តាមការផ្សាយរបស់សារព័ត៌មានក្នុងស្រុក បានឲ្យដឹងថា ថ្មីៗនេះមហាជនបានធ្វើការចែករំលែកពេញបណ្តាញសង្គម នូវរូបភាពជាច្រើនសន្លឹករបស់ភរិយាអភិបាលខេត្តសៀមរាប គឺលោកជំទាវ ទាង អេង ទៀ សីហា ភ្ជាប់ជាមួយនឹងសារកោតសរសើរពេញៗមាត់ថា បានទាំងសម្រស់ និងមានគំនិតលើកស្ទួយស្នាដៃខ្មែរទៀតផង។
ការលើកឡើងបែបនេះ បន្ទាប់ពីមហាជនសង្កេតឃើញថា រាល់កម្មវិធីតូចធំនានា លោកជំទាវតែងតែប្រើប្រាស់កាបូបដៃធ្វើពីដើមកំប្លោក ឬហៅថាកាបូបចាក់ ដែលជាស្នាដៃកូនខ្មែរ មើលទៅស្អាតសាកសម និងថ្លៃថ្នូរតែម្តង។
ជាការកត់សម្គាល់ បច្ចុប្បន្ននេះ មហាជនសង្កេតឃើញថា មនុស្សភាគច្រើនចូលចិត្តចំណាយលុយរាប់រយពាន់ម៉ឺនដុល្លារ ទៅទិញរបស់របរប្រើប្រាស់ មិនថាសម្លៀកបំពាក់ ស្បែកជើង ឬកាបូបនោះទេ សុទ្ធតែថ្លៃៗពីបរទេស។ តែយ៉ាងណា ងាកមកភរិយាឯកឧត្ដម ទៀ សីហា អភិបាលខេត្តសៀមរាប វិញ ហាក់ផ្ទុយពីនារីទាំងឡាយ ដែលចូលចិត្តប្រើកាបូបប្រេនៗពីបរទេស ដោយងាកមកប្រើកាបូបស្នាដៃកូនខ្មែរ។
ព័ត៌មានជាតិ ថ្មីៗ
ជាមួយគ្នានោះ រាល់ការចូលរួមកម្មវិធីតូចធំរបស់លោកជំទាវគឺ មហាជនឃើញថា មានកាន់ជាប់នឹងដៃជានិច្ចនូវកាបូបស្នាដៃកូនខ្មែរ ដោយមើលទៅសុទ្ធតែស្អាត សាកសម និងថ្លៃថ្នូរផងដែរ។
ជាក់ស្តែង គណនីហ្វេសប៊ុកឈ្មោះ Rothkanha Play ក៏បានបង្ហោះសារកោតសរសើរលោកជំទាវផងដែរ មានខ្លឹមសារថា «គាត់ស្រស់ស្អាតណាស់ ស្អាតទាំងរូបរាង ស្អាតទាំងទឹកចិត្ត។ សំខាន់គាត់គាំទ្ររបស់ខ្មែរ។ សូមសរសើរដោយស្មោះ លើកស្ទួយស្មាដៃខ្មែរ»៕
អត្ថបទ និង រូបថត ៖ Fresh News
