នៅព្រឹកថ្ងៃទី២៤ខែកញ្ញាឆ្នាំ២០១៨នេះ សប្បុរសជននៅខេត្តសៀមរាប តាមរយៈ CEO Master Club បានផ្តល់កង់ចំនួន៧៧គ្រឿង ជូនប្រជាពលរដ្ឋក្រីក្រ និងសមាជិកសមាគមសហគមន៍ទេសចរណ៍ វប្បធម៌ធម្មជាតិបឹងពារាំង ក្នុងសង្កាត់ជ្រាវ ក្រុងសៀមរាប ខេត្តសៀមរាប ។
លោក គង់ មង្គល ប្រធានសមាគមសហគមន៍ទេសចរណ៍ វប្បធម៌ធម្មជាតិបឹងពារាំង បានឱ្យដឹងថា នៅក្នុងសហគមន៍របស់លោកមានសមាជិកជាង១០០នាក់ ក្នុងនោះមានមួយចំនួន គ្រួសាររបស់ពួកគាត់នៅមានជីវភាពខ្វះខាត ប៉ុន្តែពួកគាត់បានលះបង់កម្លាំងកាយចិត្តក្នុងការចូលរួមការពារធនធានធម្មជាតិ នៅក្នុងសង្កាត់ជ្រាវនេះបានយ៉ាងល្អប្រសើរហើយការលះបង់របស់ប្រជាសហគមន៍នេះ គឺពួកគាត់ពុំបានទទួលអ្វីមកវិញទេ ដូច្នេះដើម្បីជាការលើកទឹកចិត្តដល់ពួកគាត់ក្នុងនាមលោកជាប្រធានសមាគមន៍ បានអំពាវនាវឱ្យសប្បុរស់ជនជួយដល់ពួកគាត់វិញ ជាក់ស្តែងនៅថ្ងៃនេះសប្បុរស់ជននៅក្នុងខេត្តសៀមរាបតាមតាមរយៈ CEO Master Club បានផ្តល់កង់ចំនួន៧៧គ្រឿងសម្រាប់យកមកផ្តល់ជូនពួកគាត់ ដែលនេះគឺជាលើកទី២ហើយដែលសមាជិកសមាគមន៍របស់លោកទទួលបានការឧបត្ថម្ភពីសប្បុរស់ជន។
លោក អោម សេងបូរ៉ា ស្ថាបនិករបស់ CEO Master Club បានថ្លែងថា មូលហេតុដែលលោករៃអង្គាសថវិកាពីសប្បុរសជននានាយកមកទិញកង់សម្រាប់ផ្តល់ជូនដល់សមាជិកសមាគមសហគមន៍ទេសចរណ៍ វប្បធម៌ធម្មជាតិបឹងពារាំងនេះ ដោយសារតែកង់ជាមធ្យោបាយ ជាស្ពានមួយដ៏មានសារៈសំខាន់សម្រាប់គ្រួសារដែលមានជីវភាពខ្វះខាត ជាពិសេសសម្រាប់កុមារឆ្លងទៅរកភាពជោគជ័យ និងចេញឱ្យផុតពីភាពក្រីក្រ ប៉ុន្តែដើម្បីឱ្យគ្រួសាររបស់ពួកគាត់ចេញផុតពីគ្រួសារដែលមានជីវភាពខ្វះខាត កត្តាចាំបាច់ គឺត្រូវជួយឱ្យកូនៗរបស់ពួកគាត់មានចំណេះដឹង ឱ្យកូនៗរបស់ពួកគាត់ទៅសិក្សាបានទៀងទាត់ គឺត្រូវបានមធ្យោបាយធ្វើដំណើរ និងសម្ភារសិក្សា និងសន្យាថា នឹងបន្តជួយដល់សហគមន៍នេះជាបន្តបន្ទាប់តាមរយៈសកម្មភាពផ្សេងៗ ។
ក្នុងឱកាសនោះ លោក ក្អោប រ៉ន ចៅសង្កាត់ជ្រាវ បានថ្លែងអំណរគុណចំពោះសប្បុរសជននានាដែលបានជួយដល់សមាជិកសមាគមសហគមន៍ទេសចរណ៍វប្បធម៌ធម្មជាតិបឹងពារាំងដែលមានជីវភាពខ្វះខាត ថ្វីត្បិតគ្រួសារពួកគេនៅមានជីវភាពខ្វះខាត ប៉ុន្តែពួកគាត់មិនមានការរុញរាទេ គឺគេបានលះបង់កម្លាំងកាយចិត្តក្នុងការចូលរួមការពារធនធានធម្មជាតិនៅក្នុងសង្កាត់ជ្រាវនេះបានយ៉ាងល្អប្រសើរ ដូច្នេះតាមរយៈនេះ សូមអំពាវនាវឱ្យមានការជួយគាំទ្រនិងចូលរួមការពារធនធានធម្មជាតិនៅក្នុងសង្កាត់ជ្រាវនេះ ព្រោះវាមានសកត្តានុពលទេសចរណ៍ធម្មជាតិដ៍ល្អសម្រាប់ទាក់ទាញភ្ញៀវទេសចរឱ្យមកកម្សាន្តតំបន់នេះ បានផ្តល់ប្រាក់ចំណូលដល់ដៃប្រជាពលរដ្ឋនៅតំបន់នេះ ធ្វើឱ្យជីវភាពពួកគាត់ធូរធារ ៕
អត្ថបទ និង រូបថត ៖ លោក ជា ស្រស់
កែសម្រួលអត្ថបទ ៖ លោក លីវ សាន្ត
#មន្ទីរព័ត៌មានខេត្តសៀមរាប
