ដើម្បីឆ្លើយតបទៅនឹងតម្រូវការចាំបាច់របស់មាតាបិតា ឬអាណាព្យាបាលសិស្ស និង លោកគ្រូអ្នកគ្រូ ព្រមទាំងគួបផ្សំទៅនឹងចំនួនសិស្សចេះតែមានកំណើនឡើងជារៀងរាល់ឆ្នាំផងនោះ ពិសេសដោយមើលឃើញពីភាពខ្វះអគារសិក្សាផង ព្រះសង្ឃ និងគណ:កម្មការវត្តដំណាក់ បានផ្តួចផ្តើមលើកគម្រោងសាងសង់អគារសិក្សាថ្មី១ខ្នង ស្មើនឹង១០បន្ទប់ ប្រវែង៤០ម៉ែត្រគុណនឹង៩ម៉ែត្រ មានកម្ពស់២ជាន់ ក្នុងតម្លៃប៉ាន់ស្មានជិត៣០ម៉ឺនដុល្លារអាមេរិក។ នៅព្រឹកថ្ងៃទី១០ ខែមិថុនា ឆ្នាំ២០២១នេះ បានរៀបចំពិធីបញ្ចុះបឋមសិលាសាងសង់ ក្រោមអធិបតីភាពព្រះវិជ័យរង្សី បណ្ឌិត ឡាច លាង ព្រះរាជាគណ:ថ្នាក់កិត្តិយស ព្រះធម្មធរគណខេត្ត, លោកជំទាវ ពៅ សាវឿន សមាជិការដ្ឋសភាមណ្ឌលសៀមរាប និងឯកឧត្តម កុយ សង សមាជិកក្រុមប្រឹក្សាខេត្ត ព្រមទាំងនិមន្ត និងអញ្ជើញចូលរួមជាកិត្តិយសពីសំណាក់ព្រះធម្មានុក្ខញាណ ស៊ុ ពិសិដ្ឋ ព្រះរាជាគណ:ថ្នាក់កិត្តិយស ព្រះសមុហ៍គណខេត្ត , ព្រះចៅអធិការវត្ត និងព្រះគ្រូសូត្រ នៃវត្តមួយចំនួនក្នុងក្រុងសៀមរាប, ចៅសង្កាត់សាលាកំរើក និង លោក លោកស្រីជាសប្បុរសជនជិតឆ្ងាយជាច្រើនរូបទៀត ។
ព្រះគ្រូធម្មវិសុទ្ឋិរង្សី ឡាច ចន្ថា ព្រះចៅអធិការវត្តដំណាក់ មានសង្ឃដីកាថា៖ដោយមើលឃើញពីស្ថានភាពអគារចាស់ដែលកសាងឡើងក្នុងអំឡុងទសវត្សទី៦០ មានសភាពចាស់ទ្រុឌទ្រោម អាចបង្កហានិភ័យរលំបាក់ដោយអន្លើៗជាយថាហេតុ និងមានការខ្វះខាតបន្ទប់សិស្សសិក្សា ដោយសារចំនួនសិស្សកាន់តែកើនឡើងជារៀងរាល់ឆ្នាំនោះ ទើបព្រះសង្ឃ និងគណ:កម្មការវត្តសម្រេចសងសង់អគារមួយថ្មីមួយខ្នងនេះឡើង ទោះបីជាមានថវិកាតែត្រឹមចំនួន៤ម៉ឺនដុល្លារ នៅក្នុងដៃក្តី តែសង្ឃឹមថា តាមរយ:ការចូលរួមបរិច្ចាកធនធានជាបន្តបន្ទាប់របស់សប្បុរសជនជិតឆ្ងាយ នឹងអាចឱ្យអគារថ្មីនេះលេចរូបរាងឡើងតាមការគ្រោងទុកជាក់ជាពុំខាន ហើយការសាងសង់អគារសិក្សាថ្មី នឹងត្រូវប្រើប្រាស់ពេលវេលាក្នុងរយ:ពេល២ឆ្នាំ ។
មានប្រសាសន៍ក្នុងឱកាសនោះ លោក សាម ឡម ចៅសង្កាត់សាលាកំរើក បង្ហាញនូវការគាំទ្រ និងបានធ្វើការអំពាវនាវបន្ថែមឱ្យមានការចូលរួមបរិច្ចាកធនធានថវិកា ទៅតាមលទ្ឋភាពពីសំណាក់សប្បុរជននានា ដើម្បីឱ្យអគារសិក្សាថ្មីនេះឆាប់រួចរាល់ ដើម្បីបំរើឱ្យវិស័យអប់រំនៅសហគមន៍មូលដ្ឋាន ដែលជាថ្នាលបណ្តុះវិជ្ជាផ្តល់ចំណេះដឹងដល់កូនចៅជំនាន់ក្រោយរបស់យើងទាំងអស់គ្នា។ ព្រោះអគារសិក្សាថ្មីនេះ គឺកន្លែងបណ្តុះបណ្តាលដល់កុមារ និងយុវជនជំនាន់ក្រោយឱ្យក្លាយជាទំពាំងស្នងឫស្សី និងជាសសរទ្រូងរបស់ប្រទេសជាតិនាពេលអនាគត។ ការសាងសង់អគារនេះ ជួយដល់កុមារនៅមូលដ្ឋាននេះមានលទ្ធភាពទទួលបានការអប់រំដូចៗគ្នា សំដៅលើកកម្ពស់សិទ្ធិកុមារ សីលធម៌សង្គម និងការជួយគ្នាទៅវិញទៅមក ដើម្បីអនាគតដ៏ប្រពៃ នៃកុមារ និងយុវជនរបស់យើង ៕
អត្ថបទ និងរូបភាព៖ លោក យូ វង្ស កែសម្រួលអត្ថបទ ៖ លោក លីវ សាន្ត
