តាមខ្លឹមសារនៃលិខិតមួយច្បាប់របស់រដ្ឋបាលខេត្តសៀមរាប ចុះថ្ងៃទី១៦ ខែសីហា ឆ្នាំ២០១៩នេះ ហើយបានផ្ញើជូនឯកឧត្តមនាយឧត្តមសេនីយ៍សន្តិបណ្ឌិត នេត សាវឿន អគ្គស្នងការនគរបាលជាតិនិងជាប្រធានលេខាធិការដ្ឋាន នៃយុទ្ធនាការប្រយុទ្ធប្រឆាំងគ្រឿងញៀនខុសច្បាប់លើកទី៤ បានបង្ហាញនូវការការប្ដេជ្ញាចិត្តរបស់រដ្ឋបាលខេត្ត ក្នុងការបង្ក្រាបបទល្មើសគ្រឿងញៀននៅតាមក្លឹបកម្សាន្តកន្លែងសប្បាយដ្ឋាន និងកន្លែងអឺនធឺណិតក្នុងខេត្តសៀមរាប ឲ្យបានជោគជ័យ ដើម្បីសម្រេចតាមអនុសាសន៍ដ៏ខ្ពង់ខ្ពស់របស់សម្តេចក្រឡាហោម ស ខេង ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ និងជាប្រធានគណៈបញ្ជាការដឹកនាំយុខ្ញុំនាំការប្រយុទ្ធប្រឆាំងគ្រឿងញៀនខុសច្បាប់លើកទី៤ ក្នុងការលុបបំបាត់ការជួញដូរ ប្រើប្រាស់គ្រឿងញៀននៅតាមក្លឹបកម្សាន្តទីតាំងសប្បាយដ្ឋាន និងកន្លែងអឺនធឺណិតឲ្យបានទាំងស្រុងនាចុងឆ្នាំ២០១៩ ។
តាមខ្លឹមសារនៃលិខិតបានបញ្ជាក់ទៀតថា ដើម្បីសម្រេចបានតាមផែនការនេះ រដ្ឋបាលខេត្តសៀមរាប បានរៀបចំកិច្ចប្រជុំពង្រឹងកិច្ចសហប្រតិបត្តិការបង្ក្រាបបទល្មើសគ្រឿងញៀននៅតាមក្លឹបកម្សាន្តកន្លែងសប្បាយដ្ឋាន និងកន្លែងអឺនធឺណិតក្នុងខេត្តសៀមរាប ដឹកនាំដោយលោក ពិន ប្រាកដ អភិបាលរងខេត្ត តំណាងឯកឧត្ដម ទៀ សីហា អភិបាលខេត្ត ដោយមានការអញ្ជើញចូលរួមពីស្នងការដ្ឋាននគរបាលខេត្ត , បញ្ជាការដ្ឋានកងរាជអាវុធហត្ថខេត្ត , អង្គភាពនគរបាលទេសចរណ៍ , គណៈបញ្ជាការឯកភាពរដ្ឋបាលក្រុង-ស្រុកអធិការដ្ឋាននគរបាលក្រុង-ស្រុក , បញ្ជាការដ្ឋានកងរាជអាវុធហត្ថក្រុង , មន្ទីរ-អង្គភាពពាក់ព័ន្ធ ម្ចាស់ ឬតំណាងម្ចាស់ក្លឹបកម្សាន្ត និងទីតាំងសប្បាយដ្ឋាន និងអ្នកពាក់ព័ន្ធ សរុបចំនួន ១០០នាក់ ហើយអង្គប្រជុំបានឯកភាពគ្នាដាក់ចេញទិសដៅអាទិភាពចាប់ពីពេលនេះ រហូតដល់ដំណាច់ឆ្នាំ២០១៩ ។
រដ្ឋបាលខេត្តសៀមរាប បានដាក់ផែនការឲ្យស្នងការដ្ឋាននគរបាលខេត្ត បញ្ជាការដ្ឋានកងរាជអាវុធហត្ថខេត្ត គណៈបញ្ជាការឯកភាពរដ្ឋបាលក្រុង-ស្រុក និងសមត្ថកិច្ចពាក់ព័ន្ធ ត្រូវយកចិត្តទុកដាក់ដឹកនាំតម្រង់ទិស ដាក់ចេញផែនការចំណុចខ្ពស់ក្នុងការផ្សព្វផ្សាយអប់រំ វិធានការរដ្ឋបាល និងបង្ក្រាបគ្រឿងញៀនតាមក្លឹបកម្សាន្ត ទីតាំងសប្បាយដ្ឋាននិងកន្លែងអឺនធឺណិតផ្សេងៗ ជាពិសេសត្រូវបង្ក្រាប និងស្រាវជ្រាវរកមេក្លោងជួញដូរគ្រឿងញៀនឲ្យដល់ឫសគល់ ក្នុងនោះ៖ កងកម្លាំងមានសមត្ថកិច្ចអនុវត្តច្បាប់ទាំងអស់ ដែលជាសេនាធិការ ត្រូវខិតខំក្តាប់សភាពការណ៍ប្រមូលផ្ដុំព័ត៌មានជំនាញ និងផ្តួចផ្តើមនូវវិធានការតស៊ូបង្ការបង្ក្រាបទីតាំងល្បែងស៊ីសងគ្រប់ប្រភេទ បទល្មើសជួញដូរ ប្រើប្រាស់គ្រឿងញៀន និងត្រូវកំណត់សន្ទស្សន៍ទីតាំងគោលដៅដែលងាយអាចកើតឡើងនូវបទល្មើសជួញដូរ និងប្រើប្រាស់គ្រឿងញៀនឲ្យបានច្បាស់លាស់ ដោយលើកឡើងនូវផែនការប្រតិបត្តិការឲ្យបានម៉ត់ចត់ ដើម្បីបញ្ចប់ទាំងស្រុងនូវការជួញដូរប្រើប្រាស់គ្រឿងញៀននៅតាមទីតាំងទាំងនោះ ជាពិសេសមន្ត្រីសមត្ថកិច្ចគ្រប់ប្រភេទ និងគ្រប់លំដាប់ថ្នាក់ ត្រូវតែចៀសវាងឱ្យបានជាដាច់ខាតនូវកុំ៤ គឺ កុំពាក់ព័ន្ធ , កុំនៅពីក្រោយធ្វើជាបង្អែក , កុំបន្ទរបន្ថយ និងកុំអន្តរាគមន៍ ក្នុងករណីបទល្មើសល្បែងស៊ីសង និងគ្រឿងញៀន ។
តាមខ្លឹមសារនៃលិខិតដដែលបានឲ្យស្នងការដ្ឋាននគរបាលខេត្ត , បញ្ជាការដ្ឋានកងរាជអាវុធហត្ថខេត្ត , មន្ទីរទេសចរណ៍ខេត្ត , គណៈបញ្ជាការឯកភាពរដ្ឋបាលក្រុង-ស្រុក និងសមត្ថកិច្ចពាក់ព័ន្ធ ត្រូវធ្វើបច្ចុប្បន្នភាព និងកំណត់គោលដៅកន្លែងអឺនធឺណិត ក្លឹបកម្សាន្ត និងទីតាំងសប្បាយដ្ឋាន ដែលមានសញ្ញាណជួញដូរ ប្រើប្រាស់គ្រឿងញៀន និងក្តាប់ឲ្យបាននូវគោលដៅដែលងាយរងគ្រោះដោយសារគ្រឿងញៀន និងចាត់វិធានការរដ្ឋបាលនិងវិធានការច្បាប់ចំពោះទីតាំងណាដែលមិនចូលរួមសហការ និង ចាត់វិធានការបិទ ឬដកហូតលិខិតអនុញ្ញាតធ្វើអាជីវកម្មជាៈបណ្តោះអាសន្ន ឬជាស្ថាពរ ចំពោះទីតាំងអាជីវកម្មដ្ឋានណាដែលពិនិត្យឃើញថា មានបង្កប់ល្បែងស៊ីសងសកម្មភាពជួញដូរ និងប្រើប្រាស់គ្រឿងញៀន។
តាមខ្លឹមសារនៃលិខិតបានបញ្ជាក់បន្ថែមថា ម្ចាស់ក្លឹបកម្សាន្ត និងទីតាំងសប្បាយដ្ឋាន ដែលងាយនឹងទទួលរងនូវការពាក់ព័ន្ធនឹងបទល្មើសគ្រឿងញៀន ដាច់ខាតមិនត្រូវពាក់ព័ន្ធនឹងគ្រឿងញៀន មិនត្រូវយកអាជីវកម្មស្របច្បាប់ឆ្លៀតឱកាសរកចំណេញពីការប្រព្រឹត្តបទល្មើសគ្រឿងញៀន និងបង្កប់ល្បែងស៊ីសងគ្រប់ប្រភេទ ត្រូវតែគោរពច្បាប់ លិខិតបទដ្ឋានគតិយុត្តនានាជាធរមាន និងការណែនាំរបស់អាជ្ញាធរមានសមត្ថកិច្ច ហើយចូលរួមទប់ស្កាត់បទល្មើសគ្រឿងញៀន ដោយត្រូវរាយការណ៍ ឬសុំកិច្ចអន្តរាគមន៍ពីសមត្ថកិច្ចពេលសង្ស័យថាមានបទល្មើសគ្រឿងញៀនដោយមិនលាក់បាំង និងសូមជួយធ្វើការអប់រំណែនាំឱ្យអ្នកក្រោមឱវាទរបស់ខ្លួន បានយល់ដឹងពីផលប៉ះពាល់ និងគ្រោះថ្នាក់នៃគ្រឿងញៀន និងអនុវត្តតាមកិច្ចសន្យាដែលបានដាក់ពាក្យស្នើសុំប្រកបអាជីវកម្ម ជាពិសេសការអនុវត្តតាមកិច្ចសន្យាចូលរួមផ្តល់កិច្ចសហការជាមួយអាជ្ញាធរមានសមត្ថកិច្ចក្នុងការបង្ការ បង្ក្រាបគ្រឿងញៀន ព្រោះថាការប្រយុទ្ធប្រឆាំងគ្រឿងញៀននៅក្នុងទីតាំងអាជីវកម្មរបស់ខ្លួនបានល្អ គឺជាការការពារផលប្រយោជន៍ខ្លួនឯង ៕
