លោក ហៀន សុខល់ ប្រធានស្តីទីសាខាពន្ធដារខេត្តសៀមរាប បានមានប្រសាសន៍ថា ក្នុងក្របខ័ណ្ឌគោលនយោបាយរាជរដ្ឋាភិបាល ក៏ដូចជាអគ្គនាយកដ្ឋានពន្ធដារ មិនមានគោលការណ៍បង្កើតប្រភេទពន្ធថ្មី ឬដំឡើងអត្រាពន្ធបន្ថែម ដែលជាបន្ទុកដល់ប្រជាពលរដ្ឋ និងធុរជន ក្នុងគោលដៅបង្កើនចំណូលថវិកាជាតិនោះទេ ប៉ុន្តែអគ្គនាយកដ្ឋានពន្ធដារ បានកំពុងខិតខំផ្តោតការយកចិត្តទុកដាក់ខ្ពស់ លើការពង្រឹងការអនុវត្តច្បាប់ និងបទប្បញ្ញត្តិជាធរមាន តាមរយៈការអនុវត្តវិធានការយ៉ាងម៉ឺងម៉ាត់ ទាំងវិធានការច្បាប់ និងវិធានការរដ្ឋបាល ចំពោះការគេចវេះពន្ធ ការលួចបន្លំពន្ធតាមគ្រប់រូបភាព ដើម្បីធានាបាននូវបរិកាសធុរកិច្ច និងការប្រកួតប្រជែងដោយស្មើភាពគ្នាចំពោះគ្រប់ធុរជន ក្នុងគោលដៅប្រមូលចំណូលប្រកបដោយតម្លាភាព ប្រសិទ្ធភាព ស័ក្តិសិទ្ធិភាព និងសមធម៌ ព្រមទាំងបង្កឲ្យមានការអនុវត្តច្បាប់ ស្របតាមគោលនយោបាយកែទម្រង់ស៊ីជម្រៅដ៏មុតស្រួចរបស់រាជរដ្ឋាភិបាល ។
លោក ហៀន សុខល់ មានប្រសាសន៍បន្ថែមថា សម្រាប់ផែនការអនុវត្តបន្ត អគ្គនាយកដ្ឋានពន្ធដារ ក៏បាននឹងកំពុងអនុវត្តតាមយុទ្ធសាស្ត្រកៀរគរចំណូលឆ្នាំ២០១៩ – ២០២៣ ដោយផ្តោតលើទំនើបភាវូបនីយកម្ម លើកិច្ចសម្រួលពាណិជ្ជកម្ម ការកែលម្អ និងពង្រឹងអភិបាលកិច្ច ព្រមទាំងការគ្រប់គ្រងបែបយុទ្ធសាស្ត្រ សំដៅធានាសង្គតិភាពជាមួយនឹងគោលនយោបាយអភិវឌ្ឍន៍ជាតិ ជំរុញនិងតម្រង់ការវិនិយោគ និងប្រមូលចំណូពន្ធឲ្យអស់សក្តានុពល ឲ្យស្របទៅនឹងការផ្លាស់ប្តូរស្ថានភាពសេដ្ឋកិច្ច សង្គមកម្ពុជា ដូច្នេះសូមលើកទឹកចិត្តដល់អ្នកជាប់ពន្ធតូច និងមធ្យមក្នុងវិស័យអាទិភាព ដូចជា វិស័យផលិតផលកសិកម្ម ឬកសិឧស្សាហកម្ម ការកែឆ្នៃម្ហូបអាហារជាដើម គឺត្រូវមកបង់ពន្ធឲ្យបានត្រឹមត្រូវ និងទាន់ពេលវេលា ហើយលោកក៏មិនចង់ឲ្យសហគ្រាណាមួយត្រូវបានពិន័យនោះដែរ ។
លោក ហៀន សុខល់ មានប្រសាសន៍បែបនេះ ក្នុងឱកាសបិទសិក្ខាសាលាផ្សព្វផ្សាយស្ពីពីការណែនាំអនុវត្តបទប្បញ្ញត្តិស្តីពី ពន្ធលើប្រតិបត្តិការប្រេងកាត , ការណែនាំអនុវត្តបទប្បញ្ញត្តិស្តីពី ពន្ធលើប្រាក់ចំណូលសម្រាប់សហគ្រាសធារារ៉ាប់រង , វិធាន និងនីតិវិធីនៃការអនុវត្តកិច្ចព្រមព្រៀងស្តីពី ការចៀសវាងការយកពន្ធត្រួតគ្នា និងការបង្ការការកិបកេងបន្លំពន្ធពាក់ព័ន្ធ នឹងពន្ធលើប្រាក់ចំណូល នៅព្រឹកថ្ងៃទី២៨ ខែសីហា ឆ្នាំ២០១៩នេះ ។
លោក ហៀន សុខល់ បានបញ្ជាក់ទៀតថា នៅក្នុងរយៈពេល៥ខែ ដើមឆ្នាំ២០១៩នេះ សាខាពន្ធដាខេត្តសៀមរាបប្រមូលចំណូលជូនរដ្ឋបានចំនួន៧៤.១៨៨លានរៀល ស្មើនឹង៥៥ភាគរយនៃផែនការ ហើយរំពឹងថា នៅក្នុងឆ្នាំ២០១៩នេះ នឹងប្រមូលចំណូលជូនរដ្ឋបានលើសផែនការដែលបានគ្រោងទុក ខណៈបច្ចុប្បន្ននេះ សាខាពន្ធដាខេត្តសៀមរាប បានប្រើប្រាស់ប្រព័ន្ធយន្តការបង្វិលសង និង ការប្រើប្រាស់ឥណទានអាករលើតម្លៃបន្ថែម តាមប្រព័ន្ធអនឡាញ ៕
អត្ថបទ និង រូបថត : លោក អ៊ិន សីហរិទ្ធ
កែសម្រួលអត្ថបទ : លោក លីវ សាន្ត
