កាលពីរសៀលថ្ងៃទី១៥ ខែតុលា ឆ្នាំ២០២១ លោកស្រី ងិន មុំ ប្រធានកិត្តិយសអនុសាខាកាកបាទក្រហមកម្ពុជាស្រុកសូទ្រនិគម រួមនឹងក្រុមការងារ បាននាំយកនូវអំណោយមនុស្សធម៌មួយចំនួន ចូលរួមរំលែកទុក្ខក្រុមគ្រួសារប្រជាពលរដ្ឋដែលមានសមាជិកគ្រួសារម្នាក់បានស្លាប់ដោយសាររន្ទះបាញ់ ឈ្មោះ ហេត សុធារ៉ា ភេទស្រី អាយុ ១៤ឆ្នាំ ដែលត្រូវបានរន្ទះបាញ់បាញ់ស្លាប់កាលពីថ្ងៃទី១៤ ខែតុលា ឆ្នាំ២០២១កន្លងទៅ នៅក្នុងភូមិត្រពាំងត្រុំ ឃុំពពេល ស្រុកសូទ្រនិគម ខេត្តសៀមរាប ខណៈមេឃកំពុងធ្លាក់ភ្លៀង និងមានផ្គរន្ទះខ្លាំង ហើយកុមារីរងគ្រោះ បានដើរទៅយកល្បាស់ដំឡូងរបស់ម្ដាយមីង នៅក្នុងចំការ។
ក្នុងឱកាសនោះលោកស្រី ងិន មុំ បានពាំនាំនូវការផ្តាំផ្ញើសួរសុខទុក្ខ ពីសម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ប្រធានកាកបាទក្រហមកម្ពុជា ក៏ដូចជាឯកឧត្តម ទៀ សីហា ប្រធានគណៈកម្មាធិការសាខាកាកបាទក្រហមកម្ពុជា ខេត្តសៀមរាប ដែលលោកទាំងពីរតែងគិតគូរចំពោះសុខទុក្ខបងប្អូនប្រជាពលរដ្ឋ ដោយប្រកាន់ខ្ជាប់ នូវគោលការណ៍គ្រឹះទាំង៧ របស់ចលនាអន្តរជាតិកាកបាទក្រហម អឌ្ឍចន្ទក្រហម។ ជាមួយនោះលោក និងក្រុមការងារ ក៏សូមចូលរួមសោកស្តាយយ៉ាងពន់ពេក និងបានចូលរួមរំលេកទុក្ខដ៏ក្រៀមក្រំដល់ក្រុមគ្រួសារជនរងគ្រោះ។
លោកស្រី ងិន មុំ មានប្រសាសន៍ទៀតថា អំណោយមនុស្សធម៌ដែលបានប្រគល់ជូននាពេលនេះ គឺជាការបង្ហាញនូវការយកចិត្តទុកដាក់ចំពោះប្រជាពលរដ្ឋ ពីសំណាក់ថ្នាក់ដឹកនាំ ពិសេសគឺកាកបាទក្រហមកម្ពុជា ដែលមានសម្ដេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ជាប្រធាន ដូចដែលបានលើកឡើងថា “កាកបាទក្រហមកម្ពុជា មានគ្រប់ទីកន្លែង សម្រាប់គ្រប់ៗគ្នា មិនទុកនរណាម្នាក់ចោល” និង “ទីណាមានទុក្ខលំបាក ទីនោះមានកាកបាទក្រហមកម្ពុជា” ។ ជាមួយគ្នានោះលោកស្រី ក៏បានអំពាវនាវសូមឱ្យបងប្អូនប្រជាពលរដ្ឋទាំងអស់សូម ថែរក្សាសុខភាពខ្លួនឲ្យបានល្អ ហើយប្រសិនបើបងប្អូនមានជំងឺ និងគ្រោះថ្នាក់ផ្សេងៗ សូមប្រញាប់បញ្ជូនទៅមណ្ឌលសុខភាពដែលនៅជិតបំផុត។ ជាពិសេសត្រូវចូលរួមអនុវត្តឲ្យបានខ្ជាប់ខ្ជួន តាមការណែនាំរបស់រាជរដ្ឋាភិបាល និងក្រសួងសុខាភិបាលនូវវិធាន ៣កុំ ៣ការពារ ឲ្យបានជាប់ជានិច្ច ដើម្បីកាត់ផ្ដាច់ជំងឺកូវីដ-១៩ ផុតពីមូលដ្ឋានភូមិស្រុករបស់យើង ក៏ដូចជាខេត្តសៀមរាប និងប្រទេសកម្ពុជាទាំងមូលផងដែរ។
សូមជម្រាបថា អំណោយមនុស្សធម៌ដែលបានប្រគល់ជូននាពេលនោះ រួមមាន៖ អង្ករ ៥០គីឡូក្រាម, មី ១កេស, ត្រីខ ១យួរ, ទឹកត្រី ២យួរ, ទឹកស៊ីអ៊ីវ ២យួរ, មុង១, ភួយ១, ទឹកសុទ្ធ ៥យួរ និងថវិកាចំនួន ២០០.០០០រៀល៕
#សាខាកាកបាទក្រហមខេត្តសៀមរាប
