សាលាគណនិងមន្ទីរធម្មការនិងសាសនាខេត្តសៀមរាប បានរៀបចំបើកវគ្គបណ្តុះបណ្តាលមួយ សម្រាប់គណៈគ្រប់គ្រងសាលាពុទ្ធិកបឋមសិក្សា ដើម្បីពង្រឹងផ្នែកគ្រប់គ្រង និងបង្កើននូវធនធានព្រះសង្ឃ ក៏ដូចជាការគ្រប់គ្រងការបង្រៀននៅតាមបណ្តាសាលាពុទ្ឋិកបឋមសិក្សា ដែលកំពុងដំណើរការនៅក្នុងទូទាំងខេត្ត ឱ្យស្របទៅតាមនិយាមគរុកោសល្យ ដែលអគ្គាធិការដ្ឋានពុទ្ឋិកសិក្សាជាតិបានកំណត់មក។
វគ្គបណ្តុះបណ្តាលនេះ បានរៀបចំឡើងនៅក្នុងបរិវេណវត្តដំណាក់ ក្នុងសង្កាត់សាលាកំរើក ក្រុងសៀមរាប មានរយៈពេល៣ថ្ងៃ គិតចាប់ពីថ្ងៃទី២១ដល់ថ្ងៃទី២៣ ខែសីហា ឆ្នាំ២០១៩ ដោយមានសិក្ខាកាមជាព្រះគ្រូចៅអធិការ មកពីបណ្តាវត្តដែលមានសាលាពុទ្ឋិកបឋមសិក្សាក្នុងទូទាំងខេត្ត ប្រមាណជា៦០អង្គ ។
ព្រះតេជគុណ ទេព ភឿន ព្រះអនុគណស្រុកជីក្រែងនិងជាព្រះវិន័យធរគណខេត្តសៀមរាប មានព្រះថេរដិកាថា ក្រោយពីមន្ត្រីសង្ឃ និងមន្ទីរធម្មការនិងសាសនាខេត្តសៀមរាប ចំនួន៤អង្គនាក់ បាននិមន្តនិងទៅចូលរួមវគ្គបណ្តុះបណ្តាល ស្តីពីគណៈគ្រប់គ្រងសាលាពុទ្ធិកបឋមសិក្សា និងមធ្យមសិក្សាថ្នាក់ជាតិ កាលពីពេលថ្មីៗនេះមក សាលាគណខេត្តយល់ឃើញថា វគ្គបណ្តុះបណ្តាលគណៈគ្រប់គ្រងនេះ ពិតជាមានសារៈសំខាន់ណាស់ ដើម្បីគ្រប់គ្រងនិងបង្រៀនឱ្យស្របតាមនិយាមគរុកោសល្យ របស់ពុទ្ឋិកសិក្សាជាតិ ដូច្នេះហើតទើបសាលាគណ សហការជាមួយមន្ទីរធម្មការនិងសាសនាខេត្តសៀមរាប រៀបចំវគ្គបណ្តុះបណ្តាលនេះឡើងជាលើកដំបូងឡើង។
ព្រះតេជគុណ ទេព ភឿន មានថេរដិកាបន្តថា រាល់ការអនុវត្តនូវយន្តការណាមួយ តែងតែជួបប្រទះនូវបញ្ហាខ្វះខាត និងបញ្ហាប្រឈមខ្លះៗមួយចំនួន ជាពិសេសសមាសភាពនៃអ្នកដឹកនាំមិនទាន់មានចំណេះដឹងគ្រប់គ្រាន់ ហេតុនេះទាមទាររៀបចំវគ្គបណ្តុះបណ្តាលនេះឡើង ដើម្បីពង្រឹងសមត្ថភាពបន្ថែម លើការដឹកនាំ និងគ្រប់គ្រងផ្នែកពុទ្ឋិកបឋមសិក្សាដល់គណៈគ្រប់គ្រប់ ដូច្នេះតាមរយៈវគ្គបណ្តុះបណ្តាលនេះ សង្ឃឹមថា ព្រះតេជគុណគ្រប់ព្រះអង្គ នឹងយកចំណេះដឹងទៅផ្សព្វផ្សាយដល់មូលដ្ឋាន ដើម្បីទ្រទ្រង់ដល់វិស័យព្រះពុទ្ឋសាសនារបស់យើង ឱ្យគង់វង្សស្ថិតស្ថេរសម្រាប់កូនចៅយើងជំនាន់ក្រោយ ។
បើតាមប្រសាសន៍របស់លោក វណ្ណ ប៊ុនណា ប្រធានមន្ទីរធម្មការនិងសាសនាខេត្ត បានឱ្យដឹងថា នៅខេត្តសៀមរាបមានសាលាពុទ្ឋិក វិទ្យាល័យ ១សាលា ស្មើនឹង៥ថ្នាក់ មានសាមណៈសិស្ស២០០អង្គ នាក់ , សាលាពុទ្ឋិកអនុវិទ្យាល័យ មាន២សាលា ស្មើនឹង៨ថ្នាក់ មានសាមណៈសិស្សចំនួន៣៦៤អង្គ , សាលាពុទ្ឋិកបឋមសិក្សាមាន ៤៨សាលា ស្មើនឹង៧២ថ្នាក់ មានសាមណៈសិស្សចំនួន ១២៨៩អង្គ នាក់ , មានសាលាធម្មវិន័យ ៣០សាលា ស្មើនឹង៤៤ថ្នាក់ មានសាមណៈសិស្ស ៦៨០ អង្គ នាក់ , មានគ្រូក្របខ័ណ្ឌ១៩រូប , គ្រូជាប់កិច្ចសន្យា ៨៥រូប និងគណៈគ្រប់គ្រងសាលា២១អង្គ ៕
អត្ថបទ និង រូបថត ៖ លោក យូ វង្ស
កែសម្រួលអត្ថបទ ៖ លោក លីវ សាន្ត
