមួយភាគតូចជាគ្រួសារយោធិនបម្រើការជូនមជ្ឈមណ្ឌល។
តាមការឲ្យដឹងពី ឯកឧត្តម ឧត្តមសេនីយ៍ឯក ពៅ ស៊ា នាយកមជ្ឈមណ្ឌលអភិវឌ្ឍន៍ យោធិនពិការសម្តេចតេជោ ហ៊ុន សែន គូលេន ៣១៧ សៀមរាប មានប្រសាសន៍ឱ្យដឹងថា នៅក្បែរមជ្ឈមណ្ឌលនេះ មានមណ្ឌលសុខភាព វត្តអារាម ទីផ្សារ សាលារៀនចាប់ពីថ្នាក់បឋមសិក្សា រហូតដល់សាកលវិទ្យាល័យ ដោយមិនបាច់ផ្លាស់ទីលំនៅទៅរៀននៅទីរួមខេត្តសៀមរាបឡើយ។ ទន្ទឹមនឹងនោះ គ្រួសារបងប្អូនយោធិនពិការ លោកគ្រូអ្នកគ្រូ និងពេទ្យឆ្មបស្ម័គ្រចិត្ត ដែលបានមករស់នៅក្នុងមជ្ឈមណ្ឌលនេះ សុទ្ធតែបានទទួល នូវរបបគោលនយោបាយដូចៗគ្នា ពីប្រមុខរាជរដ្ឋាភិបាលគឺ ដីចំនួន មួយហិតាកន្លះ លំនៅដ្ឋាន ០១ខ្នងទំហំ៥គុណនឹង៧ម៉ែត្រ ក្នុងមួយគ្រួសារ សម្រាប់ស្នាក់នៅ បង្កបង្កើនផល និងចិញ្ចឹមសត្វ។
ឯកឧត្តម ឧត្តមសេនីយ៍ឯក ពៅ ស៊ា គូសបញ្ជាក់ថា ទាំងនេះគឺជាការយកចិត្តទុកដាក់ពី សម្តេចតេជោ និងសម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន និងបានឧបត្ថម្ភជាបន្តបន្ទាប់ ដែលធ្វើឲ្យ បងប្អូនយោធិនពិការ និងគ្រួសារ មានលំនឹងលើផ្នែកជីវភាពរស់នៅ បានល្អប្រសើរហូតមកដល់សព្វថ្ងៃនេះ និងបានផ្លាស់ប្តូរជីវភាពគ្រួសាររបស់ពួកគាត់ ចូលរួមកាត់បន្ថយភាពក្រីក្រ ស្របតាមគោលនយោបាយរបស់រាជរដ្ឋាភិបាលកម្ពុជា។
អត្ថបទ និង រូបភាព : លោក យូ វង្ស
កែសម្រួលអត្ថបទ : លោក សេង ផល្លី
