បើយោងតាមការចុះផ្សាយរបស់ ក្រសួងធនធានទឹក និងឧតុនិយម ស្តីពីស្ថានភាព និងឥទ្ធិពលរបស់ព្យុះទី១២ ឈ្មោះ ប៉ូឌុល បានឲ្យដឹងនៅថ្ងៃទី ៣០ ខែសីហា ឆ្នាំ២០១៩នេះថា បន្ទាប់ពីបានធ្វើការពិនិត្យ តាមដានលើស្ថានភាពអាកាសធាតុរួចមក ក្រសួងធនធានទឹក និងឧតុនិយម សូមជម្រាបជូនដំណឹងដល់សារធារណៈជនឲ្យបានជ្រាបថា៖ ព្យុះទី១២ ឈ្មោះ ប៉ូឌុល (PODUL) ដែលបានកើតឡើងនៅក្នុងមហាសមុទ្រប៉ាស៊ីហ្វិក កាលពីថ្ងៃទី២៧ ខែសីហា ឆ្នាំ២០១៩ បានរំកិលខ្លួនឆ្លងកាត់ប្រទេសហ្វីលីពីន ចូលមកសមុទ្រចិនខាងត្បូង ហើយនៅវេលារំលងអធ្រាត្រឈានចូលថ្ងៃទី៣០ ខែសីហា ឆ្នាំ២០១៩នេះព្យុះប៉ូឌុលបានធ្វើដំណើរមកដល់តំបន់ឆ្នេរប្រទេសវៀតណាមភាគកណ្ដាល។
បើតាមសេចក្ដីជូនដំណឹងបានឲ្យដឹងទៀតថា យោងតាមការព្យាករណ៍ ឥទ្ធិពលរបស់ព្យុះប៉ូឌុល នឹងបង្កឲ្យធាតុអាកាសនៅព្រះរាជាណាចក្រកម្ពុជា ចាប់ពីថ្ងៃទី៣០ ខែសីហា ដល់ថ្ងៃទី៣ ខែកញ្ញា ឆ្នាំ២០១៩នេះ នឹងមានស្ថានភាពដូចជា នៅតាមបណ្តាខេត្តនៅតំបន់ឆ្នេរ នឹងមានភ្លៀងធ្លាក់ច្រើនជាបន្តបន្ទាប់។ ហើយនៅលើលំហសមុទ្រ ផ្ទៃមេឃមានសភាពអាប់អួ មានភ្លៀងនិងខ្យល់បោកបក់ខ្លាំង រលកសមុទ្រមានកម្ពស់ខ្ពស់ៗ។
ចំនែកនៅតាមតំបន់ជួរភ្នំ តំបន់ខ្ពង់រាប និងបណ្តាខេត្តស្ថិតនៅតាមព្រំដែនកម្ពុជា-វៀតណាម មានភ្លៀងធ្លាក់ពីបង្គួរទៅច្រើន រីឯរាជធានី និងបណ្តាខេត្តមួយចំនួនទៀត មានភ្លៀងធ្លាក់ពីមធ្យមទៅបង្គួរ ។
ព័ត៌មានជាតិ ថ្មីៗ
គួរឲ្យដឹងដែរថា ឥទ្ធិពលរបស់ព្យុះ ប៉ូឌុល នេះ នឹងបង្កឲ្យមានភ្លៀងធ្លាក់ច្រើនផងដែរ នៅតំបន់ផ្ទៃរងទឹកភ្លៀងរបស់ទន្លេមេគង្គ នឹងបង្កឲ្យមានទឹកទន្លេហក់ឡើងសារជាថ្មី ហើយបើតាមការព្យាករណ៍ ទឹកទន្លេមេគង្គអាចនឹងហក់ឡើងខ្ពស់ដែលជាកម្ពស់ដែលត្រូវប្រកាសឲ្យប្រុងប្រយ័ត្ន ក្នុងនោះរួមមានស្ថានីយជលសាស្ត្រខេត្តស្ទឹងត្រែង ទឹកអាចនឹងកើនឡើងដល់កម្ពស់ ១០,៥០ម , ស្ថានីយជលសាស្ត្រខេត្តក្រចេះ ទឹកអាចកើនឡើងដល់កម្ពស់ ២១,០០ម , ស្ថានីយជលសាស្ត្រខេត្តកំពង់ចាម ទឹកអាចកើនឡើងដល់កម្ពស់ ១៣,៥០ម និងស្ថានីយជលសាស្ត្រ បាសាក់ ចតុមុខ នៅរាជធានីភ្នំពេញ ទឹកអាចកើនឡើងដល់កម្ពស់ ៨,០០ម ។
ក្នុងនោះដែរ ក្រសួងធនធានទឹក និងឧតុនិយម បាននឹងកំពុងតាមដានលើស្ថានភាពអាកាសធាតុនេះ និងទឹកទន្លេជាប់ជាប្រចាំ ហើយក្រសួងធនធានទឹក និងឧតុនិយម នឹងធ្វើការជម្រាបជូនជាព័ត៌មានជាបន្តបន្ទាប់ក្នុងករណីចាំបាច់ ។ ហើយក្នុងនោះដែរ សូមក្រសួង ស្ថាប័នពាក់ព័ន្ធ អាជ្ញាធរដែនដី និងសាធារណជន ពិសេសបងប្អូនប្រជានេសាទសមុទ្រជ្រាបជាព័ត៌មាន និងសូមការការយកចិត្តទុកដាក់ប្រុងប្រយ័ត្នខ្ពស់ ដើម្បីជៀសវាងនូវគ្រោះថ្នាក់ផ្សេងៗ ដែលអាចកើតមានឡើងជាយថាហេតុ ៕
អត្តបទ៖ក្រសួងធនធានទឹក និងឧតុនិយម
កែសម្រួល៖ អ៊ុន ណារាជ្យ
