នាព្រឹកថ្ងៃទី៣០ ខែសីហា ឆ្នាំ២០១៩ នៅឃុំជ្រោយនាងងួន ស្រុកស្រីស្នំ ខេត្តសៀមរាប មានរៀបចំវេទិកាសាធារណៈមួយ ដើម្បីត្រួតពិនិត្យ និងគាំទ្រការអនុវត្ត កម្មវិធីគោលនយោបាយ និងយុទ្ធសាស្ត្រចតុកោណដំណាក់កាលទី ៤ របស់រាជរដ្ឋាភិបាលកម្ពុជា ក្រោមអធិបតីភាពឯកឧត្តម ស៊ាន បូរ៉ាត រដ្ឋលេខាធិការក្រសួងអប់រំ យុវជន និងកីឡា និងជាប្រធានក្រុមការងារថ្នាក់ជាតិចុះជួយមូលដ្ឋានស្រុកស្រីស្នំ។
មានវត្តមានចូលរួមពីប្រជាពលរដ្ឋក្នុងស្រុកស្រីស្នំ មន្ត្រីរាជការ និងអង្គភាពជំនាញមកពីជុំវិញខេត្តសៀមរាប សរុបចំនួន២៣១នាក់ ក្នុងនោះមានស្រី៩៥នាក់ ឯកឧត្តម ស៊ាន បូរ៉ាត បានមានប្រសាសន៍ថា ក្រោមការដឹកនាំរបស់សម្ដេចតេជោ ហ៊ុន សែន នាយករដ្ឋមន្ត្រីនៃកម្ពុជា សម្ដេចបានខិតខំប្រឹងប្រែងរៀបចំគោលនយោបាយជាតិ ដើម្បីធ្វើយ៉ាងណាឲ្យប្រជាពលរដ្ឋទទួលបានផលប្រយោជន៍ក្នុងការរស់នៅពីថ្នាក់ជាតិ និងថ្នាក់ក្រោមជាតិ ជាក់ស្ដែងការបើកវេទិកាសាធារណៈនាពេលនេះ បានឆ្លុះបញ្ចាំពីការយកចិត្តទុកដាក់របស់ប្រមុខរាជរដ្ឋាភិបាល សម្រាប់ឲ្យក្រុមការងារថ្នាក់ជាតិចុះជួយមូលដ្ឋាន ដោះស្រាយជូនបងប្អូនប្រជាពលរដ្ឋ។ ទន្ទឹមនោះ ឯកឧត្តមក៏បានផ្ដល់ឱកាសឲ្យប្រជាពលរដ្ឋលើកជាសំណួរ និងទុក្ខកង្វល់ ដើម្បីឲ្យអាជ្ញាធរធ្វើការឆ្លើយ និងដោះស្រាយផងដែរ។
ជារួម សំណួរដែលលើកឡើងនៅពេលនោះ រួមមានការព្រួយបារម្ភអំពីការត្រួតពិនិត្យសុវត្ថិភាពចំណីអាហារ បញ្ហាគ្រឿងញៀន បញ្ហាគ្រូនៅកម្រិតថ្នាក់បឋមសិក្សាខ្វះការយកចិត្តទុកដាក់បង្រៀន ការសាងសង់លំនៅដ្ឋានឬចាក់ដីខ្ពស់ជាងផ្លូវសាធារណ បញ្ហាគ្រាប់មិនទាន់ផ្ទុះនៅសេសសល់ និងសំណើរសុំជួសជុលផ្លូវក្រាលគ្រួសក្រហម ។
ឆ្លើយតបនឹងបញ្ហាខាងលើ ឯកឧត្តម ស៊ាន បូរ៉ាត លោក ហ៊ន់ ឫទ្ធ អភិបាលស្រុកស្ដីទី និងមន្ត្រីជំនាញតាមមន្ទីរអង្គភាពនីមួយៗ បានឆ្លើយទៅនឹងសំណួររបស់សិស្សានុសិស្ស និងប្រជាពលរដ្ឋ រួមនឹងដោះស្រាយចំពោះបញ្ហាទាំងនោះផងដែរ។ ដោយឡែក បញ្ហាដែលនៅមិនទាន់ដោះស្រាយ មានតែមួយប៉ុណ្ណោះ ពាក់ព័ន្ធនឹងសំណើសុំជួសជុលផ្លូវមួយខ្សែក្រាលគ្រួសក្រហមប្រវែង៣២គីឡូម៉ែត្រ ចាប់ពីសាលាឃុំស្លែងស្ពាន ទៅដល់ភូមិចារ ស្ថិតក្នុងឃុំស្លែងស្ពាន ស្រុកស្រីស្នំ ឯកឧត្តម ស៊ាន បូរ៉ាត បានជម្រាបដល់ប្រជាពលរដ្ឋថា សំណើនេះ ក្រុមការងារបានដាក់ជូនក្រុមការងារវិស្វកម្មក្រសួងការពារជាតិត្រួតពិនិត្យរួចរាល់ហើយ គឺរង់ចាំតែការឆ្លើយតបត្រឡប់មកវិញប៉ុណ្ណោះ។
អត្ថបទ និង រូបថត ៖ លោក សេង ផល្លី និងលោក ខេង ឧត្តម
