កាលពីថ្ងៃទី២៣ ខែមិថុនា ឆ្នាំ២០២០នេះ ឯកឧត្ដមបណ្ឌិត អ៊ុក រ៉ាប៊ុន រដ្ឋមន្រ្ដីក្រសួងអភិវឌ្ឍន៍ជនបទ រួមដំណើរដោយលោក Liu Zhijie អគ្គកុងស៊ុលរបស់ស្ថានទូតចិន ប្រចាំនៅខេត្តសៀមរាប ឯកឧត្ដមរដ្ឋលេខាធិការ អនុរដ្ឋលេខាធិការ អាជ្ញាធរខេត្ត រួមទាំងមន្រ្ដីបច្ចេកទេសនៃក្រសួងអភិវឌ្ឍន៍ជនបទ បានអញ្ជើញទៅពិនិត្យការដ្ឋានខួងអណ្ដូងទឹកស្អាតចំនួនពីរកន្លែងស្ថិតនៅភូមិក្អែកទុំ ឃុំរើល ស្រុកពួក និងនៅក្នុងភូមិបល្ល័ង្គ ឃុំបល្ល័ង្គ ស្រុកប្រាសាទបាគង ខេត្តសៀមរាប ។
ឯកឧត្ដមបណ្ឌិត ចាន់ ដារ៉ុង រដ្ឋលេខាធិការក្រសួងអភិវឌ្ឍន៍ជនបទ និងជានាយកគម្រោងផ្គត់ផ្គង់ទឹកជនបទជំហានទី២ បានឲ្យដឹងថា៖ គម្រោងផ្គត់ផ្គង់ទឹកជនបទជំហានទី២ ក្រោមហិរញ្ញប្បទានឥតសំណងរបស់សាធារណរដ្ឋប្រជាមានិតចិន អនុវត្តរយៈពេល ២៤ខែ ដោយចាប់ផ្ដើមពី ខែធ្នូ ឆ្នាំ២០១៩ ដល់ខែវិច្ឆិកា ឆ្នាំ២០២១ ។ ចំពោះគម្រោងនេះមានគោលបំណងធ្វើឲ្យប្រសើឡើងនូវលក្ខខណ្ឌរស់នៅរបស់ប្រជាពលរដ្ឋនៅតំបន់ជនបទ និងចូលរួមកាត់បន្ថយភាពក្រីក្រ ដោយផ្ដោតការយកចិត្តទុកដាក់ទៅលើលើវិស័យផ្គត់ផ្គង់ទឹកស្អាតតាមរយៈការខួងអណ្ដូង និងសាងសង់ស្រះទឹកសហគមន៍ ។
ឯកឧត្ដមរដ្ឋលេខាធិការ បានបន្តថា៖ ក្រសួងអភិវឌ្ឍន៍ជនបទ បានចុះកិច្ចសន្យាជាមួយក្រុមហ៊ុន China Jiangxi International Economic and Technical Cooperation Co.,Ltd. របស់ភាគីមិត្តចិន កាលពីថ្ងៃទី ១៥ ខែវិច្ឆិកា ឆ្នាំ ២០១៩ មានហិរញ្ញប្បទានឥតសំណងសរុបចំនួន ៩០ ០២០ ០០០យន់ (RMB) ដែលស្មើនឹងជិត១៣ ០០០ ០០០ដុល្លាសហរដ្ឋអាមេរិក នឹងត្រូវយកមកប្រើប្រាស់ក្នុងការខួងអណ្តូងស្នប់សរុបចំនួន ៩៦៤អណ្តូង ជីកស្រះទឹកសហគមន៍ចំនួន ១២ស្រះ និងជីកស្រះទឹកសហគមន៍ដែលមានរៀបថ្មសរុបចំនួន ៤២ស្រះ នៅក្នុងតំបន់មួយចំនួនដែលរងការខ្វះខាតទឹកសម្រាប់ប្រើប្រាស់ក្នុងខេត្តគោលដៅចំនួន ១០គឺ៖ ខេត្តសៀមរាប បន្ទាយមានជ័យ បាត់ដំបង ពោធិ៍សាត់ កំពង់ឆ្នាំង កំពង់ស្ពឺ កំពត ព្រៃវែង ស្វាយរៀង និងខេត្តកំពង់ចាម ។
ព័ត៌មានជាតិ ថ្មីៗ
ឯកឧត្តម ក៏បានបញ្ជាក់ដែរថា ចំពោះខេត្តសៀមរាប អណ្តូងទឹកស្អាតដែលត្រូវខួងមានសរុប ១០០អណ្តូង ហើយគិតត្រឹមថ្ងៃទី១៥ ខែមិថុនា ឆ្នាំ២០២០កន្លងទៅក្រុមការងារបានខួងអណ្តូងបានរួចរាល់មានចំនួន ៦៧អណ្តូង និងកពុងបន្តការសាងសង់ស្រះសហគមន៍មានរៀបថ្មចំនួន ៤ស្រះ ដែលសម្រេចបានប្រមាណ ៩៥% និងស្រះទឹកសហគមន៍ធម្មតាចំនួន ៣ស្រះ សម្រេចបានប្រមាណ ៩៥% នៃគម្រោង ។
បានប្រសាសន៍ក្នុងឪកាសនោះដែរ ឯកឧត្ដមបណ្ឌិត អ៊ុក រ៉ាប៊ុន បានថ្លែងអំណរគុណយ៉ាងជ្រាលជ្រៅចំពោះប្រជាជនក៏ដូចជា រដ្ឋាភិបាលនៃសាធារណរដ្ឋប្រជាមានិតចិន ដែលតែងតែជួយគាំទ្រដល់រាជរដ្ឋាភិបាលកម្ពុជាទាន់ពេលវេលា ដោយមិនមានលក្ខខណ្ឌស្មុកស្មាញឡើយ ។ ក្នុងនោះដែររាល់ការជួយមកកម្ពុជាពីសំណាក់រដ្ឋាភិបាលនៃសាធារណរដ្ឋប្រជាមានិតចិន គឺមានច្រើនណាដោយវាជាការចែករំលែកមួយដែលកម្ពុជាមិនអាចភ្លេចបាន ។
ឯកឧត្តម មានប្រសាសន៍ទៀតថា ជាក់ស្ដែងគម្រោងផ្គត់ផ្គង់ទឹកជនបទ ជំហានទី២ ក្រោមហិរញ្ញប្បទានជំនួយឥតសំណងរបស់រដ្ឋាភិបាលនៃសាធារណរដ្ឋប្រជាមានិតចិន បានរួមចំណែកជាមួយរាជរដ្ឋាភិបាលអនុវត្តផែនការយុទ្ធសាស្រ្ដជាតិសម្រាប់វិស័យផ្គត់ផ្គង់ទឹកស្អាត និងអនាម័យជនបទសម្រាប់ឆ្នាំ២០១៤-២០២៥ ដោយបានកំណត់ថា ការផ្គត់ផ្គង់ទឹកស្អាតសម្រាប់តំបន់ជនបទត្រូវគ្របដណ្ដប់ឲ្យបាន ១០០% នៅឆ្នាំ ២០២៥ និងបានកំណត់ចក្ខុវិស័យថា មនុស្សគ្រប់រូបនៅក្នុងសហគមន៍ជនបទ ត្រូវទទួលបានសេវាផ្គត់ផ្គង់ទឹកស្អាត និងអនាម័យប្រកបដោយនិរន្ដរភាព និងរស់នៅក្នុងបរិស្ថានស្អាតនៅឆ្នាំ ២០២៥ ៕
