លោកវរសេនីយ៍ទោ ម៉េង សំណាង នាយរងការិយាល័យនគរបាលប្រឆាំងបទល្មើសសេដ្ឋកិច្ច នៃស្នងការដ្ឋានខេត្តសៀមរាបបាន ឲ្យដឹងថា ដោយអនុវត្តតាមបទបញ្ជារបស់ឯកឧត្តម ទៀ សីហា អភិបាលខេត្ត និងជាប្រធានគណៈបញ្ជាការឯកភាពរបស់រដ្ឋបាលខេត្តសៀមរាប កាលពីថ្ងៃទី០៧ ខែសីហា ឆ្នាំ២០១៩នេះ កម្លាំងសមត្ថកិច្ចចម្រុះរបស់ខេត្តសៀមរាប បានចុះប្រតិបត្តិការបង្ក្រាប បទល្មើសនេសាទ ក្នុងបឹងទន្លេសាទ ចាប់ពីចំណុចមាត់ពាមក្នុងកំពង់ឃ្លាំង ស្រុកសូទ្រនិគម រហូតដល់តំបន់មាត់ខ្លា ក្នុងស្រុកជីក្រែង ខេត្តសៀមរាប ដោយបានដកឧបករណ៍បរ ចំនួន៨០ឡុក , សាច់រ៉ាវប្រមាណ ៤.៥៥០ម៉ែត្រ , ចំរឹងប្រមាណ ៣.៦០០ដើម និងបានព្រលែងកូនត្រីប្រមាណ ១០០គីឡូក្រាម។
លោកវរសេនីយ៍ឯក ម៉េង សំណាង ឲ្យដឹងបន្ថែមថា ក្រុមការងារចម្រុះនេះ មានសមាសភាពចូលរួមពីមន្ត្រីនៃមន្ទីរទំនាក់ទំនងជាមួយរដ្ឋសភា ព្រឹទ្ធសភា និងអធិការកិច្ចខេត្ត , កម្លាំងនគរបាលប្រឆាំងបទល្មើសសេដ្ឋកិច្ច , នគរបាលស្រុក , នគរបាលប៉ុស្តិ៍នគរបាលរដ្ឋបាលឃុំ , មន្ត្រីបរិស្ថាន , មន្ត្រីជលផល , មន្ត្រីលេខាធិការដ្ឋាន នៃគណ:បញ្ជាការឯកភាពរដ្ឋបាលខេត្ត និងប្រជាការពារ ដោយបានប្រើប្រាស់កាណូតចំនួន៩គ្រឿង ។
គួររំលឹកថា ក្នុងឱកាសអញ្ជើញជួបសំណេះសំណាល សួរសុខទុក្ខ និងផ្តល់អំណោយមនុស្សធម៌ដោយផ្ទាល់ ជូនដល់ចាស់ជរាគ្មានទីពឹង ស្ត្រីមេម៉ាយកូនច្រើន កុមារកំព្រា ជនពិការ និងអ្នករស់នៅជាមួយមេរោគអេដស៍សរុបចំនួន១,២៧៥គ្រួសារ ដែលរស់នៅភូមិចំនួន១៣ ឃុំចំនួន១០ នៃស្រុកបរិបូរណ៌ ខេត្តកំពង់ឆ្នាំង កាលពីពេលថ្មីៗកន្លងទៅនេះ សម្ដេចកិត្ដិព្រឹទ្ធបណ្ឌិត ប៊ុន រ៉ានី ហ៊ុន សែន ប្រធានកាកបាទក្រហមកម្ពុជា បានអំពាវនាវដល់ប្រជាពលរដ្ឋទាំងអស់ កុំនេសាទត្រីក្នុងរដូវត្រីពង ឬរដូវបិទនេសាទ ដែលរាជរដ្ឋាភិបាលបានកំណត់ ព្រោះបងប្អូនដឹងហើយថា ត្រីមួយតើមានពងត្រីប៉ុន្មាន អីចឹងទេប្រសិនបើក្នុងរដូវត្រីពង យើងនាំគ្នាទៅលួចនេសាទខុសច្បាប់ យើងមិនត្រឹមតែបំផ្លាញផលប្រយោជន៍របស់បងប្អូនយើងទេ ត្រូវប្រឈមមុខជាមួយច្បាប់ ជាពិសេសសម្ភារឧបករណ៍រកត្រីរបស់យើង ក៏ត្រូវសមត្ថកិច្ចចាប់អូសយកទៅទៀត ដែលនេះធ្វើឱ្យយើងខាតបង់លើសដើម។
ព័ត៌មានជាតិ ថ្មីៗ
សូមបញ្ជាក់ថា កន្លងទៅថ្មីៗនេះ រដ្ឋបាលជលផល នៃក្រសួងកសិកម្ម រុក្ខាប្រមាញ់ និងនេសាទ ក៏បានចេញសេចក្តីជូនដំណឹងពីរដូវបិទនេសាទ នៅក្នុងដែននេសាទទឹកសាប ត្រូវបានកំណត់យកចាប់ពីថ្ងៃទី០១ ខែមិថុនា ដល់ ថ្ងៃទី៣០ ខែកញ្ញា ចំពោះដែននេសាទទឹកសាប ដែលស្ថិតនៅខាងជើងខ្សែស្របទន្លេចតុម្មុខ ដែលរួមមានខេត្តទាំងអស់ជំរុញបឹងទន្លេសាប និងបណ្តាខេត្តកំពង់ចាម ត្បូងឃ្មុំ ក្រចេះ រតនគិរី មណ្ឌលគិរី ព្រះវិហារ ប៉ៃលិន ឧត្តរមានជ័យ និងរាជធានីភ្នំពេញ និងខេត្តកណ្តាលផ្នែកខាងជើងចតុមុខ និង ចាប់ពីថ្ងៃទី០១ ខែកក្កដា ដល់ថ្ងៃទី៣១ ខែតុលា ចំពោះដែននេសាទទឹកសាប ដែលស្ថិតនៅខាងត្បូង ខ្សែស្របទន្លេចតុម្មុខ ដែលមានរាជធានីភ្នំពេញ ផ្នែកខាងត្បូងចតុម្មុខ ខេត្តកណ្តាល ព្រៃវែង តាកែវ កំពង់ស្ពឺ និងស្វាយរៀង៕
អត្ថបទ និង រូបថត ៖ លោក ជា ស្រស់
កែសម្រួលអត្ថបទ ៖ លោក លីវ សាន្ត
