នៅព្រឹកថ្ងៃទី១៣ខែកញ្ញាឆ្នាំ២០២០នេះ រដ្ឋបាលខេត្តសៀមរាប សហការជាមួយអាជ្ញាធរជាតិអប្សរា និងវិស័យឯកជន បានរៀបចំពិធី ដាំកូនឈើចម្រុះចំនួន ១៥០០ដើម ស្ថិតក្នុងបរិវេណប្រាសាទបន្ទាយក្ដី ក្រោមប្រធានបទ “យើងដាំ យើងចំណាំ យើងថែរក្សា ប្រាង្គប្រាសាទ ដែលជាបេតិកភណ្ឌមនុស្សជាតិ”។
លោក ឡុង កុសល ប្រធាននាយកដ្ឋានផ្សព្វផ្សាយ និងជាអ្នកនាំពាក្យនៃអាជ្ញាធរជាតិអប្សរា លើកឡើងថា៖ ការដាំកូនឈើនៅក្នុងតំបន់រមណីយដ្ឋានអង្គរនេះ នឹងផ្ដល់ប្រយោជន៍ សម្រាប់ការរស់របស់ប្រជាពលរដ្ឋ រួមនិងការអភិរក្សប្រាង្គប្រាសាទ ដែលបានបម្រើដល់វិស័យទេសចរណ៍។ ព្រៃឈើ ដើរតួនាទីយ៉ាងសំខាន់ ក្នុងការជួយថែរក្សា ផលប៉ះពាល់ដល់ប្រាសាទបុរាណ និងដំណើរការប្រព័ន្ធអេកូ-ឡូស៊ី ដែលវាបានជួយកាត់បន្ថយ ការប្រែប្រួលអាកាសធាតុ ដូចជាទឹកជំនន់ ខ្យល់ព្យុះ និងការស្រូបយកឧស្ម័នកាបូនិចពីបរិយាកាស។
ថ្លែងក្នុងឱកាសនោះ លោក ពិន ប្រាកដ អភិបាលរងខេត្តសៀមរាប បង្ហាញថា៖ ការដាំដើមឈើ ជាចលនាបំផុសស្មារតីប្រជាពលរដ្ឋយើង ឱ្យចេះស្រឡាញ់ និងការពារព្រៃឈើ ព្រមទាំងបានឆ្លុះបញ្ចាំងឱ្យឃើញនូវការខិតខំប្រឹងប្រែង ទាំងរាជរដ្ឋាភិបាល វិស័យឯកជន និងប្រជាពលរដ្ឋខ្លួនឯងផ្ទាល់ ក្នុងការការពារ និងស្តារព្រៃឈើឡើងវិញ។
លោកអភិបាលរងខេត្ត បានអំពាវនាវដល់ ប្រជាពលរដ្ឋទាំងអស់ ៖ សូមបញ្ឈប់ជាបន្ទាន់ ការធ្វើអាជីវកម្មព្រៃឈើ និងជំនួញដីព្រៃឈើខុសច្បាប់ ដែលនេះជាបទល្មើសដ៏ធ្ងន់ធ្ងរបំផុត ជាពិសេសធ្វើឲ្យអន្តរាយដល់ធនធានធម្មជាតិ បរិស្ថាន និងបង្កឲ្យមាន គ្រោះធម្មជាតិ ដែលជាគ្រោះថ្នាក់ សម្រាប់ជីវិតលើផែនដីទាំងមូល។ ផ្ទុយទៅវិញ យើងត្រូវរួមសាមគ្គីគ្នា ដើម្បីបណ្ដុះឡើងវិញ នូវគំនិតស្រឡាញ់ព្រៃឈើ ថែរក្សាការពារព្រៃឈើ និងទស្សនៈសន្សំសំចៃក្នុង ការប្រើប្រាស់ផល និងអនុផលព្រៃឈើគ្រប់ប្រភេទ ។ ចំពោះកូនឈើ ដែលបាន ដាំរួចហើយ សូមអាជ្ញាធរគ្រប់លំដាប់ថ្នាក់ មេត្តារៀបចំផែនការសកម្មភាពក្នុង ការចូលរួមថែរក្សាឱ្យបានហ្មត់ចត់ជាប្រចាំ ដើម្បីធ្វើឱ្យកូនឈើទាំងនោះលូតលាស់ ធំធាត់ឆាប់រហ័ស និងពុំបាត់បង់ទៅវិញ។
អត្ថបទ និង រូបថត ៖ លោក យូ វង្ស
កែសម្រួលអត្ថបទ ៖ លោក សេង ផល្លី