នៅព្រឹកថ្ងៃទី២៥ ខែកក្កដា ឆ្នាំ២០១៩ម្សិលមិញនេះ លោកជំទាវ សុខណារ៉ូ-ពៅហេង បានដឹកនាំក្រុមការងារយ៉េនឌ័រ យោធភូមិភាគទី៤ ចុះសួរសុខទុក្ខ និងសំណេះសំណាល ជាមួយបងប្អូនប្រជាពលរដ្ឋ ដែលកំពុងជួបវិបត្តិខ្វះខាតក្នុងជីវភាពរស់នៅប្រចាំថ្ងៃចំនួន ១៣គ្រួសារ ក្នុងនោះរួមមានគ្រួសារស្ត្រីមេម៉ាយ គ្រួសារមានអ្នកជម្ងឺក្នុងបន្ទុកនិងចាស់ជរា នៅក្នុងភូមិគោកត្រាច ឃុំខ្នាត ស្រុកពួកខេត្តសៀមរាប ក្នុងការយកចិត្តទុកដាក់ ជួយសម្រាលការលំបាកក្នុងជីវភាពប្រចាំថ្ងៃ នៃប្រជាពលរដ្ឋសហគមន៍ ដូចជាស្រីមេម៉ាយ គ្រួសារអ្នកមានជម្ងឺ និង ចាស់ជរាជាដើម ។
សកម្មភាពសប្បុរសធម៌នេះ គឺជាចំណែកមួយនៅក្នុងសកម្មភាពសង្គមជាច្រើនទៀត ដែលត្រូវបានក្រុមភរិយាថ្នាក់ដឹកនាំរបស់អង្គភាពយោធភូមិភាគទី៤ អនុវត្តក្រោមគោលការណ៍ស្ម័គ្រចិត្តនៃសិល្បៈចែករំលែក សម្រាប់ប្រជាពលរដ្ឋសហគមន៍ ដែលជួបបញ្ហាខ្វះខាត ដោយវិបត្តិផ្សេងៗនោះ ។
លោកជំទាវ សុខណារ៉ូ-ពៅហេង បានមានប្រសាសន៍ បញ្ហាសុខភាព គឺជាកត្តាសំខាន់ ដែលវាពាក់ព័ន្ធផ្ទាល់ដល់ជីវភាពរស់នៅប្រចាំថ្ងៃរបស់បងប្អូនប្រជាពលរដ្ឋ ។ សុខភាពមិនល្អ វាជាឱកាសនៃការរាតត្បាតដោយជម្ងឺផ្សេងៗ ដែលទាំងនោះវាមិនត្រឹមតែជាបញ្ហាប្រឈម ខាតបង់លុយកាក់ និង បាត់បង់ពេលវេលាក្នុងការប្រកបមុខរបរផ្គត់ផ្គង់គ្រួសារប៉ុណ្ណោះទេ តែវាត្រូវបានគម្រាមកំហែងដល់អាយុជីវិត ឬធ្លាក់ខ្លួនពិការសុខភាពផងដែរ ។
ព័ត៌មានជាតិ ថ្មីៗ
លោកជំទាវក៏បាន រំលឹកអំពីករណីយគ្រុនឈាម ដោយសង្កត់ធ្ងន់ថា មាតាបិតា អាណាព្យាបាលទាំងអស់ ត្រូវប្រុងប្រយ័ត្នជានិច្ច មិនថាឡើយចំពោះកូនចៅរបស់ខ្លួននោះទេ តែក៏ត្រូវប្រុងប្រយ័ត្នសម្រាប់ខ្លួនឯងផងដែរ ។ គ្រុនឈាម វាវិវត្តទៅដល់ការមិនប្រកាន់វ័យដើម្បីចម្លងមេរោគនោះឡើយ ហើយរដូវកាលនៃការចម្លងក៏វាត្រូវបានអូសបន្លាយផងដែរ ដូច្នេះគ្រប់ពេលវេលា និង គ្រប់វ័យត្រូវប្រុងប្រយ័ត្នចំពោះការចម្លងមេរោគគ្រុនឈាម ។
ក្នុងឱកាសនោះដែរ លោកជំទាវ ក៏បាននាំយកនូវអំណោយដោះម្បីចែកជូនដល់ គ្រួសារទាំង១៣ ដោយក្នុងមួយគ្រួសារទទួលបាន អង្ករ ២០គក្រ ; មី ០១កេះ ; ត្រីខ ០១ យួរ; ទឹកស៊ីអ៊ីវ ០១យួរ; ប្រេងឆា ០១គក្រ ; ស្កស ០១ គក្រ ; ទឹកដោះគោ ០៣ កំប៉ុង; អាវយឺត ០១ ; ភួយ ០១ ; និងថវិកា ១០០ ០០០ រៀល ៕
អត្ថបទ និង រូបថត៖ ងិន គឹមឡេង
កែសម្រួលអត្ថបទ ៖ អ៊ុន ណារាជ្យ
