ដោយអនុវត្តតាមបទបញ្ជារបស់ ឯកឧត្តម ទៀ សីហា អភិបាលនៃគណៈអភិបាលខេត្ត និងជាប្រធានគណៈបញ្ជាការឯកភាពរដ្ឋបាលខេត្ត នៅថ្ងៃពុធ ទី២១ ខែសីហា ឆ្នាំ២០១៩នេះ កម្លាំងចម្រុះសរុប ៣១នាក់ ដែលរួមមាន កម្លាំងនគរបាលមកពីផែននគរបាលប្រឆាំងបទល្មើស សេដ្ឋកិច្ច ៩នាក់ និងការចូលរួមពីមន្ត្រីជំនាញជលផល ១១នាក់ បរិស្ថាន ៤នាក់ នគរបាលប៉ុស្តិ៍ឃុំកំពង់ឃ្លាំងចំនួន ២នាក់ និងប្រជាការពារ ៥នាក់ ដោយប្រើប្រាស់មធ្យោបាយការណូត ៦គ្រឿង ដោយបានចុះបង្គ្រាប់ទីតាំងចំនួន ២ គឺទី១ នៅចំនុចភូមិសាស្ត្រ ឃុំកំពង់ឃ្លាំង ស្រុកសូទ្រនិគម និងទី ២នៅចំនុច ឃុំកំពង់ភ្លុក ស្រុកប្រាសាទបាគង ខេត្តសៀមរាប ។
ក្នុងប្រតិបត្តិការណ៍នេះដែរ កម្លាំងចម្រុះបានដកហូតឧបករណ៍ប្រើប្រាស់ខុសច្បាប់មួយចំនួនមាន ក្បាលបរចំនួន ៥២គ្រឿង របាំងសាច់រ៉ាវប្រវែង ៧,០៥០ម៉ែត្រ ចំរឹងឈើចំនួន ៣,១៧០ដើម ដោយបានកាប់កម្ទេចចោលនៅនឹងកន្លែង និងបានព្រលែងត្រីចម្រុះចំនួនជាង ១២០គីឡូក្រាមចូលទៅក្នុងទឺកវិញផងដែរ ។
ក្នុងនោះដែរ រដ្ឋបាលខេត្ត ក៏សូមថ្លែងអំណរគុណចំពោះកម្លាំងសមត្ថកិច្ចចម្រុះ បានបំពេញបេសកកម្មយ៉ាងសស្រាក់សស្រាំ ក្នុងការបង្ក្រាបបទល្មើសតាមសត្ថកិច្ចជំនាញរបស់ខ្លួន ។ ជាមួយគ្នានេះ រដ្ឋបាលខេត្ត សូមស្នើយ៉ាងទទូចដល់បងប្អូនប្រជាពលរដ្ឋទាំងអស់ សូមបញ្ឈប់សកម្មភាពល្មើសច្បាប់ជាបន្ទាន់ ហើយកម្លាំងចម្រុះនឹងបន្តចុះបង្ក្រាបបន្តទៀតតាមភូមិសាស្ត្រនានាបន្តទៀត ដោយមិនទុកអោយបទល្មើសកើតឡើងឡើយ ៕
អត្តបទនិងរូបភាព៖រដ្ឋបាលខេត្តសៀមរាប
កែសម្រួល ៖ អ៊ុន ណារាជ្យ
