តាមរយៈកម្មវិធីអប់រំបេតិកភណ្ឌកុមារតំបន់អង្គរ កាលពីថ្ងៃទី១៥ ខែសីហា ឆ្នាំ២០១៩នេះ កុមារសាលាបឋមសិក្សាស្រះស្រង់ប្រមាណ៧០នាក់ចុះទស្សនសិក្សាស្វែងយល់បន្ថែមអំពីចង្វាក់ផលិតកម្មចម្លាក់ឈើ ចម្លាក់ថ្មកែវ ថ្មភក់ ចម្លាក់ស្ពាន់ ចម្លាក់បិទមាស គំនូរលើសូត្រ លើក្តារ កុលាលភាជន៍ និងតម្បាញសូត្រដែលធ្វើដោយដៃនៅសិប្បកម្មអង្គរ ហៅកាត់ថា (Artisans d’Angkor) ដើម្បីឱ្យកុមារយល់ដឹងដំណើរការផលិតវត្ថុសិល្បៈ ដែលជាផ្នែកមួយបញ្ជ្រាបចំណេះដឹងឱ្យកុមារចូលរួមថែរក្សា និងលើកតម្លៃសម្បត្តិបេតិកភណ្ឌ។
កម្មវិធីនេះជាផ្នែកមួយក្នុងកម្មវិធីអប់រំបេតិកភណ្ឌសម្រាប់អប់រំដល់កុមារ ដែលបានផ្តល់ចំណេះដឹងជាមូលដ្ឋានអំពីបេតិកភណ្ឌ សិក្សាទ្រឹស្តីក្នុងថ្នាក់ និងចុះសិក្សាតាមរមណីយដ្ឋាននានា ដឹកនាំដោយក្រុមការងារអប់រំបេតិកភណ្ឌ សហការជាមួយអាជ្ញាធរជាតិអប្សរា និងអង្គការគាំពារកេរមរតក
លោកស្រី ដួង សុភាព នាយកគ្រប់គ្រងធនធានមនុស្សនៃក្រុមហ៊ុនចម្រុះសិប្បកម្មអង្គរ ឱ្យដឹងថា នេះជាលើកទីមួយហើយដែលកុមារបានមកធ្វើទស្សនកិច្ចសិក្សា ដែលកត្តានេះ ពិតជាសំខាន់ណាស់អាចបញ្ជ្រាបចំណេះដឹងពាក់ព័ន្ធនឹងសម្បត្តិបេតិភណ្ឌដល់កុមារ ដោយហេតុថាសិប្បកម្មអង្គរ ជាកន្លែងផលិតវត្ថុអនុស្សាវរីយ៍ ហើយវត្ថុសិល្បៈទាំងនោះដកស្រង់ប្រវត្តិសាស្ត្រ ប្រាង្គប្រាសាទនានា និងបរិស្ថាន ហើយលោកស្រីស្វាគមន៍ជានិច្ចគ្រប់ជាតិសាសន៍ ដែលចង់មកទស្សនា ជាពិសេសកូនខ្មែរ ដែលចង់ស្វែងយល់ពីសិប្បកម្មផលិតដោយដៃ និងដោយស្នាដៃកូនខ្មែរជំនាន់ថ្មី។
ព័ត៌មានជាតិ ថ្មីៗ
លោក ខៀវ ច័ន្ទ ជាគ្រូបណ្តុះបណ្តាលក្នុងកម្មវិធីអប់រំបេតិកភណ្ឌ លើកឡើងថា ឆ្នាំនេះមានអាទិភាពពិសេសដែលភាគីសិប្បកម្មអង្គរ និងជាសប្បុរសជនមួយក្នុងខេត្តសៀមរាបបានអនុញ្ញាតសិស្សមកទស្សនកិច្ចសិក្សា ហើយអ្វីដែលសំខាន់នោះធ្វើឱ្យកុមារមកឃើញទិដ្ឋភាពនៃរោងជាង ការដាប់ឆ្លាក់តាំងពីជំហានដំបូងរហូតដល់ចប់ទទួលបានផលិតផលសម្រេច ដូច្នេះកុមារពិតជាយល់តម្លៃរូបនីមួយៗ ថាមុននឹងបានរូបមួយៗ គេត្រូវចំណាយអ្វីខ្លះ កត្តានេះអាចធ្វើឱ្យកុមារចេះគិត កាត់បន្ថយការបំផ្លាញដោយចេតនា ឬអចេតនាពេលទៅទស្សនាប្រាសាទ និងចូលរួមថែរក្សាសម្បត្តិបេតិកភណ្ឌទាំងលើដី និងក្រោមដី៕
អត្ថបទ និង រូបថត ៖ លោក អ៊ិន សីហរិទ្ធ
កែសម្រួលអត្ថបទ ៖ លោក លីវ សាន្ត
