នៅព្រឹកថ្ងៃទី២៤ កញ្ញា ឆ្នាំ២០១៨ម្សិលមិញនេះ ឯកឧត្តមបណ្ឌិត ឃឹម ប៊ុនសុង អភិបាលខេត្តសៀមរាប បានប្រគល់វិញ្ញាបនបត្រសម្គាល់ម្ចាស់អចលនៈវត្ថុ ចំនួន១.៣០៩ប័ណ្ណ ជូនបងប្អូនប្រជាពលរដ្ឋនៅភូមិបន្ទាយចាស់ សង្កាត់ស្លក្រាម ក្រុងសៀមរាប ដោយផ្អែកតាមលទ្ធផលនៃការចុះបញ្ជីដីធ្លីមានលក្ខណៈជាប្រព័ន្ធនៅភូមិបន្ទាយចាស់មានចំនួន១.៥៧២ក្បាលដី ដែលម្ចាស់ដី និង អ្នកកាន់កាប់ដីទាំងអស់នេះ បានបំពេញគ្រប់លក្ខខណ្ឌ និង បទដ្ឋានបច្ចេកទេសតាមច្បាប់ ដើម្បីយកទៅប្រើបាស់ទៅតាមតម្រូវការ ក្នុងការទ្រទ្រង់ជីវភាពក្នុងក្រុមគ្រួសាររបស់ខ្លួន ខណៈដែលក្បាលដីមួយចំនួនដែលនៅសល់ពុំអាចចេញប័ណ្ណបាន ដោយសារជាប់បណ្តឹងតវ៉ា , គ្មានទិន្នន័យ , មានទំនាស់ព្រំដី ,ពាក់ព័ន្ធនឹងបុរាណដ្ឋាន , កាត់ផ្លូវអស់ និង មានបណ្តឹងទប់ស្កាត់ផងដែរ ។
ឯកឧត្តមបណ្ឌិត ឃឹម ប៊ុនសុង មានប្រសាសន៍ថា រាល់ក្បាលដីដែលមានការពាក់ព័ន្ធនឹងតំបន់បុរាណដ្ឋាន អាជ្ញាធរខេត្ត អាជ្ញាធរអប្សរា មន្ទីរវប្បធម៌ និងវិចិត្រសិល្បៈខេត្ត រួមទាំងមន្ទីរពាក់ព័ន្ធ ត្រូវធ្វើការចុះត្រួតពិនិត្យសិក្សាជាក់ស្តែង ក្នុងការផ្ទៀងផ្ទាត់ ដើម្បីរកនូវដំណោះស្រាយជាបន្តជូនប្រជាពលរដ្ឋ ពិសេសសុំឲ្យមន្ទីរពាក់ព័ន្ធទាំងអស់ ត្រូវពន្លឿនការធ្វើប័ណ្ណកម្មសិទ្ធិ ជូនដល់ប្រជាពលរដ្ឋ ដែលនៅសេសសល់មួយចំនួន ដែលប៉ះពាល់តំបន់បូរាណដ្ឋាន ក្នុងការកាត់ឆ្វៀលធ្វើកម្មសិទ្ធិជូនបងប្អូនឲ្យបានឆាប់រហ័ស ៕
អត្ថបទ និង រូបថត ៖ លោក គឿន វេត
កែសម្រួលអត្ថបទ ៖ លោក លីវ សាន្ត
#មន្ទីរព័ត៌មានខេត្តសៀមរាប
