ឆ្លងកាត់ការសិក្សា និងអនុវត្តផ្ទាល់របស់កងកម្លាំងនគរបាលខេត្តសៀមរាបក្នុងរយៈ ០២សប្តាហ៍កន្លងទៅនេះ ត្រូវបានបិទបញ្ចប់ហើយនៅព្រឹកថ្ងៃទី ១៨ ខែតុលា ឆ្នាំ២០១៩ នៅបរិវេណ អង្គរឃ្យុងយូ ខេត្តសៀមរាប ដោយមានការអញ្ជើញចូលរួមក្រោមអធិបតីភាព ឯកឧត្តមនាយឧត្តមសេនីយ៍ ហ៊ូ សា គុណ អគ្គស្នងការរងនគរបាលជាតិ តំណាងដ៏ខ្ពង់ខ្ពស់ ឯកឧត្តមនាយឧត្តមសេនីយ៍ សន្តិបណ្ឌិត នេត សាវឿន អគ្គស្នងការ នគរបាលជាតិ និង ឯកឧត្តម ពៅ ពិសិដ្ឋ អភិបាលរងខេត្ត តំណាងដ៏ខ្ពង់ខ្ពស់ ឯកឧត្តម ទៀ សីហា អភិបាលនៃគណៈ អភិបាលខេត្តសៀមរាប និងមានការអញ្ជើញចូលរួមពីសំណាក់លោកស្នងការនគរបាលខេត្ត លោកលោកស្រី ស្នងការរង តំណាងមន្ទីរអង្គភាពរួមមានព្រះរាជអាជ្ញាអបសាលាដំបូងខេត្ត កងរាជអាវុហត្ថខេត្ត អង្គភាពប្រតិបត្តិការសឹករងខេត្តអង្គភាពការពារបិតិកភ័ណ្ទប្រចាំខេត្ត អង្គភាពនគរបាលទេសចរណ៍លោកនាយ ការិយាល័យ ជំនាញចំណុះស្នងការនិង លោក អធិការ នគរបាល ក្រុង – ស្រុក ទាំង ១២ និងសក្ខាកាមនគរបាលជាតិចំនួន៣២០ នាក់ផងដែរ ។
លោក ពៅ ពិសិដ្ឋ មានប្រសាសន៍ថា ការតស៊ូរបស់វរៈយុទ្ធជន យុទ្ធនារី ដើម្បីបុព្វហេតុជាតិមាតុភូមិ ក្រោមព្រះរាជបូជនីយកិច្ច របស់សម្តេចព្រះវររាជបិតាជាតិខ្មែរ ព្រះបរមរតនកោដ្ឋ ដើម្បីឯករាជ្យ បូរណ ភាពទឹកដី និង ឯកភាពជាតិខ្មែរ ប្រកបដោយព្រះបញ្ញាញាណភ្លឺថ្លាគ្រប់កាលៈទេសៈ រហូតទទួលបាន ឯករាជ្យជាតិ ពីពួកបារាំងសេស ដែលគិតមកដល់ពេលនេះ មានអាយុកាល៦៦ឆ្នាំហើយ ។
លោក ពៅ ពិសិដ្ឋ បានបញ្ជាក់បន្ថែមថា មហិច្ឆតារបស់ក្រុមជនអគតិមួយចំនួន ដែលបានចិញ្ចឹមចិត្តប្រឆាំងផ្កាប់មុខ មិនគិតពីសុខទុក្ខរបស់ប្រជាពលរដ្ឋ និងមិនចង់ឲ្យប្រទេសជាតិមានសុខសន្តិភាព និងការរីកចម្រើន គឺពួកទាំងនោះចង់បង្កចលាចល ធ្វើឲ្យប្រទេសជាតិធ្លាក់ក្នុងភ្លើងសង្គ្រាម ជាសំខាន់ក្នុងពេលថ្មីៗនេះ បុគ្គលជនក្បត់ជាតិ សម រង្ស៊ី ដែលហ៊ានប្រមាថដល់ព្រះមហាក្សត្រថែមទៀតផង ។ ហើយចំពោះសិក្ខាកាមរបស់យើងដែលបានបញ្ចប់វគ្គសិក្សានាពេលនេះ គឺមានតួននាទីយ៉ាងសំខាន់ ក្នុងការការពារសុខសុវត្តិភាព និង សន្តិសុខសណ្ដាប់ធ្នាប់របស់ប្រទេសកម្ពុជា និងសុវត្ថិភាពជូនប្រជាពលរដ្ឋ និង ភ្ញៀវជាតិអន្តរជាតិ ចូលមកទស្សនាកម្សាន្តនៅខេត្តសៀមរាប ។
