កាលពីព្រឹកថ្ងៃទី២០ ខែសីហា ឆ្នាំ២០១៩នេះ អង្គភាពកាំកុងត្រូលសាខាខេត្តសៀមរាប សហការជាមួយមន្ទីរពាណិជ្ជកម្មខេត្ត និងអាជ្ញាធរពាក់ព័ន្ធ បានចុះផ្សព្វផ្សាយ អំពីសុវត្ថិភាពចំណីអាហារ ជូនដល់សិស្សានុសិស្ស និងបងប្អូនអាជីវករ ប្រមាណជាង៤០០នាក់ នៅសាលាបឋមសិក្សាកំពង់ភ្លុក ភូមិដីក្រហម ឃុំកំពង់ភ្លុក ស្រុកប្រាសាទបាគង ក្នុងគោលបំណងបង្កើនការយល់ដឹង និង ប្រុងប្រយ័ត្នខ្ពស់អំពីការប្រើប្រាស់ និង បរិភោគ នូវគ្រឿងឧបភោគបរិភោគទាំងឡាយណាដែលធ្វើឲ្យប៉ះពាល់ដល់សុខភាពរបស់ខ្លួន ។
លោក ព្រៅ ខេមរិទ្ធ ប្រធានកាំកុងត្រូលសាខាខេត្តសៀមរាប បានមានប្រសាសន៍ថា ដើម្បីជៀសវាងនូវការខាតបង់ទាំងថវិកា និងពេលវេលា យើងទាំងអស់គ្នាត្រូវប្រុងប្រយ័ត្ន និង ត្រូវចូលរួមទប់ស្កាត់ចំពោះម្ហូបអាហារណាដែលគ្មានគុណភាព និង ហួសកាលបរិច្ឆេទជាដើម ដែលជាក់ស្តែងដូចកាលពីវេលាម៉ោង០៧យប់ ថ្ងៃទី១៤ ខែសីហា ឆ្នាំ២០១៩កន្លងទៅនេះ មានករណីពុលនំប៉័ងរួចមកហើយ ដែលបណ្ដាលឲ្យក្មេងអាយុក្រោម១០ឆ្នាំចុះ ចំនួន ២៩នាក់ ក្នុងនោះមានស្រី២២នាក់ បានបញ្ជូនទៅសម្រាកព្យាបាលនៅមន្ទីពេទ្យនានាក្នុងខេត្តសៀមរាប ខណៈក្មេងៗទាំងនោះ បានទិញនំបុ័ងញ៉ាំពីអ្នកគ្រូ ដែលបានបង្ហាត់សិស្សនៅសាលារៀនបឋមសិក្សាកំពង់ភ្លុកឈ្មោះ ខ្ចៅ ម៉ារ៉ា អាយុ៤៥ឆ្នាំ រស់នៅភូមិគោកក្តុល ឃុំកំពង់ភ្លុក ដោយអ្នកគ្រូបានទទួលទិញនំប៉័ងពីម៉ូយអ្នកលក់ឈ្មោះ សុខ លីន ភេទស្រី រស់នៅភូមិកញ្ជរ ឃុំរលួស ស្រុកប្រាសាទបាគង ។
លោក ព្រៅ ខេមរិទ្ធ មានប្រសាសន៍បន្ថែមថា បើទោះបីជាករណីពុលនំប៉័ងនេះ មានអាការៈក្អួត និងរាករួស ដែលមិនប៉ះពាល់ដល់អាយុជីវិតក៏ពិតមែន ប៉ុន្តែវាពិតជាបានធ្វើឲ្យប៉ះពាល់ដល់សុខភាពរបស់យើង ហើយបើយើងនៅតែបណ្ដែតបណ្ដោយទៀត ទៅថ្ងៃខាងមុខវានឹងធ្វើឲ្យប៉ះពាល់ដល់អាយុជីវិតជាមិនខាន ដូច្នេះតាមរយៈនេះ សូមអំពាវនាវដល់អាជីវករទាំងអស់ សូមបញ្ឈប់ការលក់ដូរនូវម្ហូបអាហារណាដែលគ្មានគុណភាព និង ហួសកាលបរិច្ឆេទជាដើម និង សូមឲ្យបងប្អូនប្រជាពលរដ្ឋ រួមទាំងសិស្សានុសិស្ស មុននឹងទិញចំណីអាហារណាមកបរិភោគ ត្រូវគិតគូឲ្យបានច្បាស់លាស់ចំពោះទំនិញទាំងឡាយណា ដែលខូចគុណភាព និង គ្មានអនាម័យ ។
ព័ត៌មានជាតិ ថ្មីៗ
ក្នុងឱកាសនោះដែរ លោក ស្រី លី ក្រុមប្រឹក្សាឃុំកំពង់ភ្លុក បានណែនាំឲ្យបងប្អូនអាជីវករទាំងអស់ ធ្វើយ៉ាងណាកុំទិញយកគ្រឿងឧបភោគបរិភោគទាំងឡាយណាដែលពុំមានគុណភាពល្អ ដែលវាបានធ្វើឲ្យប៉ះពាល់ដល់សុខភាព និងអាយុជីវិតមនុស្ស ពិសេសមុននឹងទិញត្រូវពិនិត្យមើលឲ្យបានច្បាស់លាស់សិន ។
អត្ថបទ និង រូបថត ៖ លោក ស៊ាន សុផាត
កែសម្រួលអត្ថបទ ៖ លោក លីវ សាន្ត
