នៅថ្ងៃទី១២ ខែសីហា ឆ្នាំ២០១៩ មន្ត្រីការិយាល័យស្ត្រីនិងសុខភាព ស្ត្រីនិងការអប់រំ នៃមន្ទីរកិច្ចការនារីខេត្ត សហការជាមួយរដ្ឋបាលសាលាស្រុកជីក្រែង បានរៀបចំធ្វើវេទិកាផ្សព្វផ្សាយស្តីពី សារៈសំខាន់សុខភាពបន្តពូជដល់ស្ត្រី និងយុវវ័យ ដល់អាជ្ញាធរមូលដ្ឋាន និងប្រជាពលរដ្ឋ នៅក្នុងឃុំពង្រលើ ក្នុងគោលបំណង៖ ដើម្បីឲ្យប្រជាពលរដ្ឋយល់ ដឹងពីសារៈសំខាន់ សុខភាពបន្តពូជ របស់ស្ត្រី និងយុវវ័យ ។
វេទិកានេះរៀបចំឡើង ក្រោមអធិបតីភាព លោក ខៀវ ប៊ុនឈឿន ជំទប់ទី១ ឃុំពង្រលើ លោកស្រី ណាន ម៉ៅ អនុប្រធានការិយាល័យស្ត្រី និងសុខភាព ស្ត្រី និងការអប់រំ មន្ទីរកិច្ចការនារីខេត្ត លោក គួន វីសេ នាយប៉ុស្តិ៍រដ្ឋបាលពង្រលើ ជំនួយការឃុំ មេភូមិ អនុភូមិ សមាជិកភូមិ និងបងប្អូនប្រជាពលរដ្ឋ ក្នុងឃុំពង្រលើ សរុបចំនួន ១៥៣នាក់ ក្នុងនោះស្រី ១២៦នាក់ នៅក្នុងឃុំពង្រលើ ស្រុកជីក្រែង ខេត្តសៀមរាប ។
ក្នុងឱកាស លោក ខៀវ ប៊ុនឈឿន ជំទប់ទី១ បានមានប្រសាសន៍ថា យុទ្ធសាស្ត្រវិស័យសុខាភិបាល នៅកម្ពុជា ត្រូវបានបង្កើតឡើង ដើម្បីធ្វើអោយប្រសើរឡើងនូវ ស្ថានភាពសុខាភាពមាតា និងទារក និងពង្រឹងសិទ្ធិទទួលបានសេវាថែទាំ សុខភាព ជាពិសេស ក្នុងចំណោមប្រជាជនក្រីក្រ និងប្រជាជនដែលងាយរងគ្រោះបំផុត តាមរយៈគោលនយោបាយមូលនិធិសមធម៌សុខាភិបាល និងសេវាគោលដៅល្អប្រសើរ សំរាប់ស្ត្រីដែលត្រូវការសេវាសុខភាពបន្តពូជ ។
លោកស្រី ណាន ម៉ៅ អនុប្រធានការិយាល័យស្ត្រី និងសុខភាព ស្ត្រីនិងការអប់រំ មន្ទីរកិច្ចការនារីខេត្ត បានលើកឡើងថា សុខភាពបន្តពូជ និងសុខភាពផ្លូវភេទ គឺមានសារៈសំខាន់ដល់យុវវ័យឲ្យយល់ដឹងពីសិទ្ធិបន្តពូជ និងសិទ្ធិ ផ្លូវភេទរបស់ពួកគេ។
លោកស្រីបន្តថា កាលពីឆ្នាំ២០១៣ រាជរដ្ឋាភិបាលកម្ពុជា បានធ្វើការប្តេជ្ញា ចិត្តខ្ពស់មួយទាក់ទងនឹងបញ្ហានេះ តាមរយៈការអនុម័តដោយក្រសួងអប់រំ យុវជន និងកីឡា ទៅលើកម្មវិធីសិក្សាដ៏ទូលំទូលាយមួយសម្រាប់យុវវ័យ នៅថ្នាក់បឋម និងមធ្យមសិក្សា និងយុវវ័យក្រៅសាលា។ កម្មវិធី សិក្សានេះ រួមបញ្ជូលព័ត៌មានស្តីអំពីសិទ្ធិ សុខភាពបន្តពូជ និងសុខភាពផ្លូវភេទ ដែលសមស្រប តាមអាយុ យេនឌ័រ អំពើហិង្សាទាក់ទងនឹងយេនឌ័រ គ្រឿងញៀន ការអប់រំ បំណិន ជីវិត មេរោគអេដស៍ និងជំងឺ អេដស៍ ។
លោកស្រី ណាន ម៉ៅ បានបន្ថែមថា ការរួមភេទ គឺជាផ្នែកមួយនៃធម្មជាតិក្នុងជីវិតរបស់មនុស្ស ការរួមភេទ ធ្វើឲ្យស្ត្រីអាចសម្តែងនូវសេចក្តីស្នេហា ចំពោះដៃគូរបស់នាង នាងអាចមានអារម្មណ៍សប្បាយរីករាយ និងនាងអាចមានផ្ទៃពោះប្រសិនបើនាងចង់បាន ។ ប៉ុន្តែការួមភេទក៏អាចបណ្តាលឲ្យមានផ្ទៃពោះដែលគេមិនចង់បានឲ្យមានផ្ទៃពោះដែលធ្វើឲ្យមានគ្រោះថ្នាក់ដល់ជីវិតម្តាយ និងអាចឆ្លងនូវជម្ងឺកាមរោគ និងអេដស៍ផងដែរ ហើយការរួមភេទប្រកបដោយសុវត្ថិភាព គឺជាការប្រព្រឹត្តសកម្មភាពរួមភេទមួយដែលបានផ្តល់នូវសុខភាពល្អ ហើយការពារខ្លួនអ្នកនិងដៃគូររបស់អ្នកជៀសផុតពីការចំលងកាមរោគ និងការមានកូនដែលមិនចង់បាន ។
អត្តបទនិងរូបភាព៖រដ្ឋបាលខេត្តសៀមរាប
កែសម្រួល ៖ អ៊ុន ណារាជ្យ