មានប្រសាសន៍នាឱកាសនោះដែរ ឯកឧត្តមនាយឧត្តមសេនីយ៍ ហ៊ូ សាគុណ ក៏បានបញ្ជាក់ថា គោលបំណងនៃការហ្វឹកហាត់របស់កងកម្លាំងនគរបាលរបស់យើងដែលបានបញ្ចប់នៅពេលនេះ គឺ ដើម្បីពង្រឹងសមត្ថភាពដល់កម្លាំងនគរបាលទាំងអស់ចំណុះស្នងការខេត្ត ក្នុងការបង្កើននូវកិច្ចការពារ ធានាសន្តិសុខសុវត្ថិភាពនិងសណ្តាប់ធ្នាប់សាធារណៈជូនប្រជាពល រដ្ឋ និង ភ្ញៀវទេសចរណ៍ជាតិ អន្តរជាតិឲ្យបានកាន់តែល្អប្រសើរឡើងថែមទៀត។
ឯកឧត្តមនាយឧត្តមសេនីយ៍អគ្គស្នងការរងនគរបាលជាតិ ក៏បានធ្វើការក្រើនរំលឹកដល់ថ្នាក់ដឹកនាំ និង កងកម្លាំងទាំងអស់ត្រូវបង្កើនការយកចិត្តទុកដាក់ប្រមូលផ្តុំកម្លាំងត្រៀមប្រចាំការ ក្នុងការចេញអន្តរាគមន៍ជួយប្រជាពលរដ្ឋឲ្យបានទាន់ពេលវេលានៅហេតុការណ៍ ឬមានករណីអ្វីកើតឡើងជាយថាហេតុណាមួយ ។ ម្យ៉ាង ទៀតកងកម្លាំងទាំងអស់ ក៏ត្រូវបង្កើនកិច្ចការពារថែរក្សានូវសន្តិភាពស្ថេរភាពនិងសន្តិសុខ សុវត្ថិភាពការពាររាជរដ្ឋាភិបាលស្របច្បាប់ដែលកើតចេញពីការបោះឆ្នោតពីប្រជាពលរដ្ឋ និង ត្រូវធ្វើការត្រួតពិនិត្យ សហការគ្នាឲ្យបានល្អនៅតាមបណ្តាគោលដៅនីមួយៗ ក្នុងភូមិសាស្ត្រដែលទទួលខុសត្រូវក្នុងការការពារនិងបង្ការទប់ស្កាត់បទល្មើស សំដៅរក្សាការពារ និងធានាសន្តិសុខសុវត្តិភាពជូនថ្នាក់ដឹកនាំ និង គណៈប្រតិភូជាន់ខ្ពស់ជាតិអន្តរជាតិ ព្រមទាំងប្រជាពលរដ្ឋ ដោយយកចិត្តទុកដាក់ខ្ពស់ក្នុងការបម្រើសេវាសាធារណៈ នៅក្នុងមូលដ្ឋានជូនប្រជាពលរដ្ឋ ទាំងស្មារតីនិងសម្ភារៈ សំដៅធានាបាននូវសុវត្ថិភាពទាំងផ្លូវកាយនិងផ្លូវចិត្តនិងតម្រូវការរបស់ប្រជាពលរដ្ឋ ។
ឯកឧត្តមនាយឧត្តមសេនីយ៍ បានសង្កត់ធ្ងន់ថា កម្លាំងនគរបាលទាំងអស់ត្រូវវិភាគ និងវាយតម្លៃនូវរាល់សភាពការណ៍សកម្មភាព និងឧបាយកលចិត្តសាស្ត្រនានា ដែលប៉ុនប៉ងបំផ្លិចបំផ្លាញ ឬការបង្កចលាចលណាមួយដែលធ្វើឲ្យបាត់នូវសណ្តាប់ធ្នាប់ របៀបរៀបរយក្នុងសង្គម ហើយត្រូវមានវិធានការម្ចាស់ការ ដើម្បីវាយបកទប់ស្កាត់និងដោះស្រាយឲ្យបានទាន់ពេលវេលាប្រកបដោយប្រសិទ្ធភាព ។ ហើយក្នុងនោះដែរ ដើម្បីឆ្លើយតបទៅនិងតួនាទីភារកិច្ចដែលបានកំណត់ខាងលើ កងកម្លាំងទាំងអស់ត្រូវមានសាមគ្គីភាពឯកភាពផ្ទៃក្នុង និង កិច្ចសហប្រតិបត្តិការគ្នាល្អ ជាមួយអង្គភាពពាក់ព័ន្ធ ពិសេសដឹកនាំនិងបំផុសចលនាបងប្អូនប្រជាការពារក្នុងមូលដ្ឋាន ចូលរួមចំណែកក្នុងកិច្ចការពារសន្តិសុខ សុវត្ថិភាព ដើម្បីឈានទៅសម្រេចបានស្នាដៃធំៗបន្ថែមទៀត ក្នុងការការពារសន្តិសុខសុវត្ថិភាពនិងសណ្តាប់ធ្នាប់សាធារណៈជូនប្រជាពលរដ្ឋ អង្គភាព និង ជូនជាតិមាតុភូមិកម្ពុជាយើង ៕
អត្ថបទ និង រូបភាព៖ អ៊ុន ណារាជ្យ
