លោកជំទាវ ខៀវ បូរី រដ្ឋលេខាធិការក្រសួងសង្គមកិច្ច អតីតយុទ្ធជន និងយុវនីតិសម្បទា និង ជាអនុប្រធានក្រុមប្រឹក្សាជាតិកម្ពុជាដើម្បីកុមារ បានបង្ហាញថា ដោយមើលឃើញពីតម្រូវការជាក់ស្តែង និងពង្រឹងការអនុវត្តតួនាទី ភារកិច្ចរបស់ខ្លួនដែលយន្តការសម្របសម្រួលកិច្ចការពារកុមារ និងដោយមានការជួយគាំទ្រឧបត្ថម្ភពីអង្គការយូនីសេហ្វអគ្គលេខាធិការដ្ឋានក្រុមប្រឹក្សាជាតិកម្ពុជាដើម្បីកុមារ បានធ្វើការសិក្សាជាមូលដ្ឋានលើយន្តការសម្របសម្រួលកិច្ចការពារកុមារដែលមានស្រាប់នៅថ្នាក់ជាតិ និងថ្នាក់ក្រោមជាតិ។
ការសិក្សានេះដើម្បីកំណត់ និងវាយតម្លៃមុខងារ និងដំណើរការនៃយន្តការសម្របសម្រួលការការពារកុមារ ដែលមានស្រាប់ ក្នុងគោលបំណងដើម្បីបង្កើតឱ្យមាននូវជម្រើសមួយចំនួនសម្រាប់យន្តការការពារកុមារថ្នាក់ជាតិ និងថ្នាក់ក្រោមជាតិ ដែលអាចសម្របសម្រួលបានល្អជាងមុន សម្រាប់ការទប់ស្កាត់ និងឆ្លើយតប ក៏ដូចជាការបង្កើនសេវាសង្គម និងការវិភាជថវិកាកើនឡើងសម្រាប់កិច្ចការពារកុមារ។ ការថ្លែងបែបនេះក្នុងឳកាសដែរលោកជំទាវបានអញ្ផើញជាអធិបតី ក្នុងអង្គសិក្ខាសាលាពិគ្រោះយោបល់ស្តីពីការសិក្សាមូលដ្ឋានលើយន្តការសម្របសម្រួលកិច្ចការពារកុមារដែលមានស្រាប់នៅថ្នាក់ជាតិ និងក្រោមជាតិ នាព្រឹកថ្ងៃទី២៩ ខែសីហា ឆ្នាំ២០១៩ នៅក្រុងសៀមរាប ដោយមានចូលរួមពីក្រុមប្រឹក្សាខេត្ត គណៈអភិបាលខេត្ត ប្រធានមន្ទីរ អនុប្រធានមន្ទីរ ទូទាំង២៥រាជធានី-ខេត្ត និងភាគីពាក់ព័ន្ធផងដែរ។
លោកបានបន្ថែមថា ជាការពិតណាស់រាជរដ្ឋាភិបាល បានយកចិត្តទុកដាក់ខ្ពស់ចំពោះការអនុវត្តច្បាប់អន្តរជាតិនានា ជាពិសេស អនុសញ្ញាស្តីពីសិទ្ធិកុមារ និងពិធីសារបន្ថែមពាក់ព័ន្ធ ដើម្បីឆ្លើយតបទៅនឹងតម្រូវការរបស់ កុមារ និងកិច្ចការពារជាពិសេសដល់កុមារ ដើម្បីរស់នៅក្នុងសេរីភាព សន្តិភាព និងការអភិវឌ្ឍ តាម រយៈការដាក់ចេញនូវវិធានការជាច្រើន រួមមាន ការរៀបចំច្បាប់ គោលនយោបាយ ផែនការយុទ្ធសាស្ត្រ និងលិខិតបទដ្ឋាននានាជាច្រើន។
លោកជំទាវរដ្ឋលេខាធិការបានបញ្ផាក់ថា ទោះបីជាប្រទេសកម្ពុជាសម្រេចបានសមិទ្ធផលគួរជាទីមោទនៈ ក្នុងកិច្ចខឹតខំប្រឹងប្រែងដោះស្រាយបញ្ហាការរំលោភបំពានកុមារ ការរំលោភសិទ្ធិកុមារយ៉ាងណាក៏ដោយ ក៏ប្រទេសកម្ពុជានៅមានបញ្ហាប្រឈមមួយចំនួន ដូចជា ការពង្រឹងយន្តការអនុវត្តប្រព័ន្ធកិច្ចការពារកុមារ ជាក់ស្ដែងយន្តការសម្របសម្រួលកិច្ចការពារកុមារថ្នាក់ក្រោមជាតិរបស់យើង ការក៏សាងសម្ថតភាពធនធានមនុស្ស និងហិរញ្ញវត្ថុ នៅមិនទាន់បានល្អប្រសើរនៅឡើយ។
លោកជំទាវយល់ឃើញថា ដើម្បីដោះស្រាយបញ្ហារំលោភបំពានសិទ្ធិកុមារគ្រប់រូបភាព ស្របទៅតាមបទដ្ឋានជាតិ និងអន្តរជាតិ រួមទាំងអនុសញ្ញាស្ដីពីសិទ្ធិកុមារ ឲ្យកាន់តែល្អប្រសើរថែមទៀតនោះ ទាមទារឲ្យមានការចូលរួមពីគ្រប់ក្រសួង ស្ថាប័នទាំងថ្នាក់ជាតិ ថ្នាក់ក្រោមជាតិ និងដៃគូពាក់ព័ន្ធទាំងអស់ សំដៅធ្វើការរួមគ្នា ដើម្បីឧត្តមប្រយោជន៍កុមារកម្ពុជា ដោយស្មារតីទទួលខុសត្រូវខ្ពស់។
អត្ថបទ និង រូបភាព ៖ អ៊ិន សីហរិទ្ធ
កែសម្រួល៖ អ៊ុន ណារាជ្យ
