នាយកដ្ឋានគ្រប់គ្រងគ្រោះមហន្តរាយមីយ៉ាន់ម៉ា កាលពីថ្ងៃទី២៥ ខែកក្កដា បានប្រកាសថា គ្រោះទឹកជំនន់បានវាយប្រហារតំបន់ និងរដ្ឋចំនួន ៨ នៅក្នុងប្រទេសមីយ៉ាន់ម៉ានាពេលថ្មីៗនេះ ដោយសារភ្លៀងធ្លាក់យ៉ាងខ្លាំងដោយបានបង្ខំឱ្យប្រជាជនចំនួន ៩,៤២០នាក់ត្រូវជម្លៀសចេញ។
ប្រធាននាយកដ្ឋាន លោក Daw Phyu Lei Lei Tun បាននិយាយថា ទឹកជំនន់នេះបានធ្វើឱ្យលិចផ្ទះសម្បែងអស់ជាច្រើន ហើយប្រតិបត្តិការជួយសង្គ្រោះកំពុងប្រតិបត្តិការនៅតំបន់ដែលកំពុងរងគ្រោះ។
បើតាមក្រសួងសង្គមកិច្ចមីយ៉ាន់ម៉ា បានឱ្យដឹងថា ការជួយសង្គ្រោះ និងការតាំងលំនៅថ្មីក៏កំពុងត្រូវបានសម្របសម្រួលជាមួយរដ្ឋាភិបាលក្នុងតំបន់ និងរដ្ឋ ដើម្បីចែកចាយស្រូវ និងជំនួយផ្សេងៗទៀតដល់ជនរងគ្រោះដោយសារគ្រោះទឹកជំនន់នេះ។
ក្នុងរដូវខ្យល់មូសុងដែលមានរយៈពេលចាប់ពីខែមិថុនា ដល់ខែកញ្ញា ធ្វើឱ្យមានគ្រោះទឹកជំនន់ភ្លាមៗ និងការបាក់ដីកើតឡើងជាញឹកញាប់នៅក្នុងប្រទេសមីយ៉ាន់ម៉ា ដោយសារមានភ្លៀងធ្លាក់ខ្លាំង និងខ្យល់បក់យ៉ាងខ្លាំង ជាពិសេសនៅតំបន់ភ្នំ និងតំបន់ទំនាប។
គួរបញ្ជាក់ផងដែរថា ប្រទេសមីយ៉ាន់ម៉ា ត្រូវបានគេចុះបញ្ជីក្នុងចំណោមប្រទេសដែលរងផលប៉ះពាល់ខ្លាំងដោយសារអាកាសធាតុធ្ងន់ធ្ងរ ដោយកាលពីឆ្នាំ ២០១៥ មានមនុស្សជាង ១០០នាក់ត្រូវបានស្លាប់ និងមនុស្សរាប់រយពាន់នាក់ផ្សេងទៀតត្រូវបានជម្លៀសចេញដោយសារតែគ្រោះទឹកជំនន់ដូចគ្នានៅពេលនេះផងដែរ៕
(ប្រភព VNA បកប្រែដោយលោក យា ចិន្តាខន្តី)
