តាមបណ្ដាញទំនាក់ទំនងសង្គម ( Facebook ) ផ្លូវការរបស់អាជ្ញាធរជាតិអប្សរា បានឲ្យដឹងថា កន្លងមក មានបងប្អូនប្រជាពលរដ្ឋរស់នៅក្នុងតំបន់ការពារបេតិកភណ្ឌពិភពលោកអង្គរ បានដាក់ពាក្យស្នើសុំមកអាជ្ញាធរជាតិអប្សរា ដើម្បីបានច្បាប់អនុញ្ញាតធ្វើការសាងសង់ផ្ទះថ្មីជំនួសផ្ទះចាស់ ហើយទន្ទឹមនឹងទទួលបានការអនុញ្ញាត មានបងប្អូនប្រជាពលរដ្ឋមួយចំនួនធំ បានអនុវត្តនិងសាងសង់សំណង់គេហដ្ឋានរបស់ខ្លួន ស្របតាមខ្លឹមសារនៃគោលការណ៍លិខិតអនុញ្ញាតដែលបានផ្តល់ជូន ប៉ុន្តែក៏នៅមានបងប្អូនប្រជាពលរដ្ឋខ្លះ មិនបានអនុវត្តត្រឹមត្រូវស្របតាមគោលការណ៍នៃលិខិតអនុញ្ញាតនោះទេ ដោយសាងសង់លើសឬផ្ទុយទាំងស្រុងនៃការស្នើសុំរបស់ខ្លួន ព្រមទាំងកិច្ចសន្យាសាងសង់ដែលបានព្រមព្រៀងលើគំរូប្លង់ស្ថាបត្យកម្មរវាងអ្នកស្នើសុំនិងអាជ្ញាធរជាតិអប្សរា។
ដោយឃើញនូវការរំលោភលើលក្ខខណ្ឌនៃលិខិតអនុញ្ញាត នាយកដ្ឋានរៀបចំដែនដីនិងគ្រប់គ្រងលំនៅដ្ឋានក្នុងឧទ្យានអង្គរបានចុះធ្វើការត្រួតពិនិត្យ និងចុះកិច្ចសន្យាបញ្ឈប់សកម្មភាពសាងសង់ជាបណ្តោះអាសន្នជាមួយម្ចាស់សំណង់ ហើយក្នុងករណីម្ចាស់សំណង់មិនយល់ព្រមធ្វើកិច្ចសន្យាកែកំហុសសំណង់របស់ខ្លួន ស្របតាមគោល ការណ៍នៃលិខិតអនុញ្ញាតឡើងវិញនោះទេ លិខិតអនុញ្ញាតនោះនឹងចាត់ទុកជាមោឃៈ សំណង់នឹងត្រូវរុះរើ ម្ចាស់សំណង់ក៏នឹងត្រូវប្រឈមចំពោះមុខច្បាប់ផងដែរនោះ ដូច្នេះដើម្បីបញ្ជៀសនូវការប៉ះពាល់ផលប្រយោជន៍ផ្ទាល់របស់ខ្លួន អាជ្ញាធរជាតិអប្សរា សូមអំពាវនាវដល់បងប្អូនប្រជាពលរដ្ឋ ដែលទទួលបានការអនុញ្ញាតសាងសង់ មេត្តាអនុវត្តឲ្យបានខ្ជាប់ខ្ជួន និងម៉ឺងម៉ាត់បំផុតចំពោះការសាងសង់សំណង់របស់ខ្លួន ៕
អត្ថបទ និង រូបថត ៖ លោក យូ វង្ស
កែសម្រួលអត្ថបទ ៖ លោក លីវ សាន្ត
ព័ត៌មានជាតិ ថ្មីៗ
