កាលពីថ្ងៃទី២៩ ខែសីហា ឆ្នាំ២០១៩នេះ ប្រធានក្រុមការងារថ្នាក់ជាតិ ចុះជួយមូលដ្ឋានស្រុកក្រឡាញ់ខេត្តសៀមរាប និងប្រធានអាជ្ញាធរអគ្គិសនីកម្ពុជា បានអញើញជាវាគ្មិនកិត្តិយសក្នុងវេទិកាសាធារណស្ដីអំពី ការដោះស្រាយបញ្ហាអគ្គិសនី និងផែនការបន្ត នៃការតបណ្ដាញអគ្គិសនីក្នុងស្រុកក្រឡាញ់ ខេត្តសៀមរាប ដើម្បីចូលរួមសម្រេចគោលនយោបាយជាតិលើវិស័យអគិ្គសនី កម្ពុជានៅឆ្នាំ២០២០ មានថាមពលអគ្គិសនីប្រើប្រាស់នៅទូទាំងភូមិក្នុងប្រទេសកម្ពុជា។
តាមការឲ្យដឹងពី លោកស្រី ម៉ននី រង្សី អភិបាលស្រុកក្រឡាញ់ បានមានប្រសាសន៍ថា ស្រុកក្រឡាញ់មានឃុំចំនួន ១០ និងមានសេវាករផ្គត់ផ្គង់ថាមពលអគ្គិសនីចំនួន ៣ ក្នុងនោះក្នុងចំណោម៩៨ភូមិ មានតែ១១ភូមិប៉ុណ្ណោះ ដែលពុំទាន់មានថាមពលអគ្គិសនីប្រើប្រាស់។ ក្នុងឱកាសនោះដែរ លោកស្រីអភិបាលស្រុកក្រឡាញ់ បានលើកទឹកចិត្តដល់ប្រជាពលរដ្ឋ ដែលបានចូលរួមជាង៦០នាក់ ចូលរួមលើកពីបញ្ហានានា ដែលជួបប្រទះពាក់ព័ន្ធនឹងការតបណ្ដាញចរន្តអគ្គិសនី និងការប្រើប្រាស់ថាមពលអគ្គិសនីក្នុងស្រុកក្រឡាញ់។
ជាការចូលរួម ប្រជាពលរដ្ឋភាគច្រើន ក្នុងស្រុកក្រឡាញ់ បានសំណូមពរដល់ អាជ្ញាធរអគ្គិសនីកម្ពុជា ជួយពង្រីកបណ្ដាញអគ្គិសនី ដល់គ្រួសារ និងភូមិចំនួន១១ផ្សេងទៀតក្នុងស្រុកក្រឡាញ់ ឲ្យមានថាមពលអគ្គិសនីប្រើប្រាស់ ឲ្យបានគ្រប់ៗគ្នា។ ដោយឡែក ប្រជាពលរដ្ឋខ្លះ បានលើកឡើងថា មានករណី អង្គភាពអគ្គិសនីខេត្តសៀមរាប បានបោះបង្គោលអគ្គិសនីនៅក្បែរនឹងផ្លូវសាធារណពេក ដែលអាចនឹងបង្កឲ្យមានគ្រោះថា្នក់ចរាចរណ៍ជាយថាហេតុ និងសូមស្នើឲ្យនង្ខិតបង្គោលនោះ ឲ្យមានគម្លាតឆ្ងាយពីផ្លូវ។
ជាការឆ្លើយតប របស់ឯកឧត្តម យឹម វិសិដ្ឋ ប្រធានអាជ្ញាធរអគ្គិសនីកម្ពុជា បានមានប្រសាសន៍ថា នៅឆ្នាំ២០០៦ ធនាគារពិភពលោក បានទស្សទាយថា នៅត្រឹមឆ្នាំ២០៣០ ភូមិសរុបប្រមាណ៧០ភាគរយប៉ុណ្ណោះ នៅក្នុងប្រទេសកម្ពុជា មានថាមពលអគ្គិសនីប្រើប្រាស់។ ដោយឡែក