លោក នាក់ ណេរ៉ុន អភិបាលរងខេត្ដសៀមរាប បានលើកឡើងថា សេវាកម្មរបស់ក្រុមហ៊ុនដឹកជញ្ជូនរបស់ក្រុមហ៊ុន ឯកជន Food Panda មានការដឹកជញ្ជូនរហ័សទាន់ចិត្ដ និងបម្រើសេវាកម្មបានល្អដល់ប្រជាពលរដ្ឋ ក្នុងអំឡុងពេលវិបត្ដិជំងឺកូវីដ-១៩ ព្រោះថាក្នុងអំឡុងពេលដែលខេត្ដសៀមរាប ត្រូវបានបិទខ្ទប់ស្ទើរស្រុងនោះ ក្រុមការងារដៃគូដឹកជញ្ជូនរបស់ food panda បានធ្វើការយ៉ាងមមាញឹក ក្នុងការដឹកជញ្ជូនម្ហូបអាហារ របស់របរប្រើប្រាស់ផ្សេងៗ បម្រើជូនដល់ប្រជាពលរដ្ឋក្នុងមូលដ្ឋានក្នុងខេត្ដសៀមរាប បានល្អប្រសើរ ហើយជារើយៗ ក្រុមការងារនៃក្រុមដឹកជញ្ជូននេះ បានយកចិត្តទុកដាក់ខ្ពស់ដល់សុខទុកវីរៈជនជួរមុខរបស់យើងជាច្រើន ដូចជាមានការផ្តល់សម្ភារៈបរិក្ខាប្រើប្រាស់សម្រាប់ទប់ស្កាត់ការឆ្លងវីរុសកូវីដ-១៩ រួមមានទឹកអាល់កុល ជេលសម្លាប់មេរោគ ម៉ាស់ មួយចំនួនដល់សាលាក្រុង ក៍ដូចជាមានចែកជូនអាហារដល់ស្នងការប៉ូលីសជួរមុខប្រចាំខេត្តសៀមរាបផងដែរ។
លោកអភិបាលរងខេត្ដ បានលើកឡើងបែបនេះ នៅពេលលោកបានផ្តល់កិត្តិយសអញ្ជើញចូលរួមបើកសម្ភោធហាងលក់ ទំនិញអនឡាញ Panda Mart ស្ថិតក្នុងភូមិតាភុល ក្រុងសៀមរាប ខេត្តសៀមរាប កាលពីពេលថ្មីៗនេះ។
លោក នាក់ ណេរ៉ុន មានប្រសាសន៍ទៀតថា ការធ្វើសកម្មភាពមនុស្សធម៌នេះ បានឆ្លុះបញ្ចាំងពីការយកចិត្តទុកដាក់ដល់ប្រជាពលរដ្ឋសហគមន៏របស់យើងក៏ដូចជាការជួយសម្រួលដល់ជីវភាពពលរដ្ឋ និងកាត់បន្ថយហានិភ័យនៃការរីករាលដាលការឆ្លងវីរុសកូវីដ១៩ មួយកម្រឹតធំផងដែរ។លោកបានបន្ដថា ក្នុងនាមលោកតំណាងនៅខេត្តសៀមរាប ពិតជាមានមោទនភាពនិងស្វាគមន៏យ៉ាងកក់ក្តៅដល់ការពង្រីកសេវាកម្ម ផែនដាម៉ាត ព្រមទាំងសេវាកម្មថ្មីៗទៀតមកកាន់ខេត្តដ៏មានសក្តានុពល សៀមរាបយើងនេះ។
លោក ហុង រ៉ាដា អគ្គនាយកក្រុមហ៊ុនពាណិជ្ជកម្ម Food Panda មានប្រសាសន៍ថា ចាប់ពីពេលនេះ អ្នកខេត្តសៀមរាប មានភាពងាយស្រួល និងសុវត្ថិភាពមួយកម្រិតទៀត ក្នុងការទិញទំនិញនានា ក្រោយពី food panda បានពង្រីកហាងលក់ទំនិញអនឡាញ panda mart របស់ខ្លួនដល់ទឹកដីនៃប្រាសាទអង្គរវត្ត បន្ទាប់ពីបានចាប់ផ្តើមដំណើរមុខងារថ្មីនេះលើកម្មវិធី App តែមួយរបស់ខ្លួន នៅភ្នំពេញកាលពីខែកញ្ញា។
លោកបានបន្ដថា ការពង្រីកហាង panda mart នៅខេត្ដសៀមរាបមួយនេះ ក៏មានគោលបំណងក្នុងការឆ្លើយតបទៅនឹងការរស់នៅតាមរបត់ថ្មីរបស់ប្រជាពលរដ្ឋក្នុងខេត្តសៀមរាប និងផ្តល់ភាពងាយស្រួលមួយកម្រិតទៀតផងដែរ ក្នុងការជាវទំនិញនានា ជាមួយនឹងសេវាកម្មដឹកជញ្ជូនរហ័សទាន់ចិត្ត ក៏ដូចជាបន្ថែមទៅលើសេវាដឹកជញ្ជូនអាហារដែលកំពុងតែពេញនិយមរួចជាស្រេចក្នុងចំណោមប្រជាពលរដ្ឋកម្ពុជា។pandamart គឺជាសេវាស្របតាមតម្រូវការអតិជិនរបស់ foodpanda និងជាហាងលក់ទំនិញលើអនឡាញសម្រាប់តែការដឹកជញ្ជូនដល់គហដ្ឋាន លើទំនិញជាច្រើនប្រភេទរហូតដល់ជាង៣ពាន់មុខ ចាប់ពីគ្រឿងទេស ផលិតផលស្រស់ ភេសជ្ជៈ និងសម្ភារៈប្រើប្រាស់សំខាន់ៗជាច្រើន ខណៈដែលអតិថិជន នឹងទទួលបានទំនិញត្រឹមតែចន្លោះពេល៣០នាទី បន្ទាប់ពីការកុម៉្មង់រួចរាល់៕
