នៅវេលាម៉ោងប្រមាណ០២ទាបភ្លឺ ឈានចូលថ្ងៃទី០៦ ខែវិច្ឆិកា ឆ្នាំ២០២០ មានករណីគ្រោះថ្នាក់ចរាចរណ៍មួយ កើតឡើងនៅតាមបណ្ដោយ ផ្លូវជាតិ៦ ក្នុងភូមិស្ពានត្នោត១ ឃុំស្ពានត្នោត ស្រុកជីក្រែង ខេត្តសៀមរាប បណ្ដាលឲ្យមនុស្សក្នុងរថយន្តចំនួន ៦នាក់ និងក្មេងស្រីម្នាក់អាយុ២ឆ្នាំបានស្លាប់ និង៥នាក់ទៀតរងរបួស។
តាមការឲ្យដឹងពី លោកលោកវរៈសេនីយ៍ទោ សាន សុគុណ អធិការស្រុកជីក្រែងស្ដីទី បង្ហាញថា រថយន្តគ្រោះថ្នាក់ មាន ម៉ាកស្តារិច ពណ៌ទឹកប្រាក់ ពាក់ស្លាកលេខ កំពង់ចាម 2A8469។ រថយន្តគ្រោះថ្នាក់នេះដែរ ធ្វើដំណើរចេញពីប្រទេសវៀតណាម ឆ្លងកាត់ខេត្តត្បូងឃ្មុំ ឆ្ពោះកាន់ខេត្តសៀមរាប លុះដល់ចំណុចកើតហេតុ រថយន្តខាងលើ បានជ្រុលធ្លាក់ស្ពាន ចូលប្រឡាយជាប់មាត់ផ្លូវ និងមិនបានបង្កឲ្យមានគ្រោះថ្នាក់ដល់អ្នកដំណើរដទៃឡើយ។
លោកអធិការស្រុកស្ដីទី បញ្ជាក់ថា ក្នុងចំណោមអ្នកស្លាប់ទាំង៧នាក់នោះ ៦នាក់ជាជនជាតិវៀតណាម (ស្រី៣នាក់) និង អ្នកបើកបរម្នាក់ ជាជនជាតិខ្មែរ។
តាមការសន្និដ្ឋានរបស់សមត្ថកិច្ចនៅកន្លែងកើតហេតុ គ្រោះថ្នាក់ខាងលើ បណ្ដាលមកពីអ្នកបើកបរងងុយដេក និងបើកលើសល្បឿនកំណត់។
អត្ថបទ និង រូបថត ៖ លោក គឿន វេត
កែសម្រួលអត្ថបទ ៖ លោក សេង ផល្លី
https://www.facebook.com/live/producer/856665655145575/?entry_point=pages_feed