ជាចក្ខុវិស័យរបស់រាជរដ្ឋាភិបាលកម្ពុជា ដែលមានសម្ដេចតេជោ ហ៊ុន សែន ជានាយករដ្ឋមន្ត្រី បានកំណត់គោលនយោបាយជាតិលើវិស័យអគិ្គសនី កម្ពុជានៅឆ្នាំ២០២០ គ្រប់ភូមិទូទាំងប្រទេស ត្រូវតែមានថាមពលអគ្គិសនីប្រើប្រាស់ពីគ្រប់ប្រភព មិនថាជាប្រភពឯកជន ឬរដ្ឋឡើយ។ ជាក់ស្ដែង នៅឆ្នាំ២០១៩នេះ ក្នុងចំណោមភូមិចំនួន១៤,១៦៨ មាន៩២ភាគរយហើយ ដែលមានចរន្តអគ្គិសនីប្រើប្រាស់។ ចំពោះការបង្ខិតបង្គោលអគ្គិសនី ដែលនៅជិតផ្លូវសាធារណៈ ឲ្យមានគម្លាតឆ្លាតពីផ្លូវនោះអាជ្ញាធរអគ្គិសនីកម្ពុជា នឹងចាត់មន្ត្រីចុះមកសិក្សា ទោះជាយ៉ាងណាក៏ដោយ ឯកឧត្តមបានពន្យល់ថា ករណីបោះបង្គោលនៅជិតផ្លូវសាធារណនេះ អាចដោយមានការតវ៉ាពីប្រជាពលរដ្ឋម្ចាស់ដី ឬគេហដ្ឋានមិនយល់ព្រម ដូច្នេះអាជ្ញាធរអគ្គិសនីធ្វើការបោះបង្គោលនេះជាបណ្ដោះអាសន្ន ដើម្បីភ្ជាប់ចរន្តអគ្គិសនីឲ្យមូលដ្ឋាននោះមានថាមពលប្រើប្រាស់ជាបណ្ដោះអាសន្នសិន។
ឯកឧត្តម យឹម វិសិដ្ឋ បានបញ្ជាក់ផងដែរថា រាល់ការតបណ្ដាយចរន្តអគ្គិសនី ដែលមានប្រវែងក្រោម ១៥០ម៉ែត្រ ពីបង្គោលអគ្គិសនីកម្ពុជា ពុំមានការបង់ថ្លៃតបណ្ដាញអគ្គិសនីទេ ហើយក៏ពុំតម្រូវឲ្យប្រជាពលរដ្ឋត្រូវតែប្រើប្រាស់ខ្សែចរន្តអគ្គិសនីរបស់អគ្គិសនីកម្ពុជា ដើម្បីតភ្ជាប់ទៅគេហដ្ឋានដែរ។ ប្រសិនបើមានករណីនេះកើតឡើង បន្ទាប់ពីរយៈពេល១៥ថ្ងៃនៃការតភ្ជាប់បណ្ដាញ ពុំមានថាមពលអគ្គិសនីប្រើប្រាស់ សូមរាយការណ៍មកអគ្គិសនីកម្ពុជា។
មានមតិក្នុងឱកាសនោះ ឯកឧត្តម ជា ច័ន្ទបរិបូរណ៍ រដ្ឋលេខាធិការក្រសួងព័ត៌មាន និងជាប្រធានក្រុមការងារថ្នាក់ជាតិ ចុះជួយមូលដ្ឋានស្រុកក្រឡាញ់ខេត្តសៀមរាប បានបញ្ជាក់ថា សេវាករដែលតែងតែបង្កផលលំបាកដល់ប្រជាពលរដ្ឋ ជាពិសេសក្នុងស្រុកក្រឡាញ់ សូមបញ្ឈប់សកម្មភាពជាបន្ទាន់ ក្នុងនោះទាំងសេវាករ និងប្រជាពលរដ្ឋត្រូវបញ្ឈប់ដាច់ខាត ការបង់ថ្លៃសេវាក្រៅផ្លូវការ ដែលនេះរាប់ថាគឺជាអំពើពុករលួយ។
អត្ថបទ និង រូបថត ៖ លោក សេង ផល្លី និងលោក ខេង ឧត្តម
