ក្នុងឱកាសជួបសំណេះសំណាលជាមួយសមាជិកក្រុមប្រឹក្សាឃុំសង្កាត់ក្នុងខេត្តសៀមរាប កាលពីព្រឹកថ្ងៃទី២៥ ខែកញ្ញា ឆ្នាំ២០១៨នេះ ឯកឧត្តម ប៉ុល លឹម ប្រធានក្រុមសមាជិកព្រឹទ្ធសភាប្រចាំភូមិភាគទី៤ បានជំរុញឲ្យសមាជិកក្រុមប្រឹក្សាឃុំសង្កាត់ទាំងអស់ ត្រូវលើកកម្ពស់បន្ថែម ការពង្រឹងពង្រីកប្រជាធិប្រជាធិបតេយ្យ និងយកចិត្តទុកដាក់បំផុត អនុវត្តន៍យុទ្ធសាស្ត្រកាត់បន្ថយភាពក្រីក្រនៅថ្នាក់ក្រោមជាតិ ឲ្យមានប្រសិទ្ធភាព ប្រសិទ្ធផល និង ការសន្សំសំចៃ ។
ឯកឧត្តម ប៉ុល លឹម គូបានបញ្ជាក់បន្ថែមថា ការជួបជុំគ្នានៅលើវេទិកានេះ ក៏ជាការបំពេញភារកិច្ចការងាររបស់ក្រុមសមាជិកព្រឹទ្ធសភាប្រចាំភូមិភាគផងដែរ ដែលមានតួនាទីជាតំណាងការពារសិទ្ធិការពារផលប្រយោជន៍ក្រុមប្រឹក្សាឃុំសង្កាត់ និង ប្រជាពលរដ្ឋ ព្រមជាមួយនិងការជួយការងារសង្គមនិងអភិវឌ្ឍមូលដ្ឋានក្នុងភូមិភាគទី៤ ដូច្នេះពិធីសំណេះសំណាលនេះ គឺជាវេទិកាមួយ ដើម្បីឲ្យសមាជិកនៃក្រុមសមាជិកព្រឹទ្ធសភា ស្តាប់មតិយោបល់ ទទួលយកនូវសេចក្តីរាយការណ៍ អំពីបញ្ហាប្រឈម សំណូមពរនានា របស់ក្រុមប្រឹក្សាឃុំ-សង្កាត់ ហើយអ្វីដែលជាលទ្ធផលលេចចេញពីវេទិកានេះ នឹងត្រូវលើកជូនគណៈកម្មាធិការអចិន្ត្រៃយ៍ព្រឹទ្ធសភា និង ព្រឹទ្ធសភាផងដែរ ។
លោកជំទាវ ស៊ឹង ស៊ីយុត សមាជិកនៃក្រុមសមាជិកព្រឹទ្ធសភាប្រចាំភូមិភាគទី៤ បានបញ្ជាក់ថា ព្រឹទ្ធសភាជាចំណែកមួយនៃអង្គការនីតិប្បញ្ញត្តិរបស់ជាតិ ដែលបានរួមចំណែក្នុងដំណើការប្រជាធិបតេយ្យភាវូបនីយកម្មសង្គម ការកសាងនីតិរដ្ឋ រួមវិភាគទានក្នុងដំណើការ ស្ថេរភាពវូបនីយកម្មចីរភាពនយោបាយរបស់ជាតិ ដែលជាស្នូលនៃការពង្រឹងនយោបាយបង្រួបបង្រួមជាតិ ផ្សះផ្សាជាតិ និងការអភិវឌ្ឍ ហើយព្រឹទ្ធសភា មានមុខងារសំខាន់ៗចំនួន៣ គឺមុខងារនីតិកម្ម មុខងារតាមដានការអនុវត្តច្បាប់ និង មុខងារតំណែង ៕
អត្ថបទ និង រូបថត ៖ លោក ងិន គឹមឡេង
កែសម្រួលអត្ថបទ ៖ លោក លីវ សាន្ត
#មន្ទីរព័ត៌មានខេត្តសៀមរាប
