នាព្រឹកថ្ងៃទី ៣០ ខែសីហា ឆ្នាំ២០១៩ លោក ស វ៉ាន់ហ៊ាង ប្រធានធនធានមនុស្ស និងរដ្ឋបាល នៃក្រុមហ៊ុនទឹកបរិសុទ្ធ អូគូលែន និង សហការី បាននាំយកអំណោយជាអង្ករចំនួន ២តោន , ទឹកបរិសុទ្ធអូគូលែនចំនួន១៥០កេស និង ថវិកាចំនួន២លានរៀល ជូនដល់សាខាកាកបាទក្រហមកម្ពុជាខេត្តសៀមរាប នៅទីស្នាក់ការសាខាកាកបាទក្រហមកម្ពុជាខេត្តសៀមរាប ។
លោក ស វ៉ាន់ហ៊ាង មានប្រសាសន៍ថា ក្រុមហ៊ុនទឹកបរិសុទ្ធ អូគូលែន ពិតជាមានសេចក្ដីរីករាយជាខ្លាំង ក្នុងការចូលរួមចំណែកជាមួយសកម្មភាពមនុស្សធម៌របស់កាកបាទក្រហមកម្ពុជា ដើម្បីជួយសម្រាលទុក្ខលំបាករបស់បងប្អូនប្រជាពលរដ្ឋរងគ្រោះ និងងាយរងគ្រោះ នៅគ្រប់ទីកន្លែង ហើយក្រុមហ៊ុនទឹកបរិសុទ្ធ អូគូលែន នឹងបន្តគាំទ្រ និងឧបត្ថម្ភដល់សកម្មភាពមនុស្សធម៌របស់កាកបាទក្រហមកម្ពុជា ជាបន្តបន្ទាប់នាពេលខាងមុខៗទៀត។
មានប្រសាសន៍នាឱកាសនោះលោក ស៊ុ សំអន នាយកប្រតិបត្តិសាខាកាកបាទក្រហមកម្ពុជាខេត្តសៀមរាប បានថ្លែងអំណរគុណយ៉ាងជ្រាលជ្រៅ ចំពោះទឹកចិត្តដ៏សប្បុរសធម៌របស់ថ្នាក់ដឹកនាំក្រុមហ៊ុនទឹកបរិសុទ្ធ អូគូលែន ក្នុងការយកចិត្តទុកដាក់ចូលរួមចំណែកសកម្មភាពមនុស្សធម៌ និងបានប្រគល់នូវអំណោយនាពេលនេះ គឺសបញ្ជាក់ពីទឹកចិត្តសប្បុរសធម៌ ចំពោះបងប្អូនប្រជាពលរដ្ឋរងគ្រោះ និងងាយរងគ្រោះ។
ព័ត៌មានជាតិ ថ្មីៗ
លោក ស៊ុ សំអន មានប្រសាសន៍បន្ថែមថា ក្នុងកាយវិកាដ៏មនុស្សធម៌នេះ គឺជាការចូលរួមរបស់សប្បុរសជន ជាមួយសកម្មភាពមនុស្សធម៌របស់កាកបាទក្រហមកម្ពុជា ដែលមានសម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ជាប្រធាន ហើយអំណោយទាំងនេះ សាខាកាក បាទក្រហមកម្ពុជាខេត្តសៀមរាប នឹងយកទៅប្រើប្រាស់ឱ្យចំគោល ដៅមនុស្សធម៌ ដោយមិនប្រកាន់ពូជសាសន៍ ពណ៌សម្បុរ និងនិន្នា ការនយោបាយណាមួយឡើយ ស្របតាមគោលការណ៍គ្រឹះទាំង៧ ប្រការរបស់ចលនាអន្តរជាតិកាកបាទក្រហម អឌ្ឍចន្ទក្រហម ៕
អត្ថបទ និង រូបថត ៖ លោក អ៊ិន សីហរិទ្ធ
កែសម្រួលអត្ថបទ ៖ លោក លីវ សាន្ត
