ក្រុមការងារនៃនាយកដ្ឋានគ្រប់គ្រងទឹក នៃអាជ្ញាធរជាតិអប្សរាបង្ហាញថា ផ្លូវចន្លោះៗ នៅលើប្រឡាយ នៃប្រព័ន្ធបង្ហូរទឹក ជុំវិញកសិន្ធុប្រាសាទអង្គរវត្ត នឹងធ្វើការបិទ និងហាមមិនឲ្យមានការលក់ដូរ និងចតយានយន្តផ្សេងៗបន្តទៀតឡើយ។
តាមការបញ្ជាក់ពីក្រុមការងារជំនាញដដែលនេះ បានបន្ថែមថា ផ្លូវចន្លោះៗ នៅលើប្រឡាយនេះ គឺត្រូវបានអាជ្ញាធរជាតិអប្សរា បានទុកជាផ្លូវអាសន្ន ប៉ុន្តែកន្លងមក មានប្រជាពលរដ្ឋមួយចំនួនបានមកលក់ដូរនៅទីនេះ ជាមួយនោះភ្ញៀវទេសចរជាតិ ដែលបានមកទស្សនានៅរមណីយដ្ឋានអង្គរវត្ត បានយកចន្លោះផ្លូវនេះសម្រាប់ចតយានយន្ត និងបរិភោគចំណីអាហារ និងបានបោះចោលសំរាមគ្មានសណ្ដាប់ធ្នាប់ ដែលបានធ្វើឲ្យប៉ះពាល់ដល់ប្រព័ន្ធបណ្ដោះទឹកភ្លៀង និងបរិស្ថានក្នុងរមណីយដ្ឋានអង្គរយ៉ាងធ្ងន់ធ្ងរ។
សូមជម្រាបថា គម្រោងបិទផ្លូវចន្លោះៗ នៅលើប្រឡាយ នៃប្រព័ន្ធបង្ហូរទឹកជុំវិញកសិន្ធុប្រាសាទអង្គរវត្ត ធ្វើឡើងតបតាមការណែនាំរបស់អគ្គនាយកអាជ្ញាធរជាតិអប្សរា ដែលបានចុះទៅពិនិត្យការងារជាក់ស្ដែងនាពេលកន្លង។
អត្ថបទ និង រូបភាព ៖ លោក ម៉ាត់ អារីហ្វីន
កែសម្រួលអត្ថបទ៖ លោក សេង ផល្លី
