នៅព្រឹកថ្ងៃទី១៣ ខែសីហា ឆ្នាំ២០១៩នេះ លោកវេជ្ជ.ក្រុស សារ៉ាត់ ប្រធានមន្ទីរសុខាភិបាលខេត្ត បានបើកវគ្គបណ្តុះបណ្តាល ស្តីពីការបំពេញប៉ាតូក្រាហ្វ នៅមជ្ឈមណ្ឌលបណ្តុះបណ្តាលវេជ្ជសាស្ត្រ កម្ពុជា-កូរ៉េ នៃមន្ទីរពេទ្យបង្អែកខេត្តសៀមរាប ដែលមាន ដែលមានសិក្ខាកាមចូលរួមចំនួន២៨នាក់ ហើយវគ្គបណ្តុះបណ្ដាលនៅពេលនេះ មានរយៈពេល ២ថ្ងៃ ពីថ្ងៃទី១៣ ដល់ថ្ងៃទី១៤ ខែសីហា ឆ្នាំ២០១៩ ។
លោកវេជ្ជ.ក្រុស សារ៉ាត់ បានឲ្យដឹងថា ការបើកវគ្គបន្តុះបណ្តាលនេះ គឺដើម្បីពង្រឹងសមត្ថភាពបុគ្គលិកទាក់ទងនឹងការបំពេញប៉ាតូក្រាហ្វនៅពេលស្ត្រីកំពុងឈឺពោះសម្រាល និងការដោះស្រាយបញ្ហាទាក់ទងនឹងឧបសគ្គនានាដែលនឹងជួបប្រទះ ដោយប្រើប្រាស់ជំនាញក្នុងការអនុវត្តការងារជាប្រចាំ ដើម្បីកាត់បន្ថយអត្រាឈឺ និងស្លាប់របស់មាតា និងទារក ។
លោកប្រធានមន្ទីរ បានឲ្យដឹងទៀតថា ក្រោយពេលបញ្ចប់វគ្គបណ្តុះបណ្តាលនេះ សិក្ខាកាមទាំងអស់នឹងអាចយល់ដឹងនូវចំណុចមួយចំនួនដូចជា៖ ១. កត់ត្រាដំណាក់កាលនៃការឈឺពោះសម្រាលលើប៉ាតូក្រាហ្វត្រឹមត្រូវតាមពេលវេលា, ២.កត់ត្រាត្រឹមត្រូវនូវប៉ារ៉ាម៉ែត្រទាំងអស់នៃដំណាក់កាលទី១ ទី២ ទី៣ និងទី៤ នៃការឈឺពោះសម្រាលលើប៉ាតូក្រាហ្វ ,៣.កំណត់ដឹងត្រឹមត្រូវនូវប៉ារ៉ាម៉ែត្រខុសពីធម្មតានៃការវិវត្តការឈឺពោះសម្រាល ស្ថានភាពម្ដាយ និងទារកក្នុងផ្ទៃ ឬទារកទើបកើត ក្នុងការគ្រប់គ្រងព្យាបាលដែលគ្របដណ្ដប់ក្នុងវគ្គ ស្ដីអំពីការតាមដានការឈឺពោះសម្រាល
និង ៤.យល់ដឹងអំពីសារៈសំខាន់នៃការបកស្រាយប៉ាតូក្រាហ្វក្នុងអំឡុងពេលឈឺពោះសម្រាល និងសម្រាល ដើម្បីកំណត់រកផលវិបាកនានានៃការឈឺពោះសម្រាលបានទាន់ពេលវេលា៕
អត្តបទនិងរូបភាព៖រដ្ឋបាលខេត្តសៀមរាប
កែសម្រួល ៖ អ៊ុន ណារាជ្យ
