សមត្តកិច្ចនគរបាលខេត្តសៀមរាប បានឲ្យដឹងថា បុរសម្នាក់ឈ្មោះ មេក ពន្លឺ មានឆ្នាំកំណើត១៩៨៩ មុខរបរគ្មាន មានទីលំនៅភូមិគោកបេង សង្កាត់គោកចក ក្រុងសៀមរាប ដែលជាប់សង្ស័យពាក់ព័ន្ធនឹងករណីរក្សាទុក ជួញដូរ ចាត់ចែង និងប្រើប្រាស់ ហើយមានសារធាតញៀនក្នុងខ្លួន រួមទាំងវត្ថុតាង ត្រូវបានអង្គភាពនគរ បាលគ្រឿងញៀនខេត្តសៀមរាប រៀបចំសុំណុំរឿងបញ្ជូនខ្លួនទៅសាលាដំបូងខេត្ត នៅថ្ងៃទី០៨ខែ សីហា ឆ្នាំ២០១៩នេះ ដើម្បីចាត់ការតាមនីតិវិធីនៃច្បាប់ ។
សមត្តកិច្ចនគរបាលខេត្តសៀមរាប បានឲ្យដឹងបន្ថែមថា ជនសង្ស័យនេះ ត្រូវបានសមត្តកិច្ចឃាត់ខ្លួន ក្នុងប្រតិបត្តិការមួយកាលពីវេលាម៉ោង២រសៀល នាថ្ងៃទី០៧ ខែសីហា ឆ្នាំ២០១៩នេះ ខណៈដែលកម្លាំងការិយាល័យនគរបាលប្រឆាំងគ្រឿងញៀនខេត្ត សហការជាមួយកម្លាំងអធិការដ្ឋានគរបាលស្រុកពួក ចុះបង្ក្រាបបទរក្សាទុក ជួញដូរ ចាត់ចែង និងប្រើប្រាស់ដោយខុសច្បាប់នូវសារធាតុ ញៀន នៅចំនុចលើដងផ្លូវស្ថិតក្នុងភូមិគោកបេងសង្កាត់គោកចក ក្រុង សៀមរាប ព្រមទាំងដកហូតវត្ថុតាងបានមួយចំនួន រួមមាន ៖ ម្សៅមេតំហ្វេតាមីចំនួន០៨កញ្ចប់ ស្មើនឹងទំងន់១៣.៣ ក្រាមទាំងសំបក , សម្ភារវេចខ្ចប់និងឧបករណ៍ប្រើប្រាស់គ្រឿងញៀនមួយចំនួន និងទូរស័ព្ទដៃចំនួន០២គ្រឿង ។
សូមបញ្ជាក់ថា ការបង្ក្រាបគ្រឿងញៀននៅឆមាសទី១ ឆ្នាំ២០១៩នេះ នៅទូទាំងប្រទេស សមត្ថកិច្ចទាំងនគរបាល និងកម្លាំងអាវុធហត្ថ បានឃាត់ខ្លួនជនសង្ស័យសរុប មានចំនួន៨.៩១១នាក់ ក្នុងនោះស្រីចំនួន៦៦៤នាក់ កើនឡើង១.៣០៤នាក់ ស្មើនឹង១៧ភាគរយ ក្នុងនោះជនសង្ស័យក្នុងករណីជួញដូរ រក្សាទុកមានចំនួន ៤.៧៩៥នាក់ ក្នុងនោះស្រីចំនួន៤២២នាក់ , ជនសង្ស័យក្នុងករណីប្រើប្រាស់គ្រឿងញៀនមានចំនួន ៤.១១២នាក់ ក្នុងនោះស្រីចំនួន២៤២នាក់ និង ជនសង្ស័យក្នុងករណីដាំដុះមានចំនួន៤នាក់ បានជនជាតិខ្មែរចំនួន ៨.៦៩៧នាក់ ក្នុងនោះស្រីចំនួន៦២៤នាក់ និង ជនបរទេសមានចំនួន១៨៧នាក់ ក្នុងនោះស្រីចំនួន៤០នាក់ ស្មើនឹង១៣ ជន ជាតិ គឺ៖ វៀតណាមចំនួន៩២នាក់ ក្នុងនោះស្រី៣០នាក់ , ចិនចំនួន ៦៣នាក់ ក្នុងនោះស្រីចំនួន៨នាក់ , កូរ៉េម្នាក់ , តៃវ៉ាន់ចំនួន ២ នាក់ , ឡាវចំនួន០៦នាក់ , ថៃចំនួន១១នាក់ ក្នុងនោះស្រីចំនួន០២នាក់ , នីហ្សេរីយ៉ា ចំនួន៣នាក់ , ឥណ្ឌូនេស៊ីម្នាក់ , រុស្សីចំនួន២នាក់ , រ៉ូម៉ានីចំនួន២នាក់ , ហូឡង់ម្នាក់ , ន័រវ៉េសចំនួន ២ នាក់ និង ជនជាតិ តួកគីចំនួនម្នាក់ និង ចាប់បានគ្រឿងញៀនចំនួនជាង៣៤១ គីឡូ ក្រាម កើនឡើងជាងទ្វេដង គឺជាង១៩៦គីឡូក្រាម ស្មើនឹង១៣៥ ភាគរយ បើប្រៀបធៀបនឹងឆមាសទី១ ឆ្នាំ២០១៨ ដែលមានចំនួន ១៤៥គីឡូក្រាម ០១៤ក្រាម ៕
អត្ថបទ និង រូបថត ៖ លោក ថាច់ ពិសុទ្ធ
កែសម្រួលអត្ថបទ ៖ លោក លីវ សាន្ត
