តួប្រាង្គបាកាណនៃប្រាសាទអង្គរវត្ត ឬគេអាចហៅថា«រួតបាកាណ» ពាក់កណ្ដាលនៃផ្នែកខាងលិចគ្រោងនឹង បញ្ចប់ការជួសជុលចុងខែមេសានេះ បន្ទាប់ពីការជួសជុលរួចរាល់ កាន់តែមានភាពរឹងមាំមួយកំរឹតទៀត។ ចំពោះគម្រោងជួសជុលនៅជ្រុងនិរតី និងពាយ័ព្យ បានជិតរួចរាល់ជាស្ថាពរហើយ បន្ទាប់ពីក្រុមអ្នកជំនាញបានប្រឹងប្រែងលើការងារជួសជុលរយៈពេល ១០ខែជិតរួចរាល់ គឺនៅតែបង្ហើយការងារតូចៗ ដែលនៅសេសសល់ប៉ុណ្ណោះ ហើយគម្រោងជួសជុលខឿនប្រាង្គបាកាណនៃប្រាសាទអង្គរវត្ត ដែលចាត់ទុកថា ជាគម្រោងជួសជុលធំជាលើកទី១ គឺបានចាប់ផ្ដើមឡើងតាំងពីថ្ងៃទី០៨ ខែវិច្ឆិកា ឆ្នាំ២០២១មក។ នេះបើតាមការបញ្ចាក់របស់លោក ឃាម មុនី អ្នកគ្រប់គ្រងការដ្ឋានជួសជុលខឿនរួតបាកាណ នៅថ្ងៃទី២៦ ខែមេសា ឆ្នាំ២០២២នេះ។
លោក ឃាម មុនី បានបញ្ជាក់ទៀតថា តួប្រាង្គបាកាណនៃប្រាសាទអង្គរវត្ត នៅជ្រុងនិរតី និងពាយ័ព្យ មានសភាពទ្រុឌទ្រោមខ្លាំងដោយសារកត្តាជាច្រើនដូចជា អាយុកាលនៃសំណង់ចាស់ធ្វើឱ្យថ្មពុក ប្រេះ និងបាក់ ការបោះបង់ចោលដោយគ្មានការថែរក្សារយៈពេលយូរ ការបំផ្លាញដោយធម្មជាតិ មានរុក្ខជាតិ ដុះចាក់ឬស និងទឹកភ្លៀងហូរច្រោះគ្រឹះថ្មបាយក្រៀម។ កន្លងមកអាជ្ញាធរជាតិអប្សរាបានធ្វើការទល់ទ្រជាបន្តបន្ទាប់ផងដែរ តែលើកនេះគឺក្រុមការងារបានរើ កាយយកកំណកដី កម្ទេចថ្ម ចេញរួចដាក់ថ្មចូលទីតាំងដើមវិញរុញឱ្យបានកិបល្អ លែងសូវមានឃើញចន្លោះប្រហោងទៀតហើយ។ ក្រុមការងារពិតជាសប្បាយចិត្តដោយសារ យើងអាចបំលាស់ទីថ្មខ្លះដែលមានទម្ងន់ប្រហែលជាង ៣តោន និងបានដឹកជញ្ជូនថ្មថ្មីយកទៅប្រើប្រាស់ដោយសុវត្ថិភាព។ ក្នុងពេលជួសជុលតួប្រាង្គបាកាណ នៃប្រាសាទអង្គរវត្តនេះដែរ ក្រុមការងារបានរកផ្គុំថ្ម រៀបចំថ្មដែលនៅរាយប៉ាយជុំវិញខឿន ដើម្បីរកកន្លែងដើមរបស់វា ហើយអាចនឹងយកថ្មទាំងនោះ ទៅរៀបចូលនៅកន្លែងដើមវិញបានមួយចំនួនធំ។ ជាមួយគ្នានេះក្រុមការងារក៏បានជួយទល់ទ្រសរសរណាដែលមានសភាពទ្រុឌទ្រោមថែមទៀត។
សូមជម្រាបថា រួតបាកាណនៃប្រាសាទអង្គរវត្ត ជ្រុងនិរតីនិងពាយ័ព្យនេះធ្លាប់បានជួសជុលម្ដងដោយសាលាបារាំងចុងបូព៌ាកាលពីចន្លោះឆ្នាំ១៩៣៥-១៩៣៦ ហើយក្រោយៗមក ការជួសជុលជាគម្រោងធំដុំ គឺពុំធ្លាប់មានទេ មានតែគម្រោងជួសជុលតូចតាច ដូចជា កាលពីឆ្នាំ២០០០ អាជ្ញាធរជាតិអប្សរាធ្លាប់បានជួសជុលទល់ទ្រ និងធ្វើជណ្តើរ និងមានអង្គការ GACP អាល្លឺម៉ង់ធ្លាប់ជួយជួសជុលរូបអប្សរា និងប្រាង្គមួយចំនួនដែលមានថ្មពុកផុយខ្លាំង។ ចាប់ពីខែវិច្ឆិកា ឆ្នាំ២០២១មក អ្នកជំនាញនៃអាជ្ញាធរជាតិអប្សរា បានជួសជុលតួប្រាង្គបាកាណនៃប្រាសាទអង្គរវត្ត ជ្រុងនិរតីនិងពាយ័ព្យជាថ្មី ដោយប្រើឆន្ទះខ្ពស់បំផុត ពីព្រោះការជួសជុលនេះ មិនអាចនាំយកគ្រឿងចក្រចូលបាន គឺត្រូវប្រើកម្លាំងមនុស្សសុទ្ធដើម្បីលើកដុំថ្មធំៗ យកទៅតម្រៀបគ្នាឡើងវិញរហូតបានសម្រេច។ បន្ទាប់ពីបញ្ចប់ការជួសជុលតួប្រាង្គបាកាណ នៃប្រាសាទអង្គរវត្ត ឬហៅថា «រួតបាកាណ»នេះ ក្រុមការងារនឹងស្នើសុំមានគម្រោងជួសជុលខឿនបាកាណពីរជ្រុងទៀត គឺជ្រុងអគ្នេយ៍និងជ្រុងឦសានដែលមានសភាពខូចខាតខ្លាំងគួរឱ្យបារម្ភ៕
អត្ថបទ និង រូបភាព៖ លោក បូ សាវី
កែសម្រួល៖ លោក អ៊ុន ណារាជ្យ
