ក្រោមកិច្ចបញ្ជារបស់ឯកឧត្តមប្រធានគណៈបញ្ជាការឯកភាពរដ្ឋបាលខេត្ត នៅថ្ងៃទី២០ ខែសីហា ឆ្នាំ២០១៩នេះ គណៈកម្មការចម្រុះខេត្ត ដឹកនាំដោយលោក មាស ជូរ៉ានី ប្រធានមន្ទីររ៉ែ និង ថាមពលខេត្ត ដោយមានលោកនាយកទីចាត់ការអន្តរវិស័យសាលាខេត្ត នគរបាលការិយាល័យសេដ្ឋកិច្ចនៃស្នងការនគរបាល ខេត្ត ព្រមទាំងមន្ត្រីរដ្ឋបាលក្រុងសៀមរាប បានចុះធ្វើការពិនិត្យ នូវរាល់ទីតាំង ធ្វើអាជីវកម្មបញ្ចូលហ្គាស នៅក្នុងក្រុងសៀមរាប ខេត្តសៀមរាប ។
លោក មាស ជូរ៉ានី បានឲ្យដឹងថា ក្នុងឱកាសនោះ បានចុះផ្អាកនូវរាល់សកម្មភាពបញ្ចូល ផ្ទេរ និង ស្តុកទុកហ្គាសជាបណ្តោះអាសន្ននៅទីតាំងចំនួន០៣កន្លែង ក្នុងសង្កាត់ស្វាយដង្គំ ក្រុងសៀមរាប រួមមានទីតាំងនៅភូមិមណ្ឌល១ , ភូមិស្ទឹងថ្មី និងភូមិសាលាកន្សែង និង បានណែនាំដល់ម្ចាស់ទីតាំងប្រកបអាជីវកម្ម និងបញ្ចូលហ្គាសកំប៉ុងទាំង៣កន្លែងនេះ ឲ្យធ្វើការរើឧបករណ៍ផ្ទេរហ្គាសចេញពីទីតាំងលក់ ដែលទីតាំងទាំងនោះជាផ្ទះថ្មក្រោមឈើលើ , ផ្ទះល្វែង និងបន្ទប់បញ្ជូលហ្គាស ព្រមទាំងបានតម្រូវឲ្យម្ចាស់ទីតាំងអាជីវកម្ម ត្រូវធ្វើការដាក់ពាក្យស្នើសុំលិខិតអនុញ្ញាត និង ត្រូវគោរពទៅតាមលក្ខខណ្ឌ និង បទដ្ឋានបច្ចេកទេស អនុលោមតាមច្បាប់ជាធរមានទៀតផង ។
លោក មាស ជូរ៉ានី បានឲ្យដឹងទៀតថា កន្លងមកមន្ទីរតែងតែចុះធ្វើការអប់រំ ណែនាំ ចំពោះបងប្អូន ដែលប្រកបអាជីវកម្មបញ្ចូលហ្គាស និង ស្តុបហ្គាសឲ្យបានត្រឹមត្រូវទៅតាមបច្ចេកទេស ក្នុងការបង្ការកុំឲ្យមានកើនមាននូវហានីភ័យ ប៉ុន្តែហេតុការណ៍ដែលបានកើតឡើងនោះ គឺបណ្តាមកពីការធ្វេសប្រហែសរបស់ម្ចាស់អាជីវកម្ម ព្រមទាំងមិនគោរពទៅតាមការណែនាំរបស់មន្ត្រីជំនាញ ខណៈទាំងទីតាំងមួយចំនួន បានធ្វើការលួចលាក់ដោយពុំបានសុំច្បាប់អនុញ្ញាតប្រកបអាជីវកម្មរបស់ខ្លួនទៀតផង ។
ព័ត៌មានជាតិ ថ្មីៗ
សូមបញ្ជាក់ថា កាលពីថ្ងៃទី១៤ ខែសីហា ឆ្នាំ២០១៩កន្លងទៅនេះ មានហេតុការណ៍ផ្ទុះហ្គាសឆេះហាងបញ្ចូលហ្គាសរថយន្តមួយកន្លែង ស្ថិតនៅតាមផ្លូវលោកតាណឺយ ក្នុងភូមិបន្ទាយចាស់ សង្កាត់ស្លក្រាម ក្នុងក្រុងសៀមរាប ដែលជារបស់ឈ្មោះ ឈុក ឈុនលី ភេទប្រុស អាយុ៤៨ឆ្នាំ មុខរបរលក់ហ្គាស មានទីលំនៅបច្ចុប្បន្ន នៅភូមិគោកស្រុក ឃុំពួក ស្រុកពួក ខេត្តសៀមរាប បណ្ដាលឲ្យមានអ្នករងរបួសចំនួន១៣នាក់ ក្នុងនោះស្រីចំនួន០៣នាក់ ៕
អត្ថបទ និង រូបថត ៖ លោក ម៉ី សុខារិទ្ធ
កែសម្រួលអត្ថបទ ៖ លោក លីវ សាន្ត
