ក្នុងឱកាសនៃប្រារព្ធពិធីបញ្ចុះបឋមសីលាកសាងកុដិថ្មី កាលពីព្រឹកថ្ងៃទី២៤ ខែកញ្ញា ឆ្នាំ២០១៨ម្សិលមិញនេះ ព្រះគ្រូឥន្ទបាលី កែវ អាន ព្រះចៅអធិការវត្ត ឥន្ទបត្តបូរី ហៅវត្តអង្គរតូចខាងត្បូង បានមានសង្ឃដីកាថា ការកសាងកុដិថ្មីនេះ គឺផ្តើមចេញដោយសទ្ធាជ្រះថ្លារបស់ឯកឧត្តមទេសរដ្ឋមន្ត្រី ស៊ុន ចាន់ថុល រដ្ឋមន្ត្រីក្រសួងសាធារណការនិងដឹកជញ្ជូន និង លោកជំទាវ ជាគុណប្រយោជន៍សម្រាប់ការស្នាក់នៅរបស់ព្រះសង្ឃ ធ្វើសង្ឃកម្មនៅក្នុងទីអារាមនោះ ហើយសេនាសនទានមួយនេះ ក៏ត្រូវបានចាត់ទុកជាគរុភណ្ឌ នៃអារាមសិវៈព្រះសមណគោត្តមផងដែរ ដើម្បីជំនួសកុដិចាស់ដែលមានអាយុកាលយូរមកហើយ ស្ថិតក្នុងភាពទ្រុឌទ្រោមនិងបានរុះរើចេញទៅហើយនោះ ។
លោក ហឿន សំនៀង នាយរងខុទ្ទកាល័យឯកឧត្តមទេសរដ្ឋមន្ត្រី ស៊ុន ចាន់ថុល បានឲ្យដឹងថា សំណង់កុដិថ្មីនេះ នឹងត្រូវបានសាងសង់អំពីឈើលើ ជើងតាងបេតុង មានទំហំ១៩ម៉ែត្រ គុណនឹង៩ម៉ែត្រ តភ្ជាប់ដោយរានហាល២ម៉ែត្រ គុណនឹង ៦,៦០ ម៉ែត្រ តាមរចនាបថស្ថាបត្យកម្មខ្មែរ ព្រមព្រៀងនិង យល់ព្រមដោយអាជ្ញាធរជាតិអប្សរា ដែលមានភារកិច្ចនិងកាតព្វកិច្ច រៀបចំគ្រប់គ្រង ថែរក្សា ការពារនិងអភិវឌ្ឍប្រកបដោយចិរភាពនៃតំបន់ឧទ្យានអង្គរ ហើយសំណង់កុដិថ្មីនេះ មានគម្រោងដែលកំណត់ការសាងសង់ ឲ្យរួចរាល់ជាស្ថាពរ នាចុងខែមិនា មុនចូលឆ្នាំខ្មែរ នៃព.ស ២៥៦៣ ត្រូវនឹង គ.ស ២០១៩ ។
គួររំឭកថា បើយោងតាមកំណត់ត្រា និយាយអំពីប្រវត្តិសង្ខេបរបស់វត្តឥន្ទបត្តបូរី ដែលមាននាមដើមអង្គរវត្ត ព្រោះថាកាលក្នុងអំឡុងឆ្នាំ ១៤៣២ ដល់ឆ្នាំ ១៨៦៣ នាសម័យអាណានិគមនិយមបារាំងសេស អង្គរវត្ត គឺជាវត្តដែលមានព្រះសង្ឃគង់នៅ ដោយយកប្រាសាទធ្វើជាវត្តតែម្តង លុះឆ្នាំ១៩១០ បារាំងបាននិមន្តព្រះសង្ឃចេញពីប្រាសាទអង្គរ ហើយតាំងវត្តថ្មីលើទីតាំងសព្វថ្ងៃ គឺជាប់ខាងត្បូងប្រាង្គប្រាសាទអង្គរវត្តផ្ទាល់ ៕
អត្ថបទ និង រូបថត ៖ លោក ងិន គឹមឡេង
កែសម្រួលអត្ថបទ ៖ លោក លីវ សាន្ត
#មន្ទីរព័ត៌មានខេត្តសៀមរាប
