នៅព្រឹកថ្ងៃទី១៥ ខែមីនា ឆ្នាំ២០២១នេះ កម្លាំងសមត្ថកិច្ចខេត្តសៀមរាបកំពុងធ្វើការសើបអង្គេតតាមដានជនសង្ស័យចំនួន៤នាក់ ពីបទប៉ុនប៉ងសម្លាប់ចាងហ្វាងកាសែតម្នាក់កាលពីយប់ថ្ងៃទី១៤ ខែមីនា ឆ្នាំ២០២១។
លោកវរសេនីយ៍ឯក ស៊ុន អេង អធិការនគរបាលស្រុកស្វាយលើ បានឲ្យដឹងថា កម្លាំងលោកនៅមិនទាន់កំណត់មុខសញ្ញាជនដៃដល់នៅឡើយទេ ព្រោះក្រោយកើតហេតុជនរងគ្រោះពុំទាន់បានដាក់ពាក្យបណ្តឹង ដោយកំពុងសំរាកព្យាបាលហើយមានតែបងប្អូនមកផ្តល់ព័ត៍មានខ្លះៗប៉ុណ្ណោះ។ ប៉ុន្តែលោកសន្និដ្ឋានថាចំពោះករណីនេះទំនងពិបាកស្រាវជ្រាវ ព្រោះមិនអាចកំណត់បានថាករណីនេះជារឿងគុំនំ ឬយ៉ាងណាព្រោះជនរងគ្រោះដើរដេកពាសវាលពាសកាល ទោះបីអាជ្ញាធរមានសមត្ថកិច្ចហាមយ៉ាងណាក៍មិនស្តាប់ ខណ:នេះសមត្ថកិច្ចរបស់លោកកំពុងទៅសាកសួរជនរងគ្រោះបន្ថែម ដើម្បីឈានទៅកំណត់មុខសញ្ញា។
បើតាមលោក ប្រន ស៊ាន ចាងហ្វាងកាសែតអាណាចក្រខ្មែរ ដែរជាជនរងគ្រោះបានប្រាប់អោយដឹងថា នៅយប់កើតហេតុបន្ទាប់ពីរូបលោកចាកចេញពីខេត្តព្រះវិហារឆ្លងកាត់ស្រុកស្វាយលើហើយងងុយដេករូបលោក និងអ្នករួមដំណើរម្នាក់ទៀត បានឈប់ឡានហើយចងអង្រឹងដេកក្បែរផ្លូវ មុខប្រាសាទបេងមាលា ក៍ស្រាប់តែជនដៃដល់២នាក់ក្នុងចំណោម៤នាក់ដែរប្រដាប់ដោយដំបង វាយមកលើរូបលោកប្រមាណជាង១០ដំបងបណ្តាលអោយរងរបួសធ្ងន់ធ្ងរ។ ការវាយមកលើរូបលោកពីសំណាក់ជនដៃដល់ គឺអាចជាការប៉ុនប៉ងមនុស្សឃាតព្រោះថាបើរូបលោកមិនមានឪកាសរត់ចូលក្នុងឡានទាន់ទេពួកគេអាចវាយរហូតដល់ស្លាប់។ លោកថាចំពោះករណីនេះលោកនឹងដាក់ពាក្យបណ្តឹងទៅតុលាការក្រោយពេលសមត្ថកិច្ចសាកសួរហើយ៕
អត្ថបទ និង រូបភាព៖ ខេង ឧត្តម
កែសម្រួល៖ អ៊ុន ណារាជ្យ
