លោក លាង សុវណ្ណារិន នាយកប្រតិបត្តិ ជាតំណាងក្រុមហ៊ុន Yinkok Food Corp បានមានប្រសាសន៍ថា បច្ចុប្បន្ននេះ ប្រទេសកម្ពុជា ក្រោមការដឹកនាំរបស់សម្តេចតេជោនាយករដ្ឋមន្ត្រី ហ៊ុន សែន បានធ្វើឲ្យប្រទេសជាតិទាំងមូលមានសុខសន្តិភាពពេញបរិបូរណ៍ និង មានការអភិវឌ្ឍលើគ្រប់វិស័យយ៉ាងឆាប់រហ័ស ជាពិសេស ក្រោមយុទ្ឋសាស្ត្រ និងកម្មវិធីកំណែទម្រង់ស៊ីជម្រៅលើគ្រប់វិស័យ ធានាបាននូវចិរភាពនៃការអភិវឌ្ឍប្រកបដោយសុខសន្តិភាពពេញលេញ ស្មើមុខស្មើមាត់ដូចបណ្តាប្រទេសនៅលើសកលលោក ។
លោក លាង សុវណ្ណារិន មានប្រសាសន៍ទៀតថា ខេត្តសៀមរាប ក៏មានការរីកចម្រើនខ្លាំងណាស់ដែរ ដែលមួយផ្នែក វាអាស្រ័យដោយមានការចូលរួមសហការពីវិស័យឯកជនយ៉ាងច្រើន ដោយផ្អែកលើសក្តានុពលវិស័យទេសចរណ៍ រួមទាំងការចូលមកវិនិយោគ ពីវិនិយោគិនជាតិ និងអន្តរជាតិ ដូច្នេះការបើកសម្ពោធហាងលក់នំដូមីណូភីហ្សា នៅខេត្តសៀមរាបនាពេលនេះ នឹងសង្ឃឹមថា មុខរបរនេះនឹងមានការរីកចម្រើន ព្រោះអ្វីដែលយើងជឿជាក់ និង ទុកចិត្តបំផុតនោះ ដោយសារប្រទេសជាតិមានសុខសន្តិភាព និង មានការអភិវឌ្ឍ ដើម្បីឆ្លើយតបទៅនឹងតម្រូវការ និងការគាំទ្ររបស់អតិថិជន ។
លោក លាង សុវណ្ណារិនមានប្រសាសន៍បន្ថែមទៀតថា នេះជាសាខាទី១០ហើយ ដែលជាហាងនំដូមីណូភីហ្សានៅក្នុងប្រទេសកម្ពុជា ហើយដូមីណូភីហ្សានេះ គឺជាក្រុមហ៊ុនភីហ្សារបស់អាមេរិកដ៏ធំបំផុត និងល្បីល្បាញនៅលើពិភពលោក ដែលមានសាខានៅតាមបណ្ដាប្រទេសជាច្រើនទាំងនៅអាស៊ីនិងនៅអឺរ៉ុប ហើយដូមីណូភីហ្សានេះ បាននាំមកក្នុងប្រទេសកម្ពុជាដោយក្រុមហ៊ុន Yinkok Food Corp ក្នុងឆ្នាំ២០១៥ ហើយក៏ជាហាងភីហ្សាប្រកបដោយអនាម័យ និងស្ដង់ដាខ្ពស់ផងដែរ ៕
អត្ថបទ និង រូបថត ៖ លោក ស៊ាន សុផាត
កែសម្រួលអត្ថបទ ៖ លោក លីវ សាន្ត
#មន្ទីរព័ត៌មានខេត្តសៀមរាប
