ថវិកាចំនួន៩៨លានរៀល ដែលបានពីការជិះកង់មនុស្សធម៌ ក្នុងខេត្តសៀមរាប កាលពីព្រឹកថ្ងៃទី៣០ ខែសីហាឆ្នាំ២០១៩នេះ ត្រូវបានយកទៅប្រគល់ជូនមន្ទីរពេទ្យកុមារអង្គរ ក្នុងក្រុងសៀមរាប ខេត្តសៀមរាប ដើម្បីបម្រើដល់ប្រតិបត្តិការមនុស្សធម៌ ពិនិត្យ ថែទាំសុខភាព និងព្យាបាលជំងឹ ជូនកុមារកម្ពុជានៅទូទាំងប្រទេសដោយមិនគិតថ្លៃ។
មានប្រសាសន៍ក្នុងឱកាសប្រគល់ជូនថវិកាជូនមន្ទីរពេទ្យកុមារអង្គរ លោកជំទាវ ទាង អេងទៀ សីហា អនុប្រធាន សាខាកាកបាទក្រហមកម្ពុជា ខេត្តសៀមរាប បានលើកឡើងថា តាងនាម ឯកឧត្តម ទៀ សីហា ប្រធានគណៈកម្មាធិការសាខាកាកបាទក្រហមកម្ពុជា ខេត្តសៀមរាប សូមថ្លែងអំណរគុណដល់ ឯកឧត្តម ទៀ សុខា លោកឧកញ្ញ៉ា ទៀ វិចិត្រ រួមនិងសប្បុរសជនទាំងអស់ ដែលបានខិតខំរៃអង្គាសថវិកាពី ភ្នំពេញ ព្រះសីហនុ សៀមរាប បន្ទាយមានជ័យ និងមួយចំនួនទៀតបរិច្ចាគតាមរយៈគណនីធនាគារ ចាប់ពី២ពាន់រៀលទៅ ដែលការចូលរួមក្នុងកម្មវិធីជិះកង់សប្បុរសធម៌នេះ បានជួយគាំទ្រដល់បេសកកម្មមនុស្សធម៌របស់ក្រុមគ្រូពេទ្យ និងក្រុមការងារទាំងអស់របស់មន្ទីរពេទ្យកុមារអង្គរ។
តាមការឲ្យដឹងពី សមាជិកម្នាក់ របស់ក្រុមកង់ភ្នំអារ៉ែង កម្មវិធីជិះកង់មនុស្សធម៌នេះ គឺធ្វើឡើងក្រោមពាក្យស្លោក មនុស្សធម៌ មិត្តភាព និងសុខភាព។ កន្លងមក ក្រុមរបស់ពួកលោក បានប្រមូលថវិកាទៅប្រគល់ជូនដល់មន្ទីរពេទ្យគន្ធបុប្ផាខេត្តសៀមរាបម្ដង នៅឆ្នាំ២០១៨ និងម្ដងទៀត នៅក្នុងខែកក្កដា ឆ្នាំ២០១៩ថ្មីៗនេះ ដោយឡែក នេះជាលើកទីមួយហើយ ដែលក្រុមរបស់ពួកលោក បាននាំយកថវិកាមកប្រគល់ជូនមន្ទីរពេទ្យកុមារអង្គរ។ សមាជិករូបនេះ បានបញ្ជាក់ថា ចំពោះប្រជាពលរដ្ឋដែលចង់ចូលរួមជាមួយក្រុមរបស់ពួកលោក សូមស្វែងរកព័ត៌មាននៅបណ្ដាញសង្គមហ្វេសប៊ុក ចលនាយុវជនកម្ពុជា ក១៥៧។
សូមជម្រាបថា កម្មវិធីជិះកង់ ដើម្បីប្រមូលមូលនិធិជួយដល់មន្ទីរពេទ្យកុមារអង្គរកាលពីព្រឹកមិញនេះ មានការចូលរួមពីក្រុមជិះកង់ចំនួន ៥ រួមមាន ក្រុមសាខាកាកបាទក្រហមកម្ពុជា ខេត្តសៀមរាប ក្រុមសហភាពសហព័ន្ធកម្ពុជា ក្រុមមនុស្សធម៌០៣ ខេត្តព្រះសីហនុ ក្រុមចលនាយុវជនកម្ពុជាក្រុម ១៥៧ សាខាខេត្តព្រះសីហនុ-សៀមរាប ក្រុមកង់ភ្នំអារ៉ែង និង ក្រុមG.T.V.C។
អត្ថបទ និង រូបថត ៖ លោក ធន់ ពូថេ
កែសម្រួលអត្ថបទ៖ លោក សេង ផល្លី