ព្រឹកថ្ងៃទី២៥ ខែកក្កដា ឆ្នាំ២០១៩ នៅសាលសន្និសីទអង្គរនៃអាជ្ញាធរជាតិអប្សរា ថ្នាក់ដឹកនាំ ប្រធាននាយកដ្ឋាន មន្ត្រី-បុគ្គលិក ឆ្មាំ និងពលករមកពីគ្រប់នាយកដ្ឋាន និងតំណាងក្រុមហ៊ុន វីហ្គ្រីន ប្រមាណ៤០០នាក់ ចូលរួមសិក្ខាសាលាផ្ទៃក្នុងស្តីពី ការគ្រប់គ្រងបរិស្ថានក្នុងតំបន់អង្គរ។ យោងតាមការចុះផ្សាយព័ត៌មានរបស់អាជ្ញាធរជាតិអប្សរា សិក្ខាសាលានេះ ធ្វើឡើងក្នុងបំណងដើម្បីផ្សព្វផ្សាយគោលនយោបាយបរិស្ថានរបស់អាជ្ញាធរជាតិអប្សរា ផែនការអនុវត្តការងារបរិស្ថានរបស់នាយដ្ឋាននីមួយៗ ស្វែងយល់នូវបញ្ហាប្រឈមនិងដំណោះស្រាយរួម ប្រសិទ្ធិភាពការងារ និងការកែលម្អប្រព័ន្ធការងារ។
លោក អ៊ុន មុន្នីនីតា ប្រធានសវនករនៃអង្គភាពប្រព័ន្ធគ្រប់គ្រងបរិស្ថាន-អង្គរ លើកឡើងថា គោលនយោបាយគ្រប់គ្រងបរិស្ថានរបស់អាជ្ញាធរជាតិអប្សរាផ្តោតលើតំបន់រមណីយដ្ឋានអង្គរ ទស្សនៈវិស័យ ការប្តេជ្ញាចិត្តរក្សាការពារបរិស្ថានដែលមានស្រាប់ជាគោលដៅចម្បង ទប់ស្កាត់នូវផលប៉ះពាល់លើបរិស្ថាន និងការគ្រប់គ្រងនូវសកម្មភាពរបស់ខ្លួនទៅលើបរិស្ថាន។ លោកបន្តថា អាជ្ញាធរជាតិអប្សរាត្រូវទប់ស្កាត់ផលប៉ះពាល់ដោយប្រយោល សកម្មភាពភាគីពាក់ព័ន្ធអ្នកលក់ដូរ ប្រជាជនក្នុងតំបន់ ការបោះចោលសំរាមគ្មានសណ្តាប់ធ្នាប់ កាប់ព្រៃឈើ អាជ្ញាធរជាតិអប្សរាក្នុងនាមស្ថាប័នសាធារណៈមានតួនាទីអប់រំ ផ្សព្វផ្សាយ ទប់ស្កាត់គ្រប់សកម្មភាពធ្វើឱ្យប៉ះពាល់ដល់បរិស្ថានក្នុងរមណីយដ្ឋានអង្គរ។ ក្រៅពីនេះ ត្រូវបំពេញឬកែលម្អដល់តំបន់ណាដែលបាត់បង់ព្រៃឈើ ត្រូវដាំឡើងវិញ និងការស្តារប្រព័ន្ធធារាសាស្ត្រជាដើម។ល។
ឯកឧត្តម សុខ លក្ខិណា ប្រធានអង្គភាពប្រព័ន្ធគ្រប់គ្រងបរិស្ថាននៃអាជ្ញាធរជាតិអប្សរា បានឱ្យដឹងថា ខែមករាខាងមុខសភាសវនករនៃស្ថាប័នJQA នឹងពិនិត្យមើល ហើយផ្តល់សុពលភាពវិញ្ញាបនបត្រក្នុងលក្ខខណ្ឌដែលយើងអនុវត្តតាមស្តង់ដារមិនមានភាពមិនអនុលោម និងខុសឆ្គងក្នុងការអនុវត្ត។ ឯកឧត្តមបន្តថា តាមរយៈរបាយការណ៍កន្លងមក ពុំទាន់មានអង្គរភាពណាមួយមានភាពមិនអនុលោមនោះទេ សបញ្ជាក់ថាមានការទទួលខុសត្រូវខ្ពស់របស់ថ្នាក់ដឹកនាំ ព្រមទាំងថ្នាក់ដឹកនាំតាមនាយកដ្ឋាននីមួយៗដែលបង្ករលក្ខណៈឱ្យមន្ត្រីជំរុញ និងអង្គភាពគ្រប់គ្រងបរិស្ថានទទួលបានលទ្ធផលដ៏ត្រចះត្រចង់។
ឯកឧត្តម យិត ចាន់ដារដ្ឋ មានប្រសាសន៍ថា ការអនុវត្តគោលនយោបាយគ្រប់គ្រងបរិស្ថានជោគជ័យទៅបានអាស្រ័យដោយមានការចូលរួមពីអ្នកពាក់ព័ន្ធ៣សំខាន់ៗ ទី១៖ អាជ្ញាធរជាតិអប្សរាខ្លួនឯងដែលជាអ្នកគ្រប់គ្រងរមណីយដ្ឋាន ជាស្ថាប័នទីមួយត្រូវតែអនុវត្តឱ្យបានល្អប្រសើ ទី២៖ ប្រជាជនម្ចាស់ស្រុកដែលរស់នៅក្នុងតំបន់ រួមទាំងអ្នកលក់ដូរផ្សេងៗ ទី៣៖ វិស័យឯកជន មានទីភ្នាក់ងារទេសចរណ៍ អ្នកដឹកជញ្ជូន មគ្គុទេ្ទសក៍ សណ្ឋាគារ ភោជនីយដ្ឋាន អ្នកប្រកបរបរផ្តល់សេវាកម្មដល់វិស័យទេសចរណ៍ ហើយកត្តាធំៗទាំង៣នេះត្រូវតែអនុវត្តឱ្យដើរទន្ទឹមគ្នាដោយមិនអាចខ្វះមួយណាឡើយ៕
អត្ថបទ និង រូបភាព ៖ លោក ម៉ាត់ អារីហ្វីន
