សមត្ថកិច្ចនគរបាលខេត្តសៀមរាប បានឲ្យដឹងថា កាលពីវេលាម៉ោង០៦ព្រឹក ថ្ងៃទី២៨ ខែសីហា ឆ្នាំ២០១៩កន្លងទៅនេះ កម្លាំងការិយាល័យនគរបាលព្រហ្មទណ្ឌកម្រិតស្រាល នៃស្នងការដ្ឋាននគរបាលខេត្តសៀមរាប បានឃាត់ខ្លួនជនសង្ស័យចំនួន០៥នាក់ រួមមាន ៖
ទី១.ឈ្មោះ សុខ សុខន ភេទប្រុស អាយុ៤០ឆ្នាំ ទីលំនៅភូមិថ្នល់ សង្កាត់ស្រង៉ែ ក្រុងសៀមរាប ,
ទី២. ឈ្មោះ សុវណ្ណ វីរះ ភេទប្រុស អាយុ៣២ឆ្នាំ ទីលំនៅភូមិរកា សង្កាត់ក្របីរៀល ក្រុងសៀមរាប ,
ទី៣.ឈ្មោះ រុណ រ៉ា ភេទប្រុស អាយុ៣៧ឆ្នាំ ទីលំនៅភូមិគោកត្នោត សង្កាត់គោកចក ក្រុងសៀមរាប ,
ទី៤. ឈ្មោះ ឌុល សុវណ្ណ ភេទប្រុស អាយុ៣១ឆ្នាំ ទីលំនៅភូមិបន្ទាយចាស់ សង្កាត់គោកចក ក្រុងសៀមរាប
ទី៥. ឈ្មោះ រិទ្ធ សារៃ ភេទប្រុស អាយុ២៩ឆ្នាំ មានទីលំនៅភូមិគោកដូង សង្កាត់ទឹកវិល ក្រុងសៀមរាប ដែលជនទាំង៥នាក់នេះ មានមុខរបរ ជាបុគ្គលិកក្រុមហ៊ុនខេមបូឌាអ៊ែរផត បម្រើការងារនៅអាកាសយានដ្ឋានអន្តរជាតិសៀមរាប ដែលមានការពាក់ព័ន្ធនឹងករណីអំពើលួចមានស្ថានទម្ងន់ទោសជាក់ស្តែង គឺលួចរ៉ូតឬឆ្កឹះសោរវ៉ាលីជាក្រុម ដែលបានប្រព្រឹត្តកាលពីថ្ងៃទី២៥ និងទី២៦ ខែសីហា ឆ្នាំ២០១៩ វេលាម៉ោង១៥:២០នាទី នៅចំណុចក្នុងប្រអប់យន្តហោះកន្លែងដាក់សម្ភារនៃអាកាសយានដ្ឋានអន្តរជាតិសៀមរាប ។
សមត្ថកិច្ច បានឲ្យដឹងទៀតថា ដោយមានភ្ញៀវបានប្តឹងមកសមត្ថកិច្ចជាច្រើនលើកផងនោះ កម្លាំងសមត្ថកិច្ច ក៏បានស្រាវជ្រាវលើកាមេរ៉ាសុវត្ថិភាព នៅអាកាសយានដ្ឋានអន្តរជាតិសៀមរាប បានរកឃើញ និងថតយកបាននូវសកម្មភាពកាលពីថ្ងៃទី២៥ ខែសីហា ឆ្នាំ២០១៩ នាវេលាម៉ោង១៥និង១០នាទី មានឈ្មោះ សុខ សាខន , ឈ្មោះ រិទ្ធ សារៃ និងឈ្មោះ ឌុល សុវណ្ណ ធ្វើសកម្មភាពលួច រ៉ូតកាបូបវ៉ាលីយកទ្រព្យសម្បត្តិរបស់ភ្ញៀវ និង នៅថ្ងៃទី២៦ ខែសីហា ឆ្នាំ២០១៩ វេលាម៉ោង០៣និង២០នាទី បានរកឃើញឈ្មោះ រុណ រ៉ា , ឈ្មោះ សុវណ្ណ វីរះ និងបក្ខពួកម្នាក់ទៀតពុំស្គាល់ឈ្មោះ កំពុងធ្វើសកម្មភាពដូចគ្នា លុះនៅថ្ងៃទី២៧ ខែសីហា ឆ្នាំ២០១៩ វេលាម៉ោង១៣ ខាងក្រុមហ៊ុនខេមបូឌាអ៊ែរផត បាននាំខ្លួនអ្នកទាំង ០៥ខាងលើ យក មក ប្រគល់ឲ្យសមត្ថកិច្ចធ្វើការសួរនាំ ។
ព័ត៌មានជាតិ ថ្មីៗ
សមត្ថកិច្ច បានឲ្យដឹងបន្ថែមថា ជនទាំង៥នាក់បានសារភាពថា ខ្លួនបានធ្វើសកម្មភាពពិតប្រាកដមែន ដោយមានអ្នកខ្លះ បានប្រព្រឹត្តករណីនេះមានចំនួនពី៤០លើកទៅ១០០លើកទៀតផង និង នៅសល់បក្ខពួកចំនួន០៤នាក់ទៀត ដែលមានឈ្មោះ ៖ ទី១. ឈ្មោះ ជឹម ភក្តី ភេទប្រុស , ទី២. ឈ្មោះអេង ផៃ ភេទប្រុស , ទី៣. ឈ្មោះហ៊ន ហត្ថា ភេទប្រុស និង ទី៤. ពុំស្គាល់ឈ្មោះ ដែលអ្នកទាំង០៤នាក់នេះ ជាបុគ្គលិកក្រុមហ៊ុនខេមបូឌាអ៊ែរផត ។
សមត្ថកិច្ចបានឲ្យដឹងបន្ថែមទៀតថា សមត្ថកិច្ចបានដកហូតវត្ថុតាងសំខាន់ក្នុងការធ្វើសកម្មភាពរួមមាន ៖ ប៊ិចមានចុងស្រួចរឹងសំរាប់ប្រើប្រាស់ចាក់ឆ្កឹះកូនសោរឬ រ៉ូតកាបូបវ៉ាលីយកលុយ និងទ្រព្យសម្បត្តិ ហើយជនសង្ស័យទាំង០៥នាក់នេះ ត្រូវបានកម្លាំងសមត្ថកិច្ចជំនាញ កសាងសំណុំរឿងបញ្ជូនទៅសាលាដំបូងខេត្ត និង កំពុងបន្តស្រាវជ្រាវរកមុខសញ្ញាដែលនៅសល់ទៀតផង ៕
អត្ថបទ និង រូបថត ៖ លោក ថាច់ ពិសុទ្ធ និង លោក ម៉ី សុខារិទ្ធ
កែសម្រួលអត្ថបទ ៖ លោក លីវ សាន្ត
